1 Obɔ otsɛn bɛn, yɛ wu abebam bakyɛ me mbyel, okyam ŋɛn yɛ li ke nã, yɛ k'abɔɔ odzeel wɛ. Ke ngwel wɛ, ŋ'ebebam yɛ bakyɛ me mbyel, yɛ hɛ̃ ŋ'abebam nzuru a yam me mbyel, ke ngwel wɛ, yɛ wu abebam bakyɛ me mbyel, yɛ hɛ̃ abesa ãndɔɔ mamã. 2 Kɛn a bia-byɛ eyɛɛ wɛn Nziã atsiil ãndɔɔ m'emfa ki otaa-taa, me ndɔɔ a baal b'abesa ãndɔɔ mã m'emfa okyɛ. 3 Yɛ wu abebam bakyɛ me mbyel, kɛn a yam hɛ̃ abesa ãndɔɔ mamã, yɛ bu atsam wɛn yɛ olɔ pal onse otsiil b'etsiil Nziã ãndɔɔ ã baal? 4 Yɛ apfiɔɔl obvɛ o Nziã b'onduru ɔ̃ndel, y'osɛ-mwiĩ o ndɛ, y'ongesɛ o ndɛ? Yɛ adzɛɛn wɛn obvɛ o Nziã obvaan obiri yɛ k'okaal b'ɔ̃kwal? 5 Onge bɛn yɛ li y'ɔ̃tswɛ mpɛn, bvool bee bam k'akaal ɔ̃kwal, yɛ ŋ'adzuru mpuru a Nziã yi kokɔ nkal a yam, me tsoo li èyiool mpuru a ndɛ bvool li ètsiil ndɛ ãndɔɔ ã baal m'emfa ki dzu. 6 Ndɛ akieel awa mbuul bwɛn a mbuul ki ebvaan mi ɛ̃sal ɛ̃ ndɛ✝. 7 Ndɛ akieel awa elaã li ɔ̃bu nkal ɔ̃bu ola baal bɛn m'ɔ̃tɛɛ̃ a bɔ onse osa o ndɔɔ yi ngesɛ, abii lweel, ye dzuun, y'eluɔ bvɛn k'ebii wɛ. 8 Kɛn a ndɛ akieel asuo mpuru y'ongɛɛ o ndɛ nkal a baal bɛn, me ndɔɔ ãtsam ã bam, abee otaa-taa bvool akuru nzuru m'obi. 9 Fool y'ãwua ekieel eya nkal a mbuul wueel wu asa obi, ŋ'ɛ̃kwel nkal Ɔ̃yuda, ke mbee nkal a wɛn k'Ɔ̃yuda wɛ. 10 Lweel, ye dzuun, y'opi ekieel eya ola mbuul wueel wu asa obvɛ, ŋ'ɛ̃kwel ol'Ɔ̃yuda, ola mbuul wɛn k'Ɔ̃yuda hɛ̃ wɛ. 11 Ke ngwel wɛ, ola Nziã ɔ̃bɛɛ pyɛ. 12 Nzal-a-ŋɛn baal bueel b'asi obi ŋɛn Ngel k'eli wɛ, k'àtsiil ãndɔɔ ã bɔ me nkuul a Ngel wɛ, b'asi obi ke nsɛn a Ngel, àtsiil ãndɔɔ ã bɔ me nkuul a Ngel. 13 Ke ngwel wɛ, b'ekieel esuul Nziã dzu, ke baal b'ayoo Ngel wɛ, b'ekieel esuul ndɛ dzu b'akiaal yɔ. 14 Ŋɛn baal bɛn k'Ayuda wɛ, bɛn k'ali ye Ngel wɛ, abesa ãndɔɔ m'etam Ngel osa me bam, bɔ ali Ngel a bam, onkyam ŋɛn bɔ k'ali ye Ngel wɛ. 15 M'epfuũ e bɔ, bɔ ŋ'asuo kwɛn ndɔɔ yi etam Ngel osa, akel yɔ onse ɛ̃kwal ɛ̃ bɔ. Ɛ̃kwal ɛ̃ bɔ ɛ̃suo obobɔ, emfa kiki hɛ̃ ãtsam ã bɔ ãlio makyɛ ãfɛn bɔ, ãlio makyɛ ãtsweel bɔ, 16 me tsoo li ekieel etsiil Nziã ãndɔɔ ã baal mã m'edziɔɔn me nkuul a Yeso Mãsia, onge b'eyɛɛn mɛ̃ onse Nsia yi Ngesɛ yi ebetsal mɛ̃.

17 Yɛ wu abeyɛɛn wɛn yɛ li Ɔ̃yuda, yɛ wu abeta kaã me Ngel, yɛ wu abebɛɛl ntwel me Nziã, 18 yɛ wu yɛɛ b'edzii ndɛ, bvool wu yɛɛ k'asuaal ndɔɔ yi nkiin, me ndɔɔ yɛn Ngel esuo yɛ nkuul, 19 yɛ wu atsam wɛn yɛ li mbiri a ɛ̃nkwa-mviil, oyɔɔl o b'ali onse empeel, 20 Yɛ wɛn yɛ li ɔ̃yiool a ewool, ɔ̃tee a baan b'abwee, ɔ̃tswɛ-pa wɛn yɛ bam atsam wɛn onse Ngel, yɛ li ye oyɛɛ y'otaa-taa m'emfa ki ɔ̃koo, 21 obobɔ yɛ wu abeyiool bakyɛ, kɛn a yɛ k'abeyiool nzuru a yam wɛ, yɛ abetee bakyɛ wɛn abee oturu, kɛn a yam abeturu! 22 Yɛ abeyɛɛn wɛn k'ebvaan awal ɔ̃lam wuo ɔ̃kal a mbuul wɛ, kɛn a yam abewal alam wuo akaal a baal! Yɛ li ye byal li etiɔ, kɛn a yɛ abekuaal bvi eli onse ãnzɔ m'etiɔ! 23 Yɛ abɛɛl ntwel me Ngel, kɛn a yɛ k'alweel Nziã wɛ ŋ'efel yɛ Ngel. 24 Ngwnyã, ákel onse ɔ̃nkaan a Nziã, ndiri: «Me ndɔɔ a byɛ, abefiɛɛn nkuũ a Nziã onse ɛ̃kiri myɛn k'ɛ̃yɛɛ Nziã wɛ✝.»

25 Ke yam, otsiil o nzuru oli y'otsɛn o bɔ, okɛɛn yɛ asa m'etam Ngel osa. Kɛn okɛɛn yɛ afel Ngel, onkyam ŋ'átsiil yɛ, yɛ yii onge mbuul wɛn k'átsiil wɛ. 26 Obobɔ, okɛɛn mbuul wɛn k'átsiil wɛ osi m'etam Ngel osa, olɔ k'awel ndɛ onge mbuul wu átsiil wɛ? 27 Mbuul wɛn k'átsiil ndɛ m'emfa ki ombuul wɛ, wu afel Ngel, ndɛ kieel k'atsiil ãndɔɔ ã yɛ wɛ, yɛ wɛn k'akiaal Ngel wɛ, onkyam ŋɛn yɛ li ye Ngel yi ákel bvool átsiil yɛ? 28 Ɔ̃yuda wa taa-taa, ke wu oli Ɔ̃yuda m'emfa ki onkwel-a-nzi wɛ. Otsiil o nzuru hɛ̃ bo bɔ-a-bɔ, ke b'onkwel-a-nzi me nzuru wɛ. 29 Ɔ̃yuda wa ndɛ-a-ndɛ, wu oli Ɔ̃yuda m'edziɔɔn. Otsiil o nzuru o ndɛ oli b'ɔ̃kwal, bɛn k'ofi me Ngel yi ákel wɛ, ofi m'Ɔ̃fel. Mbuul wa m'emfa okyɛ, dzuun e ndɛ k'efa ola baal wɛ, dzuun e ndɛ efa ola Nziã.