1 Mɛ̃ otaa-taa eyɛɛn onse Mãsia, mɛ̃ k'epfuru wɛ, ɔ̃kwal a mɛ̃ me nkuul a Ɔ̃fel wu Ɔ̃nsensal atsweel b'eyɛɛn mɛ̃. 2 Mɛ̃ ndi y'ãwua mã bibi ye fool lɛn onse ɔ̃kwal k'efa wɛ. 3 Ke ngwel wɛ, myam kɛn ekeedzii kwɛn abwel mɛ̃ enkɛɛ, k'ekab nzuru ye Mãsia, me ndɔɔ a baan-ngoo a mɛ̃, be ndi mɛ̃ yam ngelemɔ̃ ye bɔ m'emfa ki ombuul. 4 Bɔ b'ali afi-Isalayel, b'ésuul Nziã baan a ndɛ, b'éwi ndɛ lweel e ndɛ, b'étɛn ndɛ ondoo ye bɔ, b'éwi ndɛ Ngel, b'ésuo ndɛ emfa ki abuɛɛn, b'élieel ndɛ ãndɔɔ m'ekieel esa ndɛ, 5 bvool b'éwi ndɛ ankiɔɔn. Mãsia hɛ̃ m'emfa ki ombuul oli wa yam e bɔ, ndɛ wu oli ke ywel a mbueel, bvool wu oli Nziã wu alweel ɔ̃bu nkal ɔ̃bu. Amɛn!

6 Ke ŋ'ayɛɛn ndiri Endɔɔ e Nziã efi mfel wɛ. Ke ngwel wɛ, bueel b'éburu Isalayel k'ali ba yam li taa-taa li Isalayel wɛ. 7 Onkyam ŋɛn bɔ ali ba yam li Abalayam, bɔ bueel k'ali baan b'Abalayam ba taa-taa wɛ. Ke ngwel wɛ Nziã álieel Abalayam ndiri: «Isak mbuul wu akieel aburu yɛ ãyam bibi✝.» 8 Ŋ'ayɛɛn ndiri baan a Nziã, k'eli baan b'aburu m'emfa ki ombuul wɛ. Kɛn a baan b'awal onge yam, eli b'éyɛɛn Nziã ndiri àwa. 9 Ke ngwel wɛ, tal ãyɛɛn m'élieel Nziã: «Mɛ̃ ekieel eyebvool me lio li lili li bu, obobɔ Sala akieel aburu muaan wu bɔɔl✝.» 10 K'esɛn oŋɔ̃ wɛ, eli hɛ̃ ye Lebeka, wu áburu baan buaal ye bɔɔl kɛn a ngɔmɔ̃, bɔɔl olɔ Isak wu nkiɔɔn a bia-byɛ. 11 Baan obɔ, ale kɛn aburu bɔ wɛ, bvool ale kɛn asi ekal obvɛ, ekal obi wɛ. Kɛn ɔ̃yɛɛl a Nziã akal m'emfa ki éwɛɛ ndɛ, 12 ke m'ɛ̃sal wɛ. Ndɛ ofi ola wu ata mbel. M'emfa okyɛ, Nziã álieel Lebeka ndiri: «Ɔ̃kuul àkal ɔ̃sal a mvɔɔl.» 13 Eli onge b'ákel ndiri: «Mɛ̃ nsueel Dzakab, k'Esahu wɛ*.✝» 14 Obobɔ, bia-byɛ omã eyɛɛn? Nziã oli y'ɔ̃bɛɛ? K'obobɔ bam wɛ! 15 Ke ngwel wɛ, ndɛ álieel Moyize ndiri: «Mɛ̃ èyoo ãwua me wu nzii k'eyoo mɛ̃ ãwua, bvool mɛ̃ èyoo ãnyiĩ me wu nzii k'eyo mɛ̃ ãnyiĩ.✝» 16 Obobɔ, osuaal b'esuaal Nziã k'ofa me b'edzii mbuul wuo me mpɛn yi esa ndɛ wɛ, kɛn a me Nziã wu ayoo ãnyiĩ. 17 Ke ngwel wɛ, onse Ɔ̃nkaan a Nziã, Nziã olieel Falahɔ̃ bubu: «Mɛ̃ nsueel yɛ m'otsɛn, me ndɔɔ yi esuo mpɛn a mɛ̃ me nkuul a yɛ, bvool me ndɔɔ yɛn nsia a nkuũ a mɛ̃ etsɔɔn me nsie yueel.✝» 18 M'emfa okyɛ, Nziã ayoo ãnyiĩ me wu edzii ndɛ, awa ɔ̃tswɛ mpɛn me wu edzii ndɛ.

