1 Obobɔ, omã eyɛɛn me ndɔɔ Abalayam wu nkiɔɔn a bia-byɛ? Ki ébɔɔ ndɛ me mpɛn a ndyam emã? 2 Okɛɛn Nziã ásuul Abalayam mbuul wa dzu me ndɔɔ ɛ̃sal ɛ̃ ndɛ, ŋɛn ndɛ ale akoo m’obɛɛl o ntwel, kɛn a ke ke nkwel a Nziã wɛ. 3 Ke ngwel wɛ, Ɔ̃nkaan a Nziã ayɛɛn bubu: «Abalayam áli y’okiool me Nziã. Nziã bu asiɔɔl ndɛ onge mbuul wa dzu✝4.3 Obɛ 15.6.» 4 Mbuul wu osi ɔ̃sal, furu e ndɛ k’asiɔɔl lɔ onge nyiĩ yi asio ndɛ wɛ, furu lɛn ebvaan awa ndɛ me ndɔɔ ɔ̃sal wu esi ndɛ. 5 Me b’otal mbuul wɛn k’asi ɔ̃sal wɛ, ŋɛn ndɛ olɔ okiool onse Nziã wu asuul nga-ãbi dzu, okiool o ndɛ osa kwɛn Nziã asiɔɔl ndɛ onge mbuul wa dzu. 6 Emfa kiki, me ndɔɔ esɛ ki eli a mbuul wɛn, ke m’ɛ̃sal ɛ̃ Ngel wɛ, Nziã osiɔɔl ndɛ onge mbuul wa dzu, David olieel bubu:

7 «Esɛ ola baal bɛn Nziã ombaal bɔ elyal,

odzeel bɔ ãbi!

8 Esɛ ola mbuul wɛn Mfam bam k’abesiɔɔl ãbi ã ndɛ wɛ✝4.8 Ãnz 32.1-2!»

9 Esɛ okyɛ kɛn a ki baal b’átsiil, wuo ki bɛn hɛ̃ k’átsiil wɛ? Ke ngwel wɛ, bee eyɛɛn wɛn «me ndɔɔ Abalayam, okiool o ndɛ osi kwɛn Nziã osiɔɔl ndɛ onge mbuul wa dzu.» 10 Lio emã li ésiɔɔl Nziã okiool o ndɛ? Ŋ’al’amaatsiil ndɛ, wuo ŋɛn ale kɛn atsiil ndɛ wɛ? Ke ŋ’amaatsiil wɛ, nzal-a-ŋɛn ale kɛn atsiil ndɛ wɛ. 11 Abalayam obɔɔ otsiil o nzuru onge eliĩ. Kyɛ esuo kwɛn Nziã osiɔɔl ndɛ onge mbuul wa dzu m’okiool, ye k’atsiil ndɛ. Obobɔ, ndɛ oli tal a baal bueel b’akiool, onkyam ŋɛn k’atsiil bɔ wɛ, kwɛn Nziã asiɔɔl bɔ hɛ̃ onge baal ba dzu. 12 Ndɛ hɛ̃ oli tal a b’átsiil, bɛn k’asɛn kɛn a m’otsiil b’átsiil bɔ wɛ, kɛn a bɔ hɛ̃ aluɛɛn kuul e nkiɔɔn a bia-byɛ Abalayam wu ákiool ye k’atsiil ndɛ.

13 Ke ngwel wɛ, Nziã ŋ’áwi Abalayam y’atiɔɔl a ndɛ lɔɔ li awal ɔ̃swal wu ɔ̃kiri ondɛ, ke me ndɔɔ yɛn Abalayam ákieel Ngel wɛ, me ndɔɔ yɛn Nziã ásiɔɔl ndɛ onge mbuul wa dzu m’okiool. 14 Ke ngwel wɛ, okɛɛn b’abɔɔ eluɔ bvi eyɛɛn Nziã ndiri àwa baal, eli kɛn a b’akiaal Ngel, ŋɛn okiool k’obekal y’otsɛn wɛ, bvool oyɛɛn b’eyɛɛn Nziã ndiri ndɛ àwa baal eluɔ hɛ̃ oyii bo ngwel. 15 Ke ngwel wɛ, Ngel epoo mpuru a Nziã, mboo yɛn Ngel pyɛ, ofel o Ngel hɛ̃ k’oli wɛ. 16 Obɔ otsɛn bɛn, abɔɔ bvi eyɛɛn Nziã ndiri awa baal me nkuul a okiool, oyɔ eli nyiĩ a Nziã. M’emfa okyɛ, oyɛɛn obɔ otal atiɔɔl b’Abalayam bueel, ekal b’ali ye Ngel, ekal b’ali y’okiool onge Abalayam, ndɛ wu nkiɔɔn a bia-byɛ bueel. 17 Ákel ndiri: «Mɛ̃ nsuul yɛ nkiɔɔn a ãyam ã baal booboo✝4.17 Obɛ 17.5.» Abalayam oli nkiɔɔn a bia-byɛ ke nkwel a Nziã wu elɔ ndɛ okiool onse ndɛ, ndɛ wu Nziã wu aseel b’ákwi-ákwi, bvool asa kwɛn eluɔ bvɛn k’eli wɛ, ekal. 18 Ke mboo yɛn Abalayam kaã ale k’ekekal wɛ, ndɛ oti kaã kɛn ota. Ndɛ bu ayii nkiɔɔn a ãyam ã baal bibi, onge b’élieel Nziã ndiri: «Atiɔɔl a yɛ akieel akal bam bibi✝4.18 Obɛ 15.5.» 19 Onkyam ŋɛn ndɛ aleyii me mvel sua ɔ̃nkam (100), bvool nzuru a ndɛ al’emeewɔɔl yam bibi, Sala hɛ̃ ale k’akoo m’oburu wɛ, me ndɔɔ yɛn ndɛ nzuru al’emeewɔɔl, Abalayam k’ayɔɔl okiool wɛ. 20 Ke nkwel oyɛɛn b’eyɛɛn Nziã ndiri ndɛ àwa ndɛ muaan, Abalayam k’ati enkyam wɛ. Kɛn okiool o ndɛ owi ndɛ mpɛn, ndɛ bu alweel Nziã. 21 Ndɛ bam áli ye kaã kwɛn, lɔɔ li ewa Nziã, ndɛ asa kwɛn lɔ ekoo. 22 Obɔ otsɛn bɛn, «Nziã osiɔɔl ndɛ onge mbuul wa dzu.» 23 Ŋ’eyɛɛn Ɔ̃nkaan a Nziã ndiri: «Nziã osiɔɔl ndɛ onge mbuul wa dzu», ke kɛn a me ndɔɔ a ndyam sii wɛ, 24 me ndɔɔ a bia-byɛ hɛ̃. Bia-byɛ bɛn Nziã asiɔɔl onge baal ba dzu, nzal-a-ŋɛn bia-byɛ elɔ okiool onse ndɛ wu áseel Yeso wu Mfam a bia-byɛ, onse b’ákwi-ákwi. 25 Nziã ási kwɛn ndɛ akwa me ndɔɔ ãbi ã bia-byɛ, bvool áseel ndɛ me ndɔɔ yi asuul bia-byɛ dzu.