1 Tal ãnkuũ m'ankiɔɔn a Yeso-Mãsia: David oli nkiɔɔn a Yeso-Mãsia, Abalayam oli nkiɔɔn a David. 2 Abalayam oburu Isak. Isak oburu Dzakab. Dzakab oburu Yuda ye baan-ngoo a ndɛ. 3 Yuda oburu Pales ye Dzala, ngoo a bɔ Tamaal. Pales oburu Esilom. Esilom oburu Alam. 4 Alam oburu Aminadab. Aminadab oburu Naasɔ̃. Naasɔ̃ oburu Saleman. 5 Saleman oburu Boodze, ngoo a Boodze Lahab. Boodze oburu Obed, ngoo a Obed Lut. 6 Obed oburu Dzwese. Dzwese oburu ɔ̃kwɛn David.

David oburu Salomɔ̃, ngoo a Salomɔ̃ wu áli ɔ̃kal a Uli. 7 Salomɔ̃ oburu Loboham. Loboham oburu Abiya. Abiya oburu Asaf. 8 Asaf oburu Dzodzafat. Dzodzafat oburu Yolam. Yolam oburu Odzias. 9 Odzias oburu Yohatam. Yohatam oburu Akadze. Akadze oburu Edzekias. 10 Edzekias oburu Manase. Manase oburu Amose. Amose oburu Yosias. 11 Yosias oburu Yekonia ye baan-ngoo a ndɛ. Me lio olɔ, li ábiri baan b'Isalayel m'ãnkɔɔl k'ɔ̃kiri wa Babilon.

12 Ke mbee a k'ábiri bɔ m'ãnkɔɔl k'ɔ̃kiri wa Babilon, Yekonia oburu Salatyel. Salatyel oburu Yolobabel. 13 Yolobabel oburu Abihud. Abihud oburu Eliakim. Eliakim oburu Adzɔɔl. 14 Adzɔɔl oburu Sadok. Sadok oburu Akim. Akim oburu Elihud. 15 Elihud oburu Elehadzaal. Elehadzaal oburu Matan. Matan oburu Dzakab. 16 Dzakab oburu Dzodzef wu ɔ̃lam a Mali. Mali oli ngoo a Yeso wu ata me Mãsia.

17 M'emfa okyɛ, bɛɛn Abalayam tiil David, ãyam ã baal ã́bwel kuun y'ãnã (14). Bɛɛn David tiil k'ábiri baal a Yuda m'ãnkɔɔl k'ɔ̃kiri wa Babilon, ãyam ã baal ã́bwel kuun y'ãnã (14). Bɛɛn hɛ̃ tal olɔ tiil lio li Yeso, ãyam ã baal ã́bwel kuun y'ãnã (14).

18 Tal emfa ki áburu Yeso. Mali wu ngoo a ndɛ áli ɔ̃kaal wu ésɔɔn Dzodzef me ndɔɔ obaal o ndɛ. Kɛn a ye k'ebvool bɔ ntal, Mali obvi yam me waan li Ɔ̃fel wu Ɔ̃nsensal. 19 Dzodzef wu ɔ̃lam a ndɛ, áli mbuul wa dzu. Ndɛ k'ádzii k'afɛn ndɛ ke nkwel a baal wɛ. Ndɛ okuru k'abee ndɛ embeel-a-mwiĩ. 20 Ŋ'éketsam ndɛ obobɔ, ãnzwel ã Mfam Nziã ãpal ola ndɛ m'ɔ̃tswɛ a twal, ãlieel ndɛ ndiri: «Dzodzef, ɔ̃tiɔɔl a David, oyɛɛ ke bal k'abaal Mali wɛ. Ke ngwel wɛ, waan li Ɔ̃fel wu Ɔ̃nsensal li esi kwɛn ndɛ abva yam olɔ. 21 Ndɛ àburu muaan wu bɔɔl wu èloo yɛ me Yeso. Ke ngwel wɛ, ndɛ kieel wu apaal baal a ndɛ onse ãbi ã bɔ.»

22 Ãndɔɔ omɔ̃ mam mbueel ãbwel m'emfa okyɛ, me ndɔɔ yi asa m'élieel Mfam m'ɔ̃nywã wu ɔ̃liaal-ɛ̃kiɛɛn a ndɛ ndiri: 23 «Tal, nsam a ɔ̃kaal ngɔmɔ̃ wɛn k'ayɛɛ abɔɔl wɛ akieel abva yam. Ndɛ akieel aburu muaan wu bɔɔl wu akieel ata m'Emanuɛɛn, ŋ'ayɛɛn ndiri: "Nziã oli ye bia-byɛ✝."» 24 Ŋ'esiool Dzodzef, ndɛ osi b'etam ãnzwel ã Mfam ndɛ osa: Ndɛ owel ɔ̃kal a ndɛ Mali oyekal ye ndɛ. 25 Kɛn a ndɛ k'abvool ntal ye Mali wɛ tiil ye k'eburu ndɛ muaan wu bɔɔl. Dzodzef oloo ndɛ me Yeso.