1 Ke mbee a saba, me tsoo li ɛ̃kwel li eyenge m’epal-epal kwɔɔl, Mali wa Magadala ye Mali wumɔ̃ ayetal mpiɛɛn. 2 Enseel oŋɔ̃, nsie enziool nzuru yam kokɔ. Nzal-a-ŋɛn ãnzwel ã Mfam ngãmɔ̃ ãfi ywel, ãsool ãyekeel nkɔɔn me pyɛ, bu ãbvi nsɛn nkal a yɔ. 3 Mɔ̃ ã́kenyɛɛn onge ɔ̃bɛɛn a nzyel, ekɔ e mɔ̃ hɛ̃ éli bvam fuu. 4 Ankiaal buɔ bu obɔɔ, bɔ abvi otiɔɔl, bu ayii onge b’akwi. 5 Kɛn ãnzwel ãlieel akaal ndiri: «Byɛ, ebee buɔ oyoo. Mɛ̃ ngyɛɛ wɛn byɛ Yeso wu abɛɛl m’enkulusu ebebii. 6 Ndɛ k’ali ŋã wɛ, ke ngwel wɛ ndɛ amaasiool, onge b’élieel ndɛ byɛ. Eyetal mboo yi eli ndɛ bɔ. 7 Eyi tswa-a-tswa eyeliaal ayio a ndɛ wɛn: "Ndɛ amaasiool onse b’ákwi-ákwi, ndɛ otsɔɔn nkwel a byɛ ke Ngalile✝28.7 Mat 26.32. Okɔ ku èmwɛn byɛ ndɛ." Ondɛ ɔ̃kiɛɛn wu yengyɛɛn mɛ̃ byɛ.» 8 Akaal ambal mpiɛɛn tswa-a-tswa oŋɔ̃, amaaluul me buɔ y’esɛ ki bibi. Bɔ atsuu ntiin ayeliaal nsia oyɔ ol’ayio. 9 Enseel oŋɔ̃, Yeso oyemwɛɛn ye bɔ, bu alieel bɔ ndiri: «Ensuɛɛn obɔ!» Bɔ asyel tsotsoo a ndɛ, asiin ntaã e ndɛ, bu abvi ãbuo ke nkwel a ndɛ. 10 Yeso olieel bɔ ndiri: «Ebee buɔ oyoo. Eyeliaal baan-ngoo a mɛ̃ ndiri ayi Ngalile: Okɔ ku èmwɛn bɔ mɛ.»

11 Ŋ’éli akaal me nkuul, ankiaal ke kwɛ b’ákekiaal mpiɛɛn ayɛn onse bviil. Bɔ alieel amfam b’angaa-a-Nziã mam mbueel m’ãbwel. 12 Amfam b’angaa-a-Nziã abvɔɔn y’akuul-kuul. Ke mbee a k’ekuru bɔ mfoo, bɔ awi ambwel-mbwel ɔ̃bɔbɔ a nzi. 13 Bɔ atam bɔ k’ayɛɛn ndiri: «Ayio a ndɛ ayeturu ebiĩ e ndɛ me tsia, me lio li eli bee me twal. 14 Okɛɛn mbiri oyoo nsia oyɔ, bee baal b’èbuaal ndɛ ɔ̃kwal, bvool esa kwɛn byɛ ebee fool omwɛn.» 15 Ambwel-mbwel awel nzi, bu asi b’atam bɔ osa. Nsia a ɔ̃sam ondɛ bu etsɔɔn onse Ayuda tiil nonɔ̃ ŋã.

16 Me b’otal ayio kuun y’ɔ̃mɔ̃, bɔ ayɛn Ngalile, nkal a nkio yi élieel Yeso bɔ ndiri ayi. 17 Ŋ’emwɛn bɔ ndɛ, bɔ abvi ãbuo. Kɛn a bakyɛ onse bɔ áketa enkyam. 18 Yeso osyel tsotsoo a bɔ, bu alieel bɔ bubu: «Áwi mɛ̃ okwɛn bueel ke ywel ye nsie. 19 Obobɔ, eyi, esa kwɛn onse ɛ̃kiri mvieel baal akal ayio a mɛ̃, ewa bɔ opongo me nkuũ a Taal, ye yi Muaan, ye yi Ɔ̃fel wu Ɔ̃nsensal. 20 Eyiool bɔ k’akiaal mam mbueel me ntam mɛ̃ byɛ osa. Me b’otal mɛ̃, mɛ̃ ndi ye byɛ ãtsoo mbueel, tiil ntɔ a ɔ̃kiri.»