Mateus 23

Yeso odzuru ayiool b'ãngel y'Afalisaye ãtswi

1 Obobɔ, Yeso olieel embuul e baal y'ayio a ndɛ bubu: 2 «Ayiool b'ãngel y'Afalisaye, ɔ̃sal a bɔ wu abeyiool baal Ngel a Moyize. 3 Obobɔ, esa bvool elweel ãndɔɔ mam mbueel m'eyɛɛn bɔ byɛ. Kɛn a byɛ ebee epfuũ e bɔ onɔɔn. Ke ngwel wɛ, bɔ k'abesa m'ebeyiool bɔ wɛ. 4 Bɔ abekuru ãpfuũ m'ãli y'olyam, mã ye mpal m'obiri, bvool abendɔɔl baal mɔ̃ nkal esɔɔ̃. Kɛn a bam k'adzii k'anywɛn a mɔ̃ si ekal me nswɛɛ a ɔ̃liɛɛn wɛ. 5 Ɛ̃sal ɛ̃ bɔ mvieel, bɔ abesa myɛ̃ kwɛn baal atal bɔ. Obobɔ, bɔ abelweel okuun o baan b'ãnkab ã bɔ m'ãli y'ãndɔɔ ã Nziã onse mwiĩ. Bɔ hɛ̃ asuul ãnswɛɛ m'ekɔ ã bɔ m'ãla. 6 Bɔ adzii ãmboo mã dzuun k'ãpfuun, bɔ hɛ̃ adzii ãmboo mã nkwel onse ãnzɔ m'ãbuɛɛn. 7 Bɔ adzii kwɛn abio bɔ ke taan, bvool kwɛn ata bɔ "m'Atee". 8 Kɛn a byɛ, yɔɔl kwɛn abee byɛ "m'Atee" ota. Ke ngwel wɛ, byɛ Ɔ̃tee oli kɛn a ngɔmɔ̃, byɛ bam bueel hɛ̃ eli baan-ngoo. 9 Oyɛɛ k'eta mbuul me "Taal" me nsie wɛ, ke ngwel wɛ byɛ Tal oli kɛn a ngɔmɔ̃, Taal wa ke ywel. 10 Yɔɔl kwɛn abee byɛ ota "m'Amfam". Ke ngwel wɛ, byɛ Mfam oli kɛn a ngɔmɔ̃, Mfam ondɛ Mãsia. 11 Mbuul wu onduru bakyɛ onse byɛ àkal ɔ̃sal a byɛ. 12 Mbuul wu àndɛɛl nzuru, àkuaal ndɛ, kɛn a wu àkuaal nzuru, àndɛɛl ndɛ.»

Pfuru li amfam

13 Yeso bvool olieel ndiri: «Ãwua ola byɛ, byɛ b'ayiool b'ãngel y'Afalisaye, baal a pfuru! Byɛ ekuru baal nkuul a Okwɛn o ywel, byam bam hɛ̃ k'esam onse bɔ wɛ. B'adzii k'asam bɔ, byɛ ekii bɔ.

[ 14 Ãwua ola byɛ, byɛ b'ayiool b'ãngel y'Afalisaye, baal a pfuru! Ke ngwel wɛ, byɛ ebekuaal eluɔ bvi akaal b'apfiil, byɛ ebesa ãbuɛɛn m'ãla-m'ãla, me ndɔɔ yi epfuru baal. M'emfa okyɛ, Nziã akieel awa byɛ etumbu ki enduru ki baal b'asiil mpuru.]

15 Ãwua ola byɛ, byɛ b'ayiool b'ãngel y'Afalisaye, baal a pfuru! Byɛ edzuu ãmboo mbueel me nsie y'ãdza m'ɔ̃ngwa, kwɛn byɛ ebɔɔ onkyam mbuul ngɔmɔ̃ wu akiool onkɔɔ o byɛ. Ŋ'ebɔɔ byɛ ndɛ, byɛ bvool esuul ndɛ mbuul wa ywɛn e mbaa, wu onduru byam m'obi nsa yuaal.

16 Ãwua ola byɛ, byɛ b'ambiri b'ɛ̃kwa-mviil! Byɛ etɔ m'oyɛɛn wɛn: "Okɛɛn mbuul olab ɔ̃kyel me nkuũ a Nzɔ a Nziã, k'esa ndɔɔ wɛ. Kɛn a mbuul wu alab ɔ̃kyel me nkuũ a ɔɔl li eli onse Nzɔ a Nziã, ebvaan ndɛ asa ndɔɔ yi elab ndɛ ɔ̃kyel." 17 Ewool e baal! Ɛ̃nkwa-mviil! Eluɔ ki enduru ɔ̃bvɛn emã, ɔɔl wuo Nzɔ a Nziã yi esuul ɔɔl olɔ li ngel? 18 Byɛ etɔ m'oyɛɛn bvool wɛn: "Okɛɛn mbuul olab ɔ̃kyel me nkiin yi awa Nziã kab, k'esa ndɔɔ wɛ. Kɛn a mbuul wu alab ɔ̃kyel me kab li eli nkal a nkiin yi awa Nziã kab, ebvaan ndɛ asa ndɔɔ yi elab ndɛ ɔ̃kyel." 19 Ɛ̃nkwa-mviil! Eluɔ ki enduru ɔ̃bvɛn emã, kab wuo nkiin yi awa Nziã kab yi esuul kab olɔ li ngel? 20 Ke ngwel wɛ, mbuul wu alab ɔ̃kyel me nkiin yi awa Nziã kab, ŋ'alab ɔ̃kyel me nkiin ye bvieel bvi eli nkal a yɔ. 21 Mbuul wu alab ɔ̃kyel me Nzɔ a Nziã, ŋ'alab ɔ̃kyel me Nzɔ a Nziã ye Nziã wu oli onse yɔ. 22 Mbuul wu alab ɔ̃kyel me ywel, ŋ'alab ɔ̃kyel me kiri li Okwɛn o Nziã ye Nziã wu obvi nsɛn nkal a lɔ.

