1 Byɛ be baan, ewaa atal y’angoo a byɛ dzuun, m’emfa ki edzii Mfam, ke ngwel wɛ oyɔ ndɔɔ yi dzu. 2 «Lweel tal ye ngoo», oyɔ ngel yi ɛ̃kwel yi eli ye ndɔɔ yi élieel Nziã ndiri asa, ndiri: 3 «Kwɛn omwiĩ o yɛ okal ngesɛ bvool yɛ kal y’elaã li ela me nsie✝.»

4 Byɛ b’atal, ebee baan a byɛ mpuru owa. Kɛn ekuul bɔ m’ãtee y’ãluo ã Mfam.

5 Byɛ b’ankyal, elweel amfam a byɛ ba me nsie ŋã y’etiɔɔl ye bvɛɛ, m’otaa-taa bueel, onge b’elweel byɛ Mãsia. 6 Ebee obobɔ osa kɛn a ŋ’etal bɔ byɛ, me ndɔɔ yɛn byɛ edzii k’ewa bɔ esɛ. Esa kɛn a b’edzii Nziã ɔ̃kwal ngɔmɔ̃, onge ankyal a Mãsia. 7 Esa ɔ̃sal a byɛ y’esɛ kieel, onge bɛn byɛ ɔ̃sal a Mfam esa, ke wa baal wɛ. 8 Eyɛɛ kwɛn mbuul bwɛn a mbuul, ekal ɔ̃nkyal wuo mbuul wɛn k’ɔ̃nkyal wɛ, akieel abɔɔ furu e ndɛ ola Mfam m’obvɛ bɛn ndyam kieel amaasa.

9 Byɛ b’amfam, esa hɛ̃ emfa kiki m’ankyal a byɛ. Ebee bɔ oŋaan. Eyɛɛ wɛn byɛ y’ankyal a byɛ Mfam oli wuwu ke ywel, bvool ola ndɛ ɔ̃bɛɛ pyɛ.

10 M’osɛɛl, ekal ye mpɛn onse Mfam bvool me mpɛn a ndɛ yi eli ke ywel a mbueel. 11 Elaal ãta ã Nziã mam mbueel, kwɛn oŋɔ̃ byɛ esɛn ãnã ke nkwel ãyal m’ɔ̃pfu m’ãbi-ãbi. 12 Ke ngwel wɛ, mvel a bia-byɛ ke yi adzwaan ye baal wɛ, yi adzwaan y’ɛ̃fel mi y’okwɛn, y’ɛ̃fel mi ye mpɛn, ye mi y’omfam b’ɔ̃kiri wu empeel wu, y’ɛ̃fel mi ɛ̃bi-ɛ̃bi mi ɛ̃li mpɛ̃-a-mpɛ̃ ywel ye nsie.

13 Obobɔ, ewal ãta ã Nziã mam mbueel, kwɛn byɛ ekoo k’epio ãnã me tsoo li ebi, bvool kwɛn ke mbee a ŋ’edzwaan byɛ tiil ntɔ, byɛ ekal kɛn a tɛ. 14 Ngwanyã, esɛn ãnã: Elaal otaa-taa onge ɔ̃sii me luu, bvool elaal ãndɔɔ mã dzu onge eluɔ ki bvieel ki efoo otwel. 15 Elaal ãtsam m’ãbvɛ m’ewa Nsia yi Ngesɛ yi opi onge asimpal me ntaã. 16 M’ãndɔɔ mbueel, ewal okiool onge eluɔ ki bvieel ki esa kwɛ byɛ etɛɛl ãyuo ã mbaa mbueel m’eyuɔɔl Ɔ̃biil. 17 Ewal ekɔrɔ ki bvieel ki obvuul, y’epwel ki Ɔ̃fel, ki eli Endɔɔ e Nziã.

18 Ãlio mbueel, m’Ɔ̃fel, esa ãbuɛɛn mbueel m’emfa bwɛn a emfa m’osɔɔ b’eluɔ ye m’oluɔɔn. Obobɔ, ekal angɔ-mwiĩ, bvool ekal y’ɔ̃tɛɛ̃. Ebuɛɛn me ndɔɔ a baal ba ngel bueel. 19 Ebuɛɛn hɛ̃ me ndɔɔ a mɛ̃, kwɛn oŋɔ̃, me lio li edzweel mɛ̃ ɔ̃nywã, Nziã awa mɛ̃ Endɔɔ lɛn ebvaan mɛ̃ eyɛɛn, me ndɔɔ yi esuo baal ndɔɔ yi m’edziɔɔn yi Nsiã yi Ngesɛ y’onzɔɔ̃ bueel.

20 Me ndɔɔ a yɔ mɛ̃ ndi ntam a Nsia yi Ngesɛ onse ebwal. Ebuɛɛn me ndɔɔ yɛn mɛ̃ ngyɛɛn y’onzɔɔ̃, m’emfa kyɛn ebvaan mɛ̃ eyɛɛn.

21 Tiswik, ndɔɔ a bee wu ɔ̃tio bvool wu oli ɔ̃sal wa dzu onse Mfam, awa byɛ nsia a mɛ̃ ye m’ebesa mɛ̃, kwɛn oŋɔ̃ byɛ hɛ̃ eyɛɛ emfa ki ndi mɛ̃. 22 Tal otsɛn be ngyuɔɔl mɛ̃ byɛ ndɛ, kwɛn byɛ ebɔɔ ãnsia m’ola bee, bvool ndɛ awa byɛ mpɛn.

23 Yɔɔl kwɛn Nziã wu Taal ye Mfam a bia-byɛ Yeso-Mãsia awa andoo a dzii bueel opi, ye dzii y’okiool! 24 Yɔɔl kwɛn Nziã asio baal bueel b’adzii Mfam a bia-byɛ Yeso-Mãsia me dzii lɛn k’efa wɛ nyiĩ!