2 Coríntios 3

Asal b’Ondoo b’Alili

1 Bee bvool k’ebii nkuul yi esa kwɛn byɛ eyɔɔ bee wɛ! Bee hɛ̃ k’eli ye kɔɔ, onge bakyɛ, li ɛ̃nkaan mi esuo kwɛn atam bee wuo mi ɛ̃fa ola byɛ wɛ. 2 Byɛ mpii baal b’eli ɔ̃nkaan a bee, wu akel onse ɛ̃kwal ɛ̃ bee, wɛn baal bueel ayɛɛ ndɛ bvool atsiɔ ndɛ. 3 Eli kal-a-kal kwɛn byɛ eli ɔ̃nkaan wu eswɛn Mãsia me nkuul ɔ̃sal a bee. Bee baal b’ebiri ɔ̃nkaan ondɛ. K’aswɛn ndɛ m’ɔ̃swɛn wu abeswɛn ɛ̃nkaan wɛ, aswɛn ndɛ m’Ɔ̃fel a Nziã wa mwiĩ. K’aswɛn ndɛ nkal ãnkɔɔn wɛ, aswɛn ndɛ nkal a tuo, onse ɛ̃kwal.

4 Olɔ kaã li ebeta bee me Nziã me nkuul a Mãsia. 5 Bee k’eyɛɛn wɛn bee ebesa eluɔ si ngemɔ̃ me mpɛn a bee-myam wɛ, Nziã wu abewa bee mpɛn yi esa m’ebesa bee. 6 Ndɛ wu osi kwɛn bee ekal asal b’Ondoo b’Alili. Ondoo obɔ k’otal ngel yi aswɛn m’oswɛn wɛ, bɔ otal Ɔ̃fel a Nziã. Ke ngwel wɛ, ngel yi akel ebam, kɛn Ɔ̃fel a Nziã awa elaã.

7 Ãmpiri ã ngel oyɔ, áswɛn mɔ̃ nkal ãnkɔɔn, bvool Moyize ákesal me ndɔɔ a ngel yi ékebiri baal k’epfu oyɔ. Onkyam obobɔ, ɔ̃sal ondɛ ákewa ndɛ lweel li bibi. Onge bɛn osu o ndɛ ókenyɛɛn me lweel olɔ, afi-Isalayel k’ákekoo k’atal ndɛ wɛ. Kɛn a lweel olɔ k’ékeyiil wɛ. 8 Kɛn a me b’otal ɔ̃sal wu Ɔ̃fel wu, ndɛ kieel akal ye lweel li enduru ɔ̃ndel! 9 Okɛɛn ɔ̃sal wu abiri baal k’etumbu obɔɔ lweel, bvel-bvel ɔ̃sal wu ãndɔɔ mã dzu akal ye lweel li enduru ɔ̃ndel. 10 M’emfa okyɛ, lweel li ékengal tsɔɔn k’ebengal bvool wɛ me ndɔɔ a lweel li enduru lɔ m’ongal. 11 Ke ngwel wɛ, okɛɛn kyɛn k’eyiil wɛ éli ye lweel, bvel-bvel ki eyiil ekal ye lweel li enduru ɔ̃ndel.

12 Onge bɛn bia-byɛ eli ye kaã li obobɔ, bia-byɛ hɛ̃ esuo ãŋã mã bibi. 13 Bee k’esa onge Moyize wɛ. Ndɛ ákefoo ekɔ m’osu, kwɛn afi-Isalayel abee k’efa lweel e Nziã li ékengal me muaan-lio nkal osu Moyize omwɛn. 14 Kɛn ãyal ã bɔ k’ãbekwaal ãndɔɔ otsɛn wɛ. Ke ngwel wɛ, tiil lio li ebekel bee byɛ ɔ̃nkaan li, ŋ’ebetsiɔ bɔ ɛ̃nkaan mi Ondoo bo Tsɔɔn, ekɔ okyɛ kɛn eli m’osu o bɔ, kɛn ambaal kyɛ wɛ. Ke ngwel wɛ, kyɛ ebembal kɛn a ŋ’eyii mbuul bvoo ye Mãsia. 15 Tiil meba, ŋ’etsiɔ bɔ ɛ̃nkaan ɛ̃ Moyize, ekɔ ngemɔ̃ ebefoo ɛ̃kwal ɛ̃ bɔ. 16 Kɛn a ŋɛn mbuul okiool Mfam, «ekɔ okyɛ embal✝3.16 Opa 34.34 ». 17 Mfam oli Ɔ̃fel. Mboo yi eli Ɔ̃fel a Mfam, onkyal k’obekal wɛ. 18 Bia-byɛ bueel bɛn ãsu k’ãbekal m’ofoo wɛ, ebesuul lweel e Mfam ebemɔɔn, ebewal emfa e ndɛ onse lweel lɛn ongal o lɔ obewɛɛn kɛn owɛɛn. Mfam wu oli Ɔ̃fel wu abesa ɔ̃sal ondɛ.