यहेजकेल 11

यरूशलेम ने चिहटा

1 तेवी जीव माहु विसीन बोगवानान मोंदिरान ता बायणा पोर लेन आवो, जान मुय पुर्व दिशान उगे हे, मी दिख्यो काय ताहरी बायणाम रिगणेन जागा पोर पोचीह माणहे एता, तान विचीम मी अज्जूरान सोरा यात्सानिया एने बेनायान सोरा पेलायाह दिख्यो, जा पोरजान मुखी एता। 2 तेवी बोगवान माहु केयो, "एय माणहान सोरा, ज्या ता माणहे हेते, जा हेयरा माय खाराब काम केरनेन केरता नोवाली नोवाली योजना सोचतेह, एने ज्या माणहाह गेलेत सेला देतेह। 3 ज्या माणहे केतेह, ‘गेरे बाणावणेन टेम आहने नाय मिले, ज्यो हियोर डेचको एने आमु ज्याम वाला माह हेते।’ 4 केरीन एय माणहान सोरा, न्यान विरूद जाणाव केर, जाणाव केर।"

5 तेवी बोगवानान जीव मार पोर उतेरनो, एने माहु केयो, "बोगवान इही किथे, एय इस्राएलान गेराणा तुमू ओहलोच किरेल हेते; जो काय तुमरा मोनाम आवेह, ताह मी जाणथो। 6 तुमू ते ज्या हेयरा माय जुलूम जाणाह मार टाक्या पुण तान सेड़क्युह देड़ा माय बोर दियेल हेते। 7 केरीन बोगवान यहोवा इही किथे, काय जा माणहाह तुमू ज्या हेयरा माय मार टाकेल हेते, तान देड़ेच ज्या हेयरान वेहान डेसका वालो माह हे; एने तुमू ज्यान विचीम रेन काड़ाय जाहो। 8 तुमू तालवारीह बितेह, एने मी तुमू पोर तालवारीच ने वापेर तुमरी विरूद केरूह, ज्यो बोगवान यहोवान बोल हे। 9 मी तुमूह ज्या हेयरा माय रेन काढ़ीन पाराया देसान माणहान आथाम केर देह, एने तुमूह देन्ड आपाडुह। 10 तुमू तालवारी केरीन माराय जाहो, एने मी तुमूह इस्राएलान हिली पोर देन्ड आपुह, तेवी तुमू जाण जाहो काय मी यहोवा बोगवान हे। 11 ज्यो हियोर तुमरी केरता डेचको नाय बोणी, एने नाय तुमू ज्यान माह बोणहो; मी तुमूह इस्राएलान हिली पोर देन्ड आपुह। 12 एने तुमू जाण जाहो काय मी बोगवान हे, काहाकाय तुमू मारा नेम एने कायदाह नाह मानेल सोता, पुण तुमू तुमरा चार उगेन देसान नेमा पोर चालते रेना।" 13 जेवी मी जाणाव केरनेच बाज रियेल इतो काय बेनायान सोरो पालत्याह मोर गीयो, तेवी मी मुयान बोरहे पोड़ीन जोरेस आयेड़नो एने केयो, "हाय मालीक यहोवा, काय तु इस्राएल वाला वुचेल माणहाह बी खेतेम केर दिहे।"

जेलीम जायेल माणहाह बोगवानान वायदो

14 पुण बोगवानान ज्य वचन मार फाय आवो। 15 "एय माणहान सोरा, तुमरी हेऱ्या देरायेल माणहे एने दिहरा इस्राएली माणहान बाराम इस्राएलान आखा गेराणाह बी कियेल हे काय तुमू बोगवाना हेऱ्या रेन सेटा जावो; ज्य देस आमराच आदिकार माय आपाय जायेल हे। 16 केरीन तु ताह के, मालीक बोगवान इही किथे; तीबी मी तुमूह तुमरा देसाम रेन काड़ीन दिहरा देसा माय वोहाड़ेल हे, तुमूह दिहरा देसा माय खोवली दियेल हे, तीबी तुमू दिहऱ्यु जात्यु माय रिते लेन बी थोड़ीक टेमीन केरता मारी बोक्ती केर सेकतेह। 17 केरीन ता माणहाह के, मालीक बोगवान इही किथे, काय मी जाती जातीन माणहान विचीम रेन टुलो केरूह, एने जा देसा माय खोवलाय जायेल हेते, ता माय रेन तुमूह टुलो केरूह, एने तुमूह इस्राएल वाली बुय आपुह। 18 जेवी ता तान देसा माय आवती, तेवी ता ताहरी रेन खाराब मुरत्युह सेटा केर देती, एने तान आखा खाराब कामाह बी सोड़ देती। 19 ✝11:19 यहेजकेल 36:26-28 एने मी तान मोनाह एक केर देह; एने ता माय नोवालो जीव पायदा केरूह एने तान डिला माय रेन देगड़ान गेत मोन काड़ीन ताह माहान मोन आपुह। 20 तेवी ता मारा नेमाह मानती एने द्यान दिन मारा कायदा पोर चालती, एने ता मारी पोरजा बोणती, एने मी तान बोगवान बोणुह। 21 पुण ता माणहे तान मुरता एने खाराब कामा माय मोन लागाड़ीन चालती रेतेह, ताह मी ओहलो केरूह तान चाल ताच ने मुंडा पोर पोड़ी।" मालीक बोगवानान ज्यो बोल हे।

बोगवानान बोड़ाय यरूशलेम रेन सिटो एणे

22 ✝ 11:22 यहेजकेल 43:2-3 हेरोगदुत तान फाके पोसराया, एने चाकारा तान उगे एता, एने इस्राएलान बोगवानान उजालो ता पोर इतो। 23 तेवी बोगवानान उजोड़ उपेर हवा माय आवो, एने तो यरूशलेम हेयराह सोड़ दिनो, एने एक तालान केरता यरूशलेमान पुर्व उगेन बोयड़ा पोर थोबनो। 24 ओवतो जीव माहु उपेर उखल्यो, एने बोगवानान जीवान देरसेन माय माहु कसदिन देसाम देरायेल ता माणहा फाय पोचाड़ दिनो, एने जो देरसेन मी दिखेल इतो तो आरताय गीयो। 25 एने बोगवान माहु देरसेन माय जो देखाड़ेल इतो, त्यु सोब वातु मी देरायेल ताह केय दिनो।