19 Obobɔ, baal àyɛɛn mɛ̃ ndiri: «K'otsɛn omã bvool b'ebewa Nziã baal ãmbyel?» Ke ngwel wɛ, wɛn ol'okoo k'akii b'edzii Nziã nã? 20 Yɛ wu mbuul, yɛ nã li, kwɛn yɛ ta enkyam ye Nziã? Eluɔ ki abuo ol'efuul wu obuo kyɛ ndiri: «Ki ebuo yɛ mɛ̃ bubu emã?» 21 Wu abuo eluɔ m'ɔ̃bwɛɛ k'ali y'ɔ̃kwɛn b'abuo eluɔ bvi dzuun ye bvi eywɛn a dzuun m'ɔ̃bwɛɛ wuwu wɛ? 22 Nziã odzii k'asuo mpuru a ndɛ, bvool asa kwɛn baal ayɛɛ waan e ndɛ. Kɛn a baal bɛn abvaan amwɛn mpuru a ndɛ bvool adziɔɔn, ndɛ okuru mwiĩ me ndɔɔ a bɔ y'osɛ-mwiĩ bibi. 23 M'emfa okyɛ, ndɛ ádzii k'asuo opfel b'onduru okuun bo lweel e ndɛ ola baal b'esio ndɛ nyiĩ, b'éyɛɛl ndɛ ŋ'ɛ̃kwel me ndɔɔ a lweel olɔ. 24 Baal obɔ eli bia-byɛ b'éti ndɛ mbel, ke kɛn onse Ayuda wɛ, eli hɛ̃ onse bɛn k'Ayuda wɛ. 25 Nziã oyɛɛn ndɔɔ oyɔ onse ɔ̃nkaan wu ɔ̃liaal-ɛ̃kiɛɛn Odze ndiri:

«Yam lɛn k'éli yam e mɛ̃ wɛ,

mɛ̃ èta lɔ me yam e mɛ̃.

Wɛn k'áli mbuul a mɛ̃ wu ɔ̃tio wɛ, mɛ̃ èta ndɛ me mbuul a mɛ̃ wu ɔ̃tio✝.

26 Bvool onkyam ke mboo yi ákeliaal bɔ ndiri:

"Byɛ k'eli yam e mɛ̃ wɛ",

àta bɔ me baan a Nziã wa mwiĩ✝.»

27 Me b'otal ɔ̃liaal-ɛ̃kiɛɛn a Nziã Edzayi, ndɛ oswɛn me ndɔɔ Isalayel bubu:

«Onkyam ŋɛn yam li Isalayel eyii lam m'olɔɔ onge esɛɛ bvi ãdza m'ɔ̃ngwa,

b'àbvuul baal ke kwɛ onse bɔ.✝ 28 Ke ngwel wɛ, Mfam àsa m'eyɛɛn Endɔɔ e ndɛ tswa-tswa bvool m'emfa ki ɔ̃koo me nsie.» 29 Edzayi hɛ̃ álieel ŋ'ɛ̃kwel ndiri:

«Okɛɛn Mfam Sabahot* k'ásiil bia-byɛ yam wɛ,

kɛn a bia-byɛ ekeekal onge bviil li Sodome,

kɛn bia-byɛ ekeekal emfa ngemɔ̃ ye bviil li Gomɔɔl.✝»

30 Obɔbɔ, bia-byɛ omã eyɛɛn? Baal bɛn k'Ayuda wɛ, bɛn k'ákeluɛɛn ãndɔɔ mã dzu wɛ, ayii dzu m'okiool o bɔ. 31 Kɛn a baal b'Isalayel b'ákedzii k'akal dzu me nkuul a Ngel, k'akoo k'akal dzu me yɔ wɛ. 32 M'emã? Me ndɔɔ yɛn, bɔ k'abii k'akal dzu me nkuul a okiool wɛ, bɔ abii k'akal dzu m'ɛ̃sal. Bɔ bu abɛɛl tsa me nkɔɔn yi ebal baal, 33 onge b'ákel ndiri:

«Mɛ̃ nsuul ke nkio yi Siɔ̃ nkɔɔn yi abɛɛl tsa me yɔ,

emɛɛ̃ li ebal baal.

Wu alɔ okiool onse lɔ k'àyoo opfuru wɛ.✝»