23 Ãwua ola byɛ, byɛ b'ayiool b'ãngel y'Afalisaye, baal a pfuru! Byɛ ebewa Nziã boo ngemɔ̃ onse ãboo kuun li ekwɛn bvi ãnguun bvi: mɛnte, fenuye ye Kumin. Kɛn onse Ngel a Moyize, byɛ ebedzɛɛn ãndɔɔ mã nkiin mã: okal dzu, nyiĩ, y'okiool. Omɔ̃ ãndɔɔ mɛn ebvaan byɛ ekeesa, m'ãsiil odzɛɛn wɛ.

24 Ambiri b'ɛ̃nkwa-mviil! Byɛ ebekyal ãdza me ndɔɔ yi embaal tob, kɛn a byɛ ebemɛn nyam wu ɔ̃mbiri ãpfuũ wu ata me swamo!

25 Ãwua ola byɛ, byɛ b'ayiool b'ãngel y'Afalisaye, baal a pfuru! Byɛ ebesuɔɔl mbiɔ ye saan onkwel-a-nzi, kɛn a onse mwiĩ, bvɛ eluul m'eluɔ e pfuul y'efua bvi ebi-ebi! 26 Ɔ̃falisaye wu ɔ̃nkwa-mviil! Ŋ'ɛ̃kwel kɛn, suɔɔl mbiɔ onse mwiĩ, m'emfa okyɛ mbee a mbiɔ hɛ̃ èkal tsɛ-tsɛ.

27 Ãwua ola byɛ, byɛ b'ayiool b'ãngel y'Afalisaye, baal a pfuru! Ke ngwel wɛ, byɛ eli onge ãmpiɛɛn m'ákel eyuɛ̃, mɛn onkwel-a-nzi ãsuo obvie, kɛn a onse mwiĩ ãluul m'ɛ̃ywee ɛ̃ b'ákwi-ákwi ye mbiin yi emfa bwɛn emfa. 28 Emfa kiki hɛ̃, onkwel-a-nzi byɛ esuo kwɛn byɛ baal ba dzu ke mviil ã baal, onse mwiĩ byɛ eluul me pfuru y'ãndɔɔ m'ãbi.

29 Ãwua ola byɛ b'ayiool b'ãngel y'afalifaye, baal a pfuru! Ke ngwel wɛ, byɛ ebeboo ãmpiɛɛn m'aliaal-ɛ̃kiɛɛn a Nziã, bvool ebefaal mã baal ba dzu. 30 Byɛ etɔ m'oyɛɛn wɛn: "Okɛɛn bee éli me lio li ankiɔɔn a bee, kɛn bee k'ékeebvɔɔn ye bɔ m'otsal b'ãkel m'aliaal-ɛ̃kiɛɛn a Nziã wɛ." 31 Ŋ'eyɛɛn byɛ obobɔ, byam ŋ'esuo kwɛn byɛ eli atiɔɔl a baal b'ábam aliaal-ɛ̃kiɛɛn a Nziã. 32 Obobɔ, embɛɛl ɔ̃sal wu ébɛɛn ankiɔɔn a byɛ osa! 33 Byɛ antaal eli, yam li ampel! Emfa emã ki etsam byɛ wɛn byɛ ol'ekoo k'ebal etumbu ki ywɛn e mbaa? 34 Obɔ otsɛn bɛn, mɛ̃ ndyam ekieel eyuɔɔl byɛ aliaal-ɛ̃kiɛɛn, y'ãnga-ãyal, y'ayiool b'ãngel. Byɛ ekieel ebɛɛl bakyɛ m'enkulusu bvool ebam bɔ, epfel bakyɛ ɔ̃dzii onse ãnzɔ m'ãbuɛɛn ã byɛ, bvool etuaal bɔ mpal me bviil bwɛn a bviil. 35 Obobɔ, ãkel m'ankinkyam mbueel m'étsal byɛ me nsie ãbva nkal ɛ̃tswɛ ɛ̃ byɛ, bɛɛn m'ãkel m'Abɛl wa dzu tiil mã Dzakali, wu muaan a Balaki, wu ébam byɛ mpɛ̃-a-mpɛ̃ a nkiin yi awa Nziã ãkab ye Nzɔ a Nziã. 36 Taa-taa bam, mɛ̃ eyɛɛn byɛ wɛn, etsob okyɛ èbva nkal a baal ba nɔnɔ̃ ba!»

Ãwua ã Yeso me ndɔɔ a Yelusalem

37 Yeso bvool olieel ndiri: «Aa, baal a Yelusalem! Baal a Yelusalem! Byɛ b'ebebam aliaal-ɛ̃kiɛɛn a Nziã, b'ebetyal baal b'eyuɔɔl Nziã byɛ ãnkɔɔn! Nsa kwɛ yi édzii mɛ̃ k'ebvool byɛ tsotsoo a mɛ̃ onge b'epfee nswee baan onse ãpab! Kɛn a byɛ k'édzii obobɔ wɛ. 38 Oŋɔ̃, nzɔ a byɛ, ŋ'esiil ndii. 39 Ke ngwel wɛ, mɛ̃ eyɛɛn byɛ wɛn, byɛ k'èbemwɛn mɛ̃ bam wɛ, tiil lio li ekieel eyɛɛn byɛ ndiri: "Yɔɔl kwɛn wu àya me nkuũ a Mfam akal y'ondɔɔl o kuɔɔl!"»

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?