1 ओवतो यहोवान ज्य वचन मार फाय पोचनो, 2 "एय माणहान सोरा, तु दिंगो केरनार गेराणान विचीम रिथे, जान देखणेन केरता डोला ते हेते, पुण देख नाह सेकते; एने होमेलनेन केरता कान ते हेते पुण होमेलते नाह; काहाकाय ता दिंगो केरनार गेराणान हेते।"

3 ✝ "केरीन एय माणहान सोरा, तु तारो सोमान तियार केरीन तान देखताच तारो जागो सोड़ीन दिहरी जागे जात रिज्ये, ता दिंगो केरनार गेराणान हेते, तीबी एय सिकेह काय ता द्यान देय। 4 दिह्यान टेम माय तु तारो सोमान इह केरीन बाहेर लेन जाज्ये काय माणहे तुवाह देखती रेय, एने हांज पोर ओहलो देखाड़ने होदज्ये, काय तुमू सेटाला देसाम एक देरायेल तान गेत जाणे बाज रिनोह 5 तान देखताच बितड़ो तोड़ीन एने ताम रेन निकील जाज्ये। 6 तान देखताच ताह तारा खांदा पोर उखलीन आंदारलाम काढ़ज्ये, एने तारो मुय ढापीन मिलज्ये काय बुय बी तुवाह देखाय नाय; काहाकाय मी तुवाह इस्राएलान गेराणान केरता एक निसाणी ठेरायेल हे।"

7 ता उकुमान गेत मी तिहेच केरीन किऱ्यो, दिह्या मी मारो सोमान देरायेल तान गेत काड्यो, एने हांज पोर मारा आथा केरीन बितड़ो फुड्यो; ओवतो आंदारला माय सोमानाह काढ़ीन, तान देखताच मारा खांदा पोर उखलीन जात रिनो।