1 पोशो एक मोटली निसाणी जुगा माय देखानी, मतलब एक बायकु दिह्याह पांगेर रियेल एती, एने चांद तीन पायान नेचो एने मुंडा पोर बारा तारान मुकूट ईतो। 2 ती बायकुह दिह एता, एने तेकलीत ने कारेण ती आयेड़ने बाजरियेल एती, काहाकाय सोराह पायदा केरनेन टेम एतो। 3 एक उंजु निसाणी जुगा माय देखानी। एने दिखो, रातला रेंगान एक मुठलो एजगेर ईतो, तान हात मुंड एने दोह हिंगे एता एने तान हातु बी मुंडा पोर एक एक मुकूट एतो। 4 तो तान सेमटा केरीन जुगान एक उगेन ताराह खेचीन देरती पोर नोवो टाक दिनो। तो एजगेर सोराह पायदा एतास खाणेन होदतालो, केरीन ती बायकुन ओंगाण उबरी गीयो जी सोराह पायदा केरनी एती। 5 ओवती ती बायकु एक सोराह जेल्मो देनी, एने ता सोराह लोखंडान राजडेंगा केरीन आखा देसा पोर राज केरनु एतो। पुण ता सोराह बोगवान एने तान राजगादि फाय उखलीन पोचाड़ाय गीयो। 6 पुण ती बायकु नाहीन ता जेंगला माय जात रेनी, जा बोगवानान उगे रेन तीन केरता जागु तियार किरेल एतो, ताकाय ती एक एजार दुय होव दिह वोर होमलावाय जाय।

7 ✝तेवी हेरगा माय लेड़ाय एनी। मीखायेल एने तान हेरोगदुत एजगेरा हेऱ्या लेड़ाणेन केरता निकेलना, एजगेर एने तान हाती ता हेऱ्या लेड़ाना; 8 पुण एजगेर जिक नाह सीक्‍यो, एने हेरगा माय तान केरता रेणेन जागु नाह रेनो। 9 ✝एने ता एजगेरा एने तान हेरोगदुताह बुंदे टाक देना, ज्यो तोस जुनालो गेयड़ेक हे, जो खाराब एने सैतान केवाथी, एने आखी दुनियाह बोटकावणार हे। 10 पुशो मी हेरगा माय रेन ज्यो मोटलो आवाज आवतालो होमल्यो, एवी आमरा बोगवानान सुटकारो, ताकेत, राज! एने तान मसीन आदिकार देखानोह! काहाकाय बुरहो केरनारा पोर आरोप लागाड़नार जो आमरा बोगवानान ओंगाण रात दिह ताह गुनेगार ठेरावीह, ताह नेचो जुगार दियेल हे। 11 पुण ता मेंड्रान लुय एने तान गोवाहीन वचना केरीन ता पोर जिक सापड़ायेल हेते; काहाकाय ता तान जीवान बी पारवा नाह केऱ्या। 12 केरीन एय हेरोग एने ता माय रेणारे खुस ईवो, पुण देरती एने देरीया पोर हाय! काहाकाय सैतान जुलूम राग माय तुमरी फाय उतेर आयेल हे, काहाकाय तो जाणेह काय ता फाय टेम थुड़ोस बाकी हे।

13 जेवी एजगेराह सोमेज माय आवो काय माहु देरती पोर नेचो टाक दियेल हे, ते ती बायकुन पासाण लागो जी सोराह पायदा किरेल एती। 14 पुण ती बायकुह मोटला मोराग्यान दुय फाके आपाय गीया काय एजगेर ने ओंगाण रेन उड़ीन जेंगला माय ती जागी पोच जाय, जा तीह एजगेरान ढाचाम रेन होमालीन मेलने माय एक एजार साठ दिह वोर द्यान मेलाय जाय। 15 एने एजगेर ती बायकुन पासाण तान मुयाम रेन नेदीन गेत पाणी वोयाड्यो, ज्यानकेरता काय ती बायकुह पाण्या केरीन वोयाड़ ली जाय। 16 पुण देरती ती बायकुन मोदेक किरेल, एने बुय तीन मुय खोलीन ती नेदीह गील लेदी, जी एजगेरान मुयाम रेन निकेलताली। 17 ज्यान पासाण एजगेराह ती बायकु पोर जुलूम राग आवो; एने बायकु दिहरा वुचेल वोस फाय जा बोगवानान उकुमाह मानतेह एने यीशुन गोवाही केणेन मोजबुत हेते, ता हिऱ्यो लेड़ाणेन केरता गीयो। 18 *एने एजगेर देरीयान मीरे जाईन उबरी गीयो।