1 Ŋ’eti Yeso ayio a ndɛ kuun ye buaal mbel, ndɛ owi bɔ waan li atswɛɛl ɛ̃fel mi ɛ̃bi-ɛ̃bi, bvool aboo ãluu mbueel y’elyam bvieel. 2 Tal ãnkuũ m’antam kuun ye buaal: wu ɛ̃kwel Simɔ̃ wu ata me Piɛɛl, y’Andele wu muaan-ngoo a ndɛ, ye Dzak wu muaan a Dzebede, ye Dzaã wu muaan-ngoo a ndɛ, 3 ye Filipe, ye Balatelemi, ye Toma, ye Matie wu ɔ̃twal-mpal, ye Dzak wu muaan a Alefe, ye Tade, 4 ye Simɔ̃ wa nkel yi Adzelot, ye Yuda wu Isikaliot wu átiɔ Yeso.

5 Yeso otam baal ange-kuun ye buaal obɔ, bu awi bɔ ãluo y’ãnkunkwa mã: «Ebee ola baal bɛn k’Ayuda wɛ oyi, ebee hɛ̃ onse bviil li Afi-Samali osam. 6 Eyi ol’emɛmɛɛ̃ bvi nzɔ a Isalayɛl bvi edziɔɔn. 7 Me nkuul a nkuul, eyi etee wɛn Okwɛn o ywel osyel tsotsoo. 8 Eboo ba y’ãluu, eseel b’ákwi, esuul ba y’ãluu me leba akal tsɛtsɛ, etswɛɛl ɛ̃fel mi ẽbi-ẽbi. Awi byɛ ngwel, ewa hɛ̃ ngwel. 9 Ebee ɔɔl obiri, ekal nzi, ekal nzi yi ãbvieel, onse posi. 10 Ebee ɔ̃paa a dzwɛ obiri, ekal ekɔ bviaal, ekal asimpal, ekal ɔ̃mpaã, ke ngwel wu asal obvaan k’abɔɔ bvi-odza e ndɛ.»

11 «Onse bviil lam lueel wuo onse ola bam bueel b’èsam byɛ, efuul mbuul wu obvaan m’oyɔɔ o byɛ, oŋɔ̃ ekal ola ndɛ tiil ye k’eyi byɛ. 12 Ŋ’èsam byɛ onse nzɔ, ebio baal a nzɔ oyɔ. 13 Okɛɛn bɔ ayɔɔ byɛ, opi o byɛ òkal ye bɔ. Okɛɛn bɔ k’ayɔɔ byɛ wɛ, opi o byɛ òkɔɔl ola byam. 14 Okɛɛn, onse nzɔ ngamɔ̃ wuo onse bviil ngelemɔ̃, k’ayɔɔ byɛ wɛ, wuo k’ayoo ãyɛɛn ã byɛ, embal oŋɔ̃ bvool ekweel ɔ̃fel a ntaã e byɛ. 15 Taa-taa bam, mɛ̃ eyɛɛn byɛ wɛn, me tsoo li ètsiil Nziã ãndɔɔ ã baal, fool li baal a Sodome ye Gomɔɔl ekieel ekal nkuual-a-nkuaal a fool li baal b’ãmboo omɔ̃.»

16 Etal, mɛ̃ ngyuɔɔl byɛ onge emɛmɛɛ̃ onse anyam a mpuru*: Ekal angɔ-mwiĩ onge antaal, ekal ankinkyam onge ãkuun. 17 Ekal y’onkyab, ke ngwel wɛ baal akieel abiri byɛ k’ãmbal m’ãnɛn m’Ayuda bvool apfel byɛ ɔ̃dzii onse ãnzɔ ã bɔ m’ãbuɛɛn. 18 Akieel abiri byɛ ke nkwel ambiri y’akwɛn, me ndɔɔ a mɛ̃. Obobɔ, byɛ ekieel eyɛɛn me ndɔɔ a mɛ̃ ke nkwel a bɔ bvool ke nkwel a baal bɛn k’ayɛɛ Nziã wɛ. 19 Ŋ’akieel abiri byɛ k’ãmbal, ebee nguo okɛɛ me b’èyɛɛn byɛ wuo m’emfa ki eyɛɛn byɛ. Ke ngwel wɛ, kɛn a me lio alili, Nziã ndyam akieel awa byɛ ãyɛɛn m’èyɛɛn byɛ. 20 Ke ngwel wɛ, byɛ ke b’ekieel eyɛɛn wɛ, Ɔ̃fel a Tal a byɛ wu akieel ayɛɛn onse byɛ.

21 «Muaan-ngoo akieel atiɔ muaan-ngoo kwɛn abam ndɛ. Tal akieel atiɔ muaan. Baan akieel akal ataal a tal ye ngoo, bvool akieel asa kwɛn awa bɔ etumbu ki lepfu. 22 Baal bueel akieel abyal byɛ me ndɔɔ a nkuũ a mɛ̃. Kɛn a wu akieel akuru ɔ̃kwal tiil ntɔ, wu akieel abvuul.»

23 «Ŋ’akieel atuaal byɛ mpal onse bviil ngelemɔ̃, ebal onse likyɛ. Taa-taa bam, mɛ̃ eyɛɛn byɛ wɛn, ye k’eya Muaan a mbuul, byɛ olɔ kɛn eman k’edziɔɔn ãbviil mbueel m’Isalayel wɛ.»

