1 «Obobɔ, Okwɛn o ywel òkal m'emfa ki: Ãnsam m'akaal kuun áwel ambunda a bɔ me ndɔɔ yi ayemwɛɛn y'ɔ̃baal. 2 Onse bɔ, ataan áli ewool, ataan áli anga-ãyal. 3 B'ewool awel ambunda a bɔ, k'ayɛɛl mbaal wɛ. 4 Kɛn anga-ãyal awel ambunda, ye mbaal mãkyɛ m'ɛ̃langa*. 5 Onge bɛn ɔ̃baal ákeyiil m'oya, ãnsam m'akaal omɔ̃ mbueel twal epuo, bu ayiool me twal. 6 Nkal a kuku, abiool ndiri: "Ɔ̃baal oyi, epal eyeyɔɔ ndɛ!" 7 Obobɔ, ãnsam m'akaal omɔ̃ mbueel ãsiool me twal, bu ãbvi ambunda a bɔ ofaal. 8 B'ewool asɔɔ ol'anga-ãyal ndiri: "Emeewa bee mbaal ã byɛ ãkyɛ, ke ngwel wɛ bee ambunda ayii adzam!" 9 Anga-ãyal abveel bɔ ndiri: "Hɛɛ̃-hɛ̃, k'obobɔ wɛ! Ke ngwel wɛ, mbaal olɔ k'ãkoo me bee ye byɛ wɛ. Eyi ola b'atiɔ mɔ̃, eyesuun mã byam." 10 Kɛn a ŋ'eyii eyi ewool mbaal osuun, ɔ̃baal otɔ. B'áli ye mbaal ã bɔ asam onse mboo yi asa bal, edzoo e nzɔ, bu awɔɔl. 11 Ke mbee oŋɔ̃, ãnsam m'akaal mãkyɛ omɔ̃ ãtɔ hɛ̃, bu ãbiool ndiri: "Mfam, Mfam dzweel bee nzɔ!" 12 Kɛn ɔ̃baal obveel bɔ ndiri: "Taa-taa bam, mɛ̃ eyɛɛn byɛ wɛn, mɛ̃ ke ngyɛɛ byɛ wɛ."» 13 Yeso bu alweel ndiri: «Oŋɔ̃, ekal angɔ-mwiĩ! Ke ngwel wɛ, byɛ k'eyɛɛ tsoo wɛ, k'eyɛɛ lio hɛ̃ wɛ.»

14 «Okwɛn o ywel okieel okal m'emfa ki: Mbuul ngɔmɔ̃ abooyi odzuu, oti asal a ndɛ mbel, bu awi bɔ opfel o ndɛ otal. 15 Ndɛ owi ngɔmɔ̃ nzi yi ãbvieel mã ɔɔl ɛ̃nkam ɛ̃taan (500), wukyɛ ndɛ owi ɛ̃nkam mviaal (200), wu atyel ndɛ owi ɔ̃nkam (100). Ndɛ owi mbuul bwɛn a mbuul m'emfa kyɛn ndɛ okoo k'asa me nzi oyɔ. Ndɛ bu ayɛn odzuu. 16 Tswa-tswa oŋɔ̃, ɔ̃sal wu abɔɔ nzi yi ãbvieel ɛ̃nkam ɛ̃taan (500) oyɛn oyesa obɔɔ̃ me nzi oyɔ, bu abɔɔ ɔ̃ndɔɔl wa nzi yi ãbvieel ɛ̃nkam ɛ̃taan (500). 17 Ɔ̃sal wu abɔɔ nzi yi ãbvieel ɛ̃nkam mviaal (200) osi emfa kiki, bu abɔɔ ɔ̃ndɔɔl wa nzi yi ãbvieel ɛ̃nkam mviaal (200). 18 Me b'otal ɔ̃sal wu abɔɔ nzi yi ãbvieel ɔ̃nkam (100), ndɛ otsam ywɛn onse nsie, bu akwee nzi e mfam a ndɛ.»

