1 Me b'otal mɛ̃, mɛ̃ mwɛn ngesɛ kwɛn mɛ̃ mbee ola byɛ obekɔɔl onse ãwua. 2 Ke ngwel wɛ, okɛɛn myam wu esa kwɛn byɛ ekal y'ãwua, ke mɛ̃ mpaa me nã esia, okɛɛn ke me mbuul wu nsi mɛ̃ kwɛn ndɛ akal y'ãwua wɛ? 3 Mɛ̃ nkel byɛ m'emfa okyɛ, me ndɔɔ yɛn ŋ'ètɔ mɛ̃, bɛn kɛn b'akaasa mɛ̃ esɛ, abee osa kwɛn mɛ̃ nkal y'ãwua. Mɛ̃ nkiool bam wɛn, esɛ e mɛ̃ eli esɛ e byɛ bueel. 4 Mɛ̃ nkel byɛ y'ãwua bibi, ye nyiĩ onse ɔ̃kwal, yi elel-a-elel. Ke me ndɔɔ yɛn byɛ ekal y'ãwua wɛ, me ndɔɔ yɛn byɛ eyɛɛ dzii li enduru ɔ̃ndel li nzii a mɛ̃ byɛ.

5 Okɛɛn mbuul asi kwɛn wukyɛ akal y'ãwua, wu esi ndɛ kwɛn akal y'ãwua ke mɛ̃ wɛ, eli byɛ bueel. Eyɛɛn wɛn baal ke kwɛ onse byɛ, me ndɔɔ yɛn ebee enduul osa. 6 Mbuul wa m'emfa okyɛ, oyiaan b'emeeyiaan baal bibi onse byɛ ndɛ okoo. 7 M'emfa okyɛ, byɛ edzeel ndɛ bvool ewɛɛl ndɛ, kwɛn ndɛ abee onse ãwua m'ãnduru ɔ̃ndel okal. 8 Mɛ̃ ngwi byɛ luo wɛn esuo mbuul ondɛ dzii. 9 Mɛ̃ nkel byɛ hɛ̃ me ndɔɔ yi ekie ɛ̃kwal ɛ̃ byɛ, m'otal okɛɛn byɛ eli ye lweel m'ãndɔɔ mbueel. 10 Kɛn a wu edzeel byɛ, mɛ̃ hɛ̃ nzeel ndɛ. Ŋ'edzeel mɛ̃ mbuul wu osi ndɔɔ yi esɔɔ kwɛn mɛ̃ nzeel ndɛ, mɛ̃ edzeel ndɛ me ndɔɔ a byɛ, ke nkwel a Mãsia. 11 M'emfa okyɛ, Satana k'abvel bia-byɛ wɛ, ke ngwel wɛ bia-byɛ k'edzɛɛn ɛ̃yɛɛl ɛ̃ ndɛ.

12 Mɛ̃ ntɔ etswi e nsie ki Tolohas me ndɔɔ yi etsal Nsia yi Ngesɛ yi Mãsia, ke ngwel wɛ Mfam áwi mɛ̃ mpwee yi esal okɔ. 13 Kɛn a mɛ̃ ékekɛɛ nguo bam, me ndɔɔ yɛn mɛ̃ k'émwɛn ndoo a mɛ̃ Tite wɛ. Obobɔ, mɛ̃ ndɛɛl baal a Tolohas, bu ngyɛn etswi e nsie ki Maseduaan.

14 Bia-byɛ ebveel Nziã ãtuɛɛn wu abesuul bia-byɛ ebebvel ãlio mbueel, onse Mãsia! Me nkuul a bia-byɛ, ndɛ hɛ̃ abesa kwɛn baal ayɛɛ Mãsia ãmboo mbueel, onge ãnãsi m'etsɔɔn nswel ãmboo mbueel. 15 Ngwanyã, ola Nziã, bia-byɛ eli onge ãnãsi ã Mãsia, me ndɔɔ a baal b'ali me nkuul yi obvuul, bvool me ndɔɔ a b'ayi k'odziɔɔn. 16 Me ndɔɔ a b'ayi k'odziɔɔn, mɔ̃ ãli nswel yi epfu, yi ebiri k'epfu. Me ndɔɔ a b'ali ke nkuul yi obvuul, mɔ̃ ãli nswel yi elaã yi ebiri k'elaã. Kɛn a wu okoo k'asa ɔ̃sal wu obobɔ nã? 17 Bee k'eli onge baal bibi b'asa obɔɔ̃ m'Endɔɔ e Nziã wɛ. Bee bam eyɛɛn otaa-taa b'ofa ola Nziã, ke nkwel a Nziã, onse Mãsia.