1 एने तो माहु केयो, "एय माणहान सोरा, जो तार सोमोर हे, ताह खा, मतलब ज्यी पुस्तेकीह खा; एने जाईन इस्राएल वाला माणहा हिऱ्यो वातु केर।"

2 केरीन मी मारो मुय उगाड्यो, एने तो खाणेन माहु पुस्तेक आप्यो, 3 तेवी तो माहु केयो, "एय माणहान सोरा, जी पुस्तेक मी तुवाह आपथु, तीह खा एने तारो पेट बोर।" तेवी मी तीह खाय लिदो, एने मारा मुया माय ती मोवालान गेत गुली लागनी।

4 तेवी तो माहु केयो, "एय माणहान सोरा, एवी इस्राएली माणहा फाय जा एने ताह मारी वातु होमलाड़। 5 काहाकाय तु एगदी एनजाणी बोली नाहते केठीण बाषावाली फाय नाह मोकलाय जाथे, पुण इस्राएलान गेराणा फाय मोकलाय जाथे। 6 मी तुमूह एगदा एनजाण्या देसा माय नाह मोकेलने बाज रिनोह, जाहरी माणहे ओहली बाषा बोलतेह काय तुमू सोमजी नाह सेकते। केदी तुमू ता माणहा फाय जाहो एने ता हेऱ्या वातु किरहो; ते ता तुमरी होमेलती। पुण तुमूह ती केठीण बाषाह सोमेजणु नाय मिले। 7 पुण इस्राएल वाला माणहे तुमरी वातु होमेलने नाह होदते, काहाकाय ता मारी वातुह होमेलने नाह होदते; आखा इस्राएली तान मोनाह वातड़ो एने जिव जिवाह एकएट्या बाणाव लियेल हेते। 8 पुण मी तुमूह तान गेत मुंड नेड़ा केरनार नाह पुण वातड़ो बाणाव देह। 9 मी तुमरा मोनाह जुलूम वातड़ो बाणाव देह, चोमेकण्या देगड़ाह रेन बी वोदार वातड़ो बाणाव देह, तुमू ताह मा बिहो एने गाबराहो मा, तुमू ता माणहाह नाय बिहो जा जेलेम मार विरूद उठ जातेह।"

10 पुशो बोगवान माहु केयो, "एय माणहान सोरा, ज्यु वातु मी तुवाह केथु, त्युह द्यान लागाड़ीन हुमेल एने तारा मोना माय मेल। 11 एने ता बोंदी फाय जा, तारा जाती हेगा हेते, ताह के, मालीक बोगवान ज्यी वात किथे; ता होमली नाहते नाय होमली।"

12 तेवी बोगवानान जीव माहु उपेर उखल्यो, एने मी मार पासाण गेगड़नेन आवाज हुमल्यो, तो केयो, "बोगवानान बोड़ाय बोरकेत वाली हे।" 13 एने ता हेऱ्योच ता जेनवेरान फाखान आवाज जा एका दिहरा हेऱ्या लागताला, ता आरहीन चाकारान आवाज एक मोटलीच गड़गड़ाट होमलाय पोड़नी। 14 तेवी जीव माहु उपेर उखल्यो एने सिटो लेन गीयो, एने मारो मोन कोड़वो एने रागा माय बोराय गीयो, एने बोगवानान मोजबुत आथ मार पोर इतो। 15 मी देरायेल ता माणहा फाय आवो, जा कबार नेदीन मीरे तेलाबीब हेयरा माय रेताला, ताहरी मी जुलूम दुखी एन ता हिऱ्यो सात दिह वोर बोह रिनो।

16 सात दिह एय गीया, तेवी बोगवानान ज्य वचन मार फाय पोचनो। 17 "एय माणहान सोरा, मी तुवाह इस्राएलान माणहान केरता एक राखवाल्यो ठेरायेल हे; केरीन जी वातु मी केथु, तिह हुमेल एने ताह मार उगे रेन चेतावणी आप। 18 जेवी मी एक पापी माणहाह केव, तु जोरूर मुरहे, एने केदी तु ताह चेतावणी नाय आपहे, एने पापीह ओहली वात नाय किहे, ता माय काय तो चेकचिल्यो रेय, एने तान खाराब वाट सोड़ीन जिवतालो रेय, ते तो पापी तान पापाम फोसीन मोरी, पुण तान खुनान लेख्यो मी तार फाय लेह। 19 पुण केदी तु ता पापी माणहाह चेतावणी आपेह, एने तो तान पाप नाहते खाराब कामाह नाह सुड़ेत; ते तो तान पापा माय फोसीन मोरी, पुण तु सोताह वोचाड़ लिहे।"

20 "इह केरीन जेवी एगदो देरमी माणुह तान देरेमने काम सोड़ीन खाराब कामे केरने बाज जाय एने मी तान सोमोर रोकणार वोस्तु मेलु, ते तो मोर जाय, काहाकाय तु ताह नाह रूक्यो, केरीन तो तान पापाम फोसीन मोर जाय, एने जो देरमीन काम तो माणुह केऱ्यो एय, तो एर नाय केराय जाय, एने मी तुवाह तान खुनान जापापदार ठेरावुह। 21 पुण केदी तु ता देरमी माणहाह पाप नाय केरनेन चेतावणी आपेह एने तो पाप नाह किरेत, तेवी तो जोरूर जिवतालो रेय, काहाकाय तो चेतावणी पोर द्यान देनो एने तु सोताह वोचाड़ लिहे।"

22 ताहरी बोगवानान ताकेत मार पोर आवी, एने तो माहु केयो, "उठीन चोवगाना माय जा एने ताहरी मी तार हिऱ्यो वातु केरूह।"

23 केरीन मी उठनो एने बाहेर मोयदाना माय जात रिनो, मी दिख्यो काय बोगवानान उजोड़ ताहरी इतो; तो उजोड़ तोहलोच एतो, जोहलो मी कबार नेदीन मीरे दिखेल इतो, एने मी मुयान बोरहे जाय पुड़नो। 24 पुण बोगवानान जिव मार माय आवो, एने माहु पाया पोर उबो केर दिनो, एने तो माहु केणे बाज गीयो, "जा एने सोताह तारा गेरा माय कोंड ले। 25 एय माणहान सोरा, ता माणहे तुवाह राही केरीन बांद देती, काय तु बाहेर माणहा हिऱ्यो नाय जाय सिके। 26 मी तारी जिबीह तारा तालवा हिऱ्यो लेटकाड़ देह काय तु ठावको रिहे एने ताह जुल नाय सिकहे, काहाकाय ता राड़कुट्या माणहे हेते। 27 पुण जेवी मी तार हिऱ्यो वातु केरूह, तेवी मी तारो मुय उगाड़ देह एने तु ताह किज्ये, बोगवान यहोवान ज्य केणो हे, जो कुण होमेलतेय, तो होमली लेय, एने जो कुण निह होमेलतेय तो नाय होमली, काहाकाय ता राड़कुट केरनार गेराणान माणहे हेते।"