24 «Ɔ̃yio k’anduru ɔ̃yiool a ndɛ wɛ, ɔ̃nkyal hɛ̃ si ngɔmɔ̃ wu onduru mfam a ndɛ pyɛ. 25 Ki ebvaan m’ɔ̃yio, ki àkal onge ɔ̃yiool a ndɛ, ki ebvaan m’ɔ̃nkyal hɛ̃ ki àkal onge mfam a ndɛ. Okɛɛn mfam a nzɔ ati me Beledzebule, oŋɔ̃ yɛn k’àyɛɛn me baal a nzɔ a ndɛ wɛ mã!»

26 «Obobɔ, ebee ye buɔ o baal okal, ke ngwel wɛ ndɔɔ yam yueel yi eli m’odziɔɔn ekieel epal kal-a-kal. Ndɔɔ yam yueel hɛ̃ yi eli m’ofoo, akieel ayɛɛ yɔ. 27 Ndɔɔ yi eyɛɛn mɛ̃ byɛ onse empeel, eyɛɛn yɔ me mwiĩ. Ndɔɔ yi eyɛɛn mɛ̃ byɛ m’ãmfi-mfya, etee yɔ ke ywel a sɛɛ e nzɔ.» 28 Ebee baal b’abam nzuru a mbuul obal. Bɔ k’akoo k’abam omwiĩ wɛ. Wu ebal byɛ Nziã wu koo k’abam nzuru a mbuul y’omwiĩ o ndɛ onse ywɛn e mbaa. 29 «K’abetiɔ answiĩ buaal m’enzi-nzi etsi-tsiri wɛ? Kɛn a ngɔmɔ̃ onse bɔ k’akoo k’abva me nsie wɛ, okɛɛn Tal a byɛ k’awi nkuul wɛ. 30 Me b’otal byɛ, onkyam mpfu y’ɔ̃tswɛ a byɛ, Nziã oyɛɛ ɔ̃bvɛn a yɔ. 31 Oŋɔ̃ ebee ye buɔ okal. Byɛ eli y’ɔ̃bvɛn, enduru ɔ̃bɔbɔ wu answiĩ.»

32 «Obɔ otsɛn bɛn, mbuul wu akiool ke nkwel a baal ndiri ndɛ oli wa mɛ̃, mɛ̃ hɛ̃ ekieel ekiool ndɛ ke nkwel a Tal a mɛ̃ wa ke ywel. 33 Kɛn a mbuul wu abee mɛ̃ ke nkwel a baal, mɛ̃ hɛ̃ ekieel ebee ndɛ ke nkwel Tal a mɛ̃ wa ke ywel.»

34 «Ebee otsam wɛn mɛ̃ ngyi y’opi onse ɔ̃kiri: Hɛɛ̃-hɛ̃, mɛ̃ ke ngyi y’opi wɛ, ki ngyi mɛ̃ ye kyɛ epwel e mvel. 35 Taa-taa, mɛ̃ ngyi ye ndɔ eka mpɛ̃-a-mpɛ̃ a muaan ye tal, mpɛ̃-a-mpɛ̃ a muaan wu ɔ̃kaal ye ngoo, mpɛ̃-a-mpɛ̃ ɔ̃kal a muaan y’okɔ wu ɔ̃kaal: 36 Ataal a mbuul akieel akal baal a nzɔ a ndyam.✝»

37 «Mbuul wɛn dzii li edzii ndɛ tal a ndɛ wuo ngoo a ndɛ enduru li edzii ndɛ mɛ̃, k’abvaan me mɛ̃ wɛ. Mbuul wɛn dzii li edzii ndɛ muaan a ndɛ wu bɔɔl wuo wu ɔ̃kaal enduru li edzii mɛ̃, k’abvaan me mɛ̃ wɛ. 38 Mbuul wɛn k’abiri enkulusu e ndɛ me ndɔɔ yi anɔɔn a mɛ̃ wɛ, k’abvaan me mɛ̃ wɛ. 39 Mbuul wu odzii k’abvuul elaã e ndɛ, àywɛn a lɔ. Kɛn a mbuul wu àywɛn a elaã e ndɛ me ndɔɔ a mɛ̃, àbɔɔ lɔ.»

40 «Mbuul wu ayɔɔ byɛ, mɛ̃ ayɔɔ. Mbuul wu ayɔɔ mɛ̃, ŋ’ayɔɔ wu oyuɔɔl mɛ̃. 41 Mbuul wu ayɔɔ ɔ̃liaal-ɛ̃kiɛɛn a Nziã me ndɔɔ yɛn ndɛ oli ɔ̃liaal-ɛ̃kiɛɛn, ndɛ àbɔɔ ebvakab kiki y’ɔ̃liaal-ɛ̃kiɛɛn. Mbuul wu ayɔɔ mbuul wa dzu me ndɔɔ yɛn ndɛ oli dzu, ndɛ àbɔɔ ebvakab kiki ye mbuul wa dzu. 42 Mɛ̃ eyɛɛn byɛ wɛn, mbuul wu awa onkyam mbiɔ a ãdza m’efyɛ ola ngɔmɔ̃ onse b’atsi-atsi ba, me ndɔɔ yɛn ndɛ oli ɔ̃yio a mɛ̃, taa-taa bam, ndɛ k’akoo k’aywɛn ebvakab ki ndɛ wɛ.»