1 Okɛɛn bvoo a byɛ ye Mãsia awa byɛ mpɛn, okɛɛn dzii e ndɛ ewɛɛl byɛ, okɛɛn byɛ eli bvoo ye ndɛ m’Ɔ̃fel, okɛɛn byɛ eli ye dzii bvool ye nyiĩ a bakyɛ, 2 oŋɔ̃, esa kwɛn mɛ̃ nduul m’esɛ ŋ’ekal byɛ y’ɔ̃dzi, dzii lili, ɔ̃kwal ngɔmɔ̃ bvool ãtsam ngãmɔ̃. 3 Ebee ndɔɔ si ngamɔ̃ osa y’ongoo, wuo me ndɔɔ yi ebii dzuun li ngwel-a-ngwel. Kɛn eyɔɔl okuaal o nzuru osa kwɛn byɛ ewal bakyɛ onge b’anduru byam. 4 Yɔɔl kwɛn mbuul bwɛn a mbuul onse byɛ abee obvɛ o ndyam obii, abii hɛ̃ bo bakyɛ. 5 Ekal y’ãtsam m’éli a Yeso Mãsia onse byam:

6 Ndɛ wu áli ndyam onge Nziã,

kɛn a ndɛ k’ádzuul k’akal nsiil ye Nziã wɛ.

7 Kɛn a me ndyam, ndɛ oyɔɔl bvieel bvi éli a ndɛ,

me ndɔɔ yi akal ndyam onge ɔ̃nkyal✝,

me ndɔɔ yi akal onge baal,

bvool baal amwɛn ndɛ kɛn onge mbuul.

8 Ndɛ okueel nzuru me ndyam ŋ’esuo ndɛ lweel

tiil k’epfu, onkyam epfu li m’enkulusu.

9 Obɔ otsɛn bɛn Nziã bu andɛɛl ndɛ ke mboo yi enduru ãmboo mbueel,

bu awi ndɛ nkuun yi eli ke ywel ãnkuun mbueel.

10 M’emfa okyɛ, me nkuũ a Yeso, bvieel ebva ãbuo,

ekal ke ywel, ekal me nsie bvool ekal ke nsɛn a nsie.

11 M’emfa okyɛ bvool, ɛ̃nywã mvieel ɛ̃yɛɛn wɛn

Yeso Mãsia oli Mfam,

me ndɔɔ a lweel e Nziã wu Taal.

12 Obobɔ, andoo a dzii, onge b’ebelweel byɛ mɛ̃ tal lam lueel, ke kɛn a me lio li ndi mɛ̃ ye byɛ wɛ, ekal meba me lio lɛn mɛ̃ ke ndi ye byɛ wɛ, esuo lweel li enduru, esal me ndɔɔ obvuul o byɛ, ye bvɛ y’etiɔɔl. 13 Ke ngwel wɛ, Nziã wu asal onse byɛ kwɛn byɛ ekal y’efwa bvool ekoo k’esa ãndɔɔ mã ngesɛ m’edzii ndɛ. 14 Esa ãndɔɔ mbueel ɛ̃nduɔɔl pyɛ, ɛ̃tsuun hɛ̃ pyɛ. 15 Obobɔ, byɛ eywɛn elyal bvool ekal ankinkyam, baan a Nziã b’aywɛn a ndɔɔ yi awa mbyel onse baal b’ámaadziɔɔn bvool b’abi-abi. Onse baal obɔ, byɛ ebekaan onge ambunda onse ɔ̃kiri, 16 me ndɔɔ yɛn byɛ ebiri Endɔɔ li elaã. Oyɔ èkal ndɔɔ yi ekieel ebɔɔ mɛ̃ dzuun me tsoo li èya Mãsia, lɛn mɛ̃ k’étsuu ntiin yi ngwel wɛ, k’ési ɔ̃sal hɛ̃ wa ngwel wɛ. 17 Onkyam ŋɛn ebvaan ãkel a mɛ̃ ãtsɔɔn onge mpɔɔ yi ebvɔɔn ye yi ewa byɛ Nziã y’ɔ̃sal wu okiool o byɛ, mɛ̃ ndi y’esɛ me ndɔɔ oyɔ, bvool mɛ̃ esia mpaa ye byɛ bueel. 18 Byɛ hɛ̃, ekal y’esɛ bvool esia mpaa ye mɛ̃!

19 Mɛ̃ ndi ye kaã onse Mfam Yeso wɛn mɛ̃ èyuɔɔl byɛ Timote tswa-a-tswa, kwɛn mɛ̃ hɛ̃ nkal ye mpɛn ŋ’èbɔɔ mɛ̃ ãnsia ã byɛ. 20 Ke ngwel wɛ, mɛ̃ ke ndi ye mbuul ɔ̃kyam, wu oli ãtsam ngãmɔ̃ ye mɛ̃ bvool akɛɛ nguo taa-taa me ndɔɔ a byɛ wɛ. 21 Ke ngwel wɛ, bam bueel abebii kɛn obvɛ o bam, ke bo Yeso Mãsia wɛ. 22 Kɛn a byam eyɛɛ emfa ki ésuo Timote eliĩ ki ɔ̃sal a ndɛ, ŋ’éwi ndɛ ɔ̃tsiin a ndɛ m’otsal o Nsia yi Ngesɛ ye mɛ̃, onge muaan tsotsoo a tal. 23 Obɔ otsɛn bɛn, mɛ̃ ndi ye kaã wɛn mɛ̃ èyuɔɔl byɛ ndɛ tswa-a-tswa, ŋ’èmwɛn mɛ̃ ngesɛ emfa ki esɛn ndɔɔ a mɛ̃. 24 Mɛ̃ bvool nkiool bam onse Mfam wɛn myam hɛ̃ èya alili ŋã. 25 Mɛ̃ hɛ̃ mwɛn ngesɛ k’ebveel byɛ Epafolodite wu ndoo a mɛ̃, ndoo a mɛ̃ wu ɔ̃sal, ndoo a mɛ̃ wu eta, ntam wu éyuɔɔl byɛ mɛ̃, me ndɔɔ yi abiri mɛ̃ bvi éli a mɛ̃ ye kɔɔ e bvɛ. 26 Ke ngwel wɛ, ndɛ oli y’efua bibi ki amwɛn byɛ bueel bvool. Esi ndɛ bvool mpal me ndɔɔ yɛn byɛ eyoo ndiri ndɛ ali y’ãluu. 27 Ke yam, ndɛ ali y’ãluu bvool akaasɔɔ okwa. Kɛn a Nziã osio ndɛ nyiĩ, ke kɛn a ndɛ wɛ, ye mɛ̃ hɛ̃, kwɛn mɛ̃ mbee ãnyiĩ ãnyiĩ okal. 28 Obobɔ, mɛ̃ ngyuɔɔl byɛ ndɛ tswa-a-tswa, kwɛn byɛ esia mpaa ŋ’èmwɛn byɛ ndɛ bvool, kwɛn me mbee y’ãnyiĩ bibi okal. 29 Oŋɔ̃ eyɔɔ ndɛ y’esɛ kieel onse bvoo a bia-byɛ ye Mfam. Ekal ye bvɛɛ e baal ba m’emfa okyɛ. 30 Ke ngwel wɛ, ndɛ okaakwa me ndɔɔ ɔ̃sal a Mãsia. Ndɛ owi omwiĩ o ndɛ me ndɔɔ yi awa mɛ̃ wuaal lɛn byɛ ale k’ekoo k’ewa mɛ̃ wɛ.