1 Mɛ̃ wu Pool, mɛ̃ ndi ntam wɛn ke wu éyuɔɔl baal wɛ, wɛn hɛ̃ k’ábwel me nkuul a mbuul wɛ. Kɛn a mɛ̃ ndi ntam wu éyuɔɔl Yeso Mãsia ye Nziã wu Taal, wu áseel ndɛ wu Yeso onse b’ákwi-ákwi. 2 Mɛ̃ y’andoo bam bueel b’ali ye mɛ̃ eswɛn ɔ̃nkaan wu m’ãbvɔɔn mã nsie yi Ngalati. 3 Yɔɔl kwɛn Nziã wu Tal a bia-byɛ ye Mfam Yeso Mãsia asio byɛ nyiĩ bvool awa byɛ opi! 4 Ndɛ wu Mãsia wu áwi elaã e ndɛ me ndyam me ndɔɔ ãbi ã bia-byɛ, m’obvuul o bia-byɛ m’ɔ̃kiri wu ɔ̃bi wu, m’emfa ki édzii Nziã wu Tal a bia-byɛ. 5 Yɔɔl kwɛn alweel ndɛ ɔ̃bu nzal ɔ̃bu! Amɛn!

6 Mɛ̃ ekam bibi me ndɔɔ yi etiɔ byɛ Nziã eboo tswa-a-tswa m’onɔɔn o nsia yi ngesɛ nkyam. Ndɛ wu áti byɛ mbel me nyiĩ a Mãsia. 7 Ke yam, nsia yi ngesɛ nkyam k’eli wɛ, eli kɛn a ye baal b’alɔ byɛ ɛ̃tsab bvool adzii k’abiil Nsia yi Ngesɛ yi Mãsia. 8 Kɛn a ŋɛn mbuul otee byɛ nsia yi ngesɛ yi ekam ye yi étee bee byɛ, ekal bee myam, ekal ãnzwel ngamɔ̃ m’ãfi ywel, yɔɔl kwɛn adza mbuul ondɛ wuo ãnzwel omɔ̃ mpaan! 9 Bee tsɔɔn emeeyɛɛn yɔ, mɛ̃ bvool eyɛɛn yɔ meba ŋã wɛn, ŋɛn mbuul ngɔmɔ̃ otee byɛ nsia yi ngesɛ yi ekam ye yi éyɔɔ byɛ, yɔɔl kwɛn adza ndɛ mpaan!

10 M’emfa okyɛ, mɛ̃ ebii kwɛn baal akiool mɛ̃ wuo Nziã akiool mɛ̃? Mɛ̃ ebii kwɛn baal adzii mɛ̃? Okɛɛn mɛ̃ wu ekebii kwɛn baal adzii mɛ̃, kɛn mɛ̃ k’ekekal ɔ̃sal a Mãsia wɛ.

11 Andoo a mɛ̃, mɛ̃ eyɛɛn byɛ bam wɛn, Nsia yi Ngesɛ yi étee mɛ̃ k’éfi ola baal wɛ. 12 Ke ngwel wɛ, mɛ̃ k’éyɔɔ yɔ ola mbuul wɛ, mɛ̃ hɛ̃ k’éyio yɔ ola mbuul wɛ, kɛn a Yeso Mãsia ndyam mbuul wu áyɛɛl mɛ̃ yɔ. 13 Byɛ eyɛɛ epfuũ ki éli a mɛ̃ tsɔɔn, ŋ’ékenɔɔn mɛ̃ onkɔɔ b’Ayuda. Byɛ eyɛɛ emfa ki éketuaal mɛ̃ Ebvɔɔn e Nziã mpal yam bibi, bvool ékesa kwɛn lɔ etsɔɔn. 14 Onse onɔɔn b’onkɔɔ b’Ayuda, mɛ̃ ékenduru baal bibi b’áli nsiil ye mɛ̃, onse nki-nkii yi mɛ̃. Ke ngwel wɛ, mɛ̃ ékenduru bɔ m’ebal ki ãndɔɔ m’ãtal onkɔɔ b’ankiɔɔn a mɛ̃. 15 Kɛn a Nziã ásueel mɛ̃ fa mwiĩ a ngoo a mɛ̃, bvool onse nyiĩ a ndɛ, ndɛ áti mɛ̃ mbel. 16 Ndɛ ámwɛn ngesɛ k’asuo mɛ̃ Muaan a ndɛ kwɛn mɛ̃ ntee Nsia a ndɛ yi Ngesɛ ola baal bɛn k’Ayuda wɛ. Mɛ̃ ke mbii luo ola mbuul si ngɔmɔ̃ wɛ. 17 Mɛ̃ hɛ̃ ke ngyɛn onkyam Yelusalem ola b’áli antam ɛ̃kwel ɛ̃ mɛ̃ wɛ. Kɛn alili oŋɔ̃, mɛ̃ ngyɛn nsie yi Alabi, ke mbee oŋɔ̃ mɛ̃ mvool nsie yi Damas. 18 Ke mbee a mvel tyel, mɛ̃ ngyɛn Yelusalem, kwɛn bia-Piɛɛl* eyɛɛ bakyɛ. Mɛ̃ nsi ãtsoo kuun y’ãtaan ola ndɛ. 19 Mɛ̃ ke mwɛn ntam ɔ̃kyam wɛ, wu mwɛn mɛ̃ kɛn a Dzak wu muaan-ngoo a Mfam. 20 Mɛ̃ eyɛɛn yɔ ke nkwel a Nziã, ãndɔɔ m’ekel mɛ̃ byɛ mã, ãli mam taa-taa, mɛ̃ k’epfuru wɛ.

21 Ke mbee oŋɔ̃, mɛ̃ ngyɛn m’etswi e nsie ki Sili ye ki Silisi. 22 Ŋ’esa oŋɔ̃, baal b’ãbvɔɔn ã Mãsia mã nsie yi Yude ale kɛn amwɛn mɛ̃ me mviil wɛ. 23 Kɛn a bɔ áyoo baal ayɛɛn ndiri: «Mbuul wɛn tsɔɔn áketuaal bia-byɛ mpal, meba ŋã oyii abetsal Nsia yi Ngesɛ yi okiool b’ékebii ndɛ obam.» 24 Obobɔ, bɔ ákelweel Nziã me ndɔɔ a mɛ̃.