19 «Ke mbee a lio li ela, mfam a asal obɔ oyebvool. Ndɛ ofuul bɔ ki esi bɔ me nzi e ndɛ. 20 Ɔ̃sal wu abɔɔ nzi yi ãbvieel ɛ̃nkam ɛ̃taan (500) oyi, osuo ɔ̃ndɔɔl wa nzi yi ãbvieel ɛ̃nkam ɛ̃taan (500) wu ebɔɔ ndɛ, y'ãyɛɛn m'ɔ̃nywã ndiri: "Mfam, yɛ awi mɛ̃ nzi yi ãbvieel ɛ̃nkam ɛ̃taan (500), mɛ̃ mbɔɔ ɔ̃ndɔɔl wa nzi yi ãbvieel ɛ̃nkam ɛ̃taan (500), yɔ bu." 21 Mfam a ndɛ olieel ndɛ ndiri: "Ngesɛ, yɛ li ɔ̃sal wu ɔ̃bvɛ bvool wa ye lweel! Yɛ suo kwɛn yɛ li dzu me ndɔɔ yi nsi-nsiri. Obobɔ, mɛ̃ èsuul yɛ mfam wu atal ãndɔɔ m'ãnɛn. Oŋɔ̃ sam onse esɛ e mfam a yɛ." 22 Ɔ̃sal wu abɔɔ nzi yi ãbvieel ɛ̃nkam mviaal (200) oyi, osuo ɔ̃ndɔɔl wa nzi yi ãbvieel ɛ̃nkam mviaal (200) wu ebɔɔ ndɛ, y'ãyɛɛn m'ɔ̃nywã ndiri: "Mfam, yɛ awi mɛ̃ nzi yi ãbvieel ɛ̃nkam mviaal (200), mɛ̃ mbɔɔ ɔ̃ndɔɔl wa nzi yi ãbvieel ɛ̃nkam mviaal (200), yɔ-bu." 23 Mfam a ndɛ olieel ndɛ ndiri: "Ngesɛ, yɛ li ɔ̃sal wu ɔ̃bvɛ bvool wa ye lweel! Yɛ suo kwɛn yɛ li dzu me ndɔɔ yi nsi-nsiri. Obobɔ, mɛ̃ èsuul yɛ mfam wu atal ãndɔɔ m'ãnɛn. Oŋɔ̃ sam onse esɛ e mfam a yɛ." 24 Ke mbee oŋɔ̃, ɔ̃sal wu abɔɔ nzi yi ãbvieel ɔ̃nkam (100) oyi, y'ãyɛɛn m'ɔ̃nywã ndiri: "Mfam, mɛ̃ ngyɛɛ wɛn yɛ li mbuul wa ye mviil mpɛn, ke ngwel wɛ yɛ atsam ke mboo yɛn yɛ k'akwɛn wɛ, yɛ aka nsia ke mboo yɛn yɛ k'akwɛn wɛ. 25 Obobɔ, mɛ̃ ngyoo buɔ, bu ngyɛn ye nkwee nzi e yɛ onse nsie. Nzi e yɛ yɔ-bu, wal." 26 Mfam a ndɛ obveel ndɛ bubu: "Ɔ̃sal wu ɔ̃bi bvool wa y'obwal! Yɛ ayɛɛ wɛn mɛ̃ wu etsam ke mboo yɛn mɛ̃ k'ekwɛn wɛ, mɛ̃ hɛ̃ wu eka nsia ke mboo yɛn mɛ̃ k'ekwɛn yɔ wɛ, 27 ke yɛ abee nzi e mɛ̃ ke nzɔ yi abekwɛɛ nzi oyesuul emã? Yɛ okɛɛn asi obobɔ, ŋemvool mɛ̃ ŋã, kɛn mɛ̃ ekeewal nzi e mɛ̃ y'ɔ̃ndɔɔl! 28 Oŋɔ̃ ewɛɛl ndɛ nzi yi ãbvieel ɔ̃nkam (100) oyɔ, ewa yɔ ola wu oli ye nzi yi ãbvieel ɛ̃nkam kuun (1.000). 29 Ke ngwel wɛ, mbuul wu oli ndyam y'eluɔ, àlweel ndɛ bvikyɛ, kwɛn ndɛ abɔɔ bvi enduru ɔ̃ndel. Kɛn a wɛn kyam pyɛ, àmbaal onkyam k'emã-mã ki eli a ndɛ. 30 Me b'otal ɔ̃sal wu empwɛɛn, etyal ndɛ onse empeel li nkwel-a-nzi. Oyɔ mboo yi ekieel ekal y'elel y'odza o miin."»

31 «Ŋ'ekieel eya Muaan a mbuul onse omfam o ndɛ y'ãnzwel mbueel, ndɛ akieel abva nsɛn nkal a kiri e ndɛ li Okwɛn li dzuun. 32 Ãyam ã baal b'ɔ̃kiri a nsie wueel ãkieel ãbvɔɔn ke nkwel a ndɛ. Obobɔ, ndɛ akieel akab baal ebaal bviaal, onge ɔ̃mbuaal-anywam wu akab emɛ̃mɛɛ̃ y'antab. 33 Ndɛ akieel asuul emɛ̃mɛɛ̃ me kuɔɔl e ndɛ ki elam, antab me ki ekal. 34 Obobɔ, ɔ̃kwɛn akieel aliaal baal b'ali me kuɔɔl e ndɛ ki elam ndiri: "Eya, byɛ baal b'ebɔɔ ondɔɔl o kuɔɔl o Tal a mɛ̃, ewal Okwɛn b'éyɛɛl ndɛ byɛ fa k'ábuo ɔ̃kiri. 35 Ke ngwel wɛ, mɛ̃ éli ye nzal, byɛ éwi mɛ̃ bvi-odza. Mɛ̃ éli ye nzuaal, byɛ éwi mɛ̃ ãdza. Mɛ̃ éli ɔ̃nzii, byɛ éyɔɔ mɛ̃ ola byɛ. 36 Mɛ̃ éli odzuũ, byɛ éwi mɛ̃ ekɔ. Mɛ̃ éli y'ãluu, byɛ éwueel a mɛ̃. Mɛ̃ éli onse bwal, byɛ éyi mɛ̃ otal." 37 Obobɔ, baal ba dzu akieel abveel ndɛ ndiri: "Ke Mfam, tsoo emã li émwɛn bee yɛ áli ye nzal, bee bu ewi yɛ bvi-odza, wuo li éli yɛ ye nzuaal, bee bu ewi yɛ ãdza? 38 Tsoo emã li émwɛn bee yɛ áli ɔ̃nzii, bee bu eyɔɔ yɛ ola bee, wuo li éli yɛ odzuũ, bee bu ewi yɛ ekɔ? 39 Tsoo emã li émwɛn bee yɛ y'ãluu, wuo onse bwal, bee bu eyi yɛ otal?" 40 Ɔ̃kwɛn akieel abveel bɔ ndiri: "Taa-taa bam, mɛ̃ eyɛɛn byɛ wɛn, nsa yueel yi ési byɛ obobɔ me ngɔmɔ̃ wu obvool mbee onse baan-ngoo a mɛ̃ ba, ŋ'ési me mɛ̃."»

41 «Ke mbee oŋɔ̃, ɔ̃kwɛn akieel aliaal b'akieel akal me kuɔɔl e ndɛ ki ekal ndiri: "Embal, esyal lala ye mɛ̃, byɛ baal b'ápuul! Eyi onse mbaa yɛn k'edzam wɛ, yi áyɛɛl me ndɔɔ a ɔ̃pfu y'ãnzwel ã ndɛ! 42 Ke ngwel wɛ, mɛ̃ éli ye nzal, byɛ k'éwi mɛ̃ bvi-odza wɛ. Mɛ̃ éli ye nzuaal, byɛ k'éwi mɛ̃ ãdza wɛ. 43 Mɛ̃ éli ɔ̃nzii, byɛ k'éyɔɔ mɛ̃ ola byɛ wɛ. Mɛ̃ éli odzuũ, byɛ k'éwi mɛ̃ ekɔ wɛ. Mɛ̃ éli y'ãluu bvool éli onse bwal, byɛ k'éyi mɛ̃ otal wɛ." 44 Obobɔ, bɔ hɛ̃ akieel abveel ndɛ ndiri: "Mfam, tsoo emã li émwɛn bee yɛ áli ye nzal, wuo áli ye nzuaal, wuo áli ɔ̃nzii, wuo áli odzuũ, wuo áli y'ãluu, wuo áli onse bwal, bee bu ebee yɛ owuaal?" 45 Ɔ̃kwɛn akieel abveel bɔ ndiri: "Taa-taa bam, mɛ̃ eyɛɛn byɛ wɛn, nsa yueel yɛn byɛ k'ési obobɔ me ngɔmɔ̃ onse b'abvool mbee ba wɛ, ŋɛn k'ési me mɛ̃ wɛ." 46 Obobɔ, bɔ obɔ akieel ayi k'etumbu ki ɔ̃bu. Kɛn a baal ba dzu akieel ayi k'elaã li ɔ̃bu nzal ɔ̃bu.»