1 Andoo a dzii, byɛ bam k'edzɛɛn b'eyɛɛn mɛ̃ wɛ, nzal-a-ŋɛn byɛ eyɛɛ Ngel: Ngel eli y'okwɛn nkal a mbuul lio lueel li eli mbuul ondɛ mwiĩ. 2 M'emfa kiki, ngel a bal ebvool ɔ̃kaal a bal y'ɔ̃lam lio lueel li eli ɔ̃lam ondɛ mwiĩ. Ŋ'ekwi ɔ̃lam, ɔ̃kal k'abekal ke nsɛn a ngel yi ekebvool ndɛ y'ɔ̃lam wɛ. 3 Obobɔ, ŋ'eli ɔ̃lam kɛn mwiĩ, okɛɛn ɔ̃kal oyii wa bɔɔl ekyam, ayɛɛn ndiri ndɛ owel anga-ɔ̃lam. Kɛn a ŋɛn ɔ̃lam okwi, ndɛ k'abekal ke nsɛn a ngel a bal wɛ. Okɛɛn ndɛ oyii ɔ̃kal a bɔɔl ekyam, ŋɛn ndɛ k'awel anga-ɔ̃lam wɛ. 4 Emfa kiki hɛ̃, andoo a dzii, me nkuul a nzuru a Mãsia, ábam byɛ me b'otal Ngel, kwɛn byɛ ekal ba mbuul ɔ̃kyam, wu ásiool onse b'ákwi-ákwi. M'emfa okyɛ, bia-byɛ eburu nsia me ndɔɔ a Nziã. 5 Ke ngwel wɛ, ŋ'éli bia-byɛ ke nsɛn okwɛn b'ombuul, efua bvi ãbi ékesal me nkuul a Ngel onse elyam e nzuru a bia-byɛ, m'emfa kyɛn bia-byɛ ékeburu nsia yi ebiri k'epfu. 6 Kɛn a meba, bia-byɛ k'ebekal ke nsɛn okwɛn o Ngel wɛ, me ndɔɔ yɛn bia-byɛ emeekwa me b'otal Ngel oyɔ yi ekesuul bia-byɛ m'onkyal. Obobɔ, bia-byɛ esal ke nsɛn okwɛn b'alili b'Ɔ̃fel, ke ke nsɛn okwɛn o Ngel yi ákel yi émeefa mfel wɛ.

7 Obobɔ, bia-byɛ omã eyɛɛn? Ngel eli obi? K'obobɔ bam wɛ! Kɛn a mɛ̃ ŋe ngyɛɛ obi me nkuul a Ngel. M'emfa okyɛ, mɛ̃ k'ekeeyɛɛ efua bvi ebi-ebi wɛ, okɛɛn Ngel k'elieel mɛ̃ ndiri: «Oyɛɛ ke kal y'efua bvi ebi-ebi wɛ». 8 Obobɔ, obi obɔɔ mpwee me b'etam Ngel osa, m'olɔ b'efua bvi ebi-ebi b'emfa bvieel onse mɛ̃. Ke ngwel wɛ, okɛɛn Ngel pyɛ, obi okwi. 9 Me b'otal mɛ̃, ŋ'éli Ngel tsɔɔn pyɛ, mɛ̃ éli mwiĩ. Kɛn a ŋ'eyi ndɔɔ yi etam Ngel osa, obi oyii mwiĩ, 10 mɛ̃ bu nkwi. Obobɔ, ndɔɔ yi etam ngel osa yi ekeebiri mɛ̃ k'elaã, ebiri mɛ̃ k'epfu. 11 Ke ngwel wɛ, obi obɔɔ mpwee me b'etam Ngel osa, opfuru mɛ̃ me nkuul a bɔ, bu obam mɛ̃. 12 Ŋɛn Ngel eli ɔ̃nsensal, ãndɔɔ m'etam Ngel osa hɛ̃ ãli ɔ̃nsensal, ãli dzu, bvool ãli ngesɛ. 13 Obobɔ, obvɛ okɔɔl epfu me ndɔɔ a mɛ̃? K'obobɔ bam wɛ! Eli obi, bɛn me ndɔɔ yɛn bɔ omɔɔn onge obi, obwel me nkuul eluɔ ki ngesɛ, bu obiri mɛ̃ k'epfu. M'emfa okyɛ, me nkuul a m'etam Ngel osa, obi osuo kwɛn bɔ oyii bam obi-obi.

14 Ke yam, bia-byɛ eyɛɛ wɛn Ngel eyi m'Ɔ̃fel. Kɛn a mɛ̃ ndi kɛn a mbuul, bvool ndi ɔ̃nkyal a obi. 15 Ke ngwel wɛ, b'esa mɛ̃, mɛ̃ k'ebɔɔ bɔ otsɛn wɛ, nzal-a-ŋɛn be nzii mɛ̃, mɛ̃ k'esa bɔ wɛ, kɛn a b'ebyal mɛ̃, b'esa mɛ̃. 16 Onge bɛn b'esa mɛ̃, bɛn mɛ̃ ke nzii wɛ, ŋɛn mɛ̃ ndi ɔ̃nguo ngɔmɔ̃ ye Ngel wɛn yɔ eli ngesɛ. 17 Obobɔ, wu asa ndɔɔ oyɔ ke mɛ̃ wɛ, wu asa yɔ obi b'okal onse mɛ̃. 18 Ke ngwel wɛ, mɛ̃ ngyɛɛ wɛn ndɔɔ si ngamɔ̃ yi mvɛ onse mɛ̃ pyɛ, ŋ'ayɛɛn ndiri onse ombuul o mɛ̃. Ke ngwel wɛ, mɛ̃ nzii k'esa obvɛ, kɛn a mɛ̃ mpɛn yi esa bɔ pyɛ. 19 Mɛ̃ k'esa obvɛ be nzii mɛ̃ wɛ, kɛn a mɛ̃ esa obi bɛn mɛ̃ ke nzii wɛ. 20 Okɛɛn bɛn mɛ̃ ke nzii wɛ, b'esa mɛ̃, ŋɛn wu asa obobɔ ke myam wɛ, obi b'okal onse mɛ̃. 21 Obobɔ, mɛ̃ emwɛn ngel yi onse mɛ̃: Mɛ̃ wu nzii k'esa obvɛ, ki nkoo k'esa mɛ̃ kɛn obi. 22 Ke ngwel wɛ, onse mwiĩ a mɛ̃, mɛ̃ ndi y'esɛ me ngel a Nziã. 23 Kɛn a mɛ̃ emwɛn ngel nkyam yi esal onse nzuru a mɛ̃: Yɔ edzwaan ye ngel yi ãtsam ã mɛ̃, yɔ hɛ̃ esuul mɛ̃ ɔ̃nkyal a ngel yi obi yi eli onse nzuru a mɛ̃ yueel. 24 Mɛ̃ mpii mbuul a fool ndi! Wu àpaal mɛ̃ onse nzuru yi ebiri mɛ̃ k'epfu yi nã? 25 Ãtuɛɛn ãbvool ola Nziã, me nkuul a Yeso Mãsia wu Mfam a bia-byɛ! M'emfa okyɛ, onse ãtsam ã mɛ̃, mɛ̃ ndi ɔ̃nkyal a ngel a Nziã, m'ombuul o mɛ̃, mɛ̃ ndi ɔ̃nkyal a ngel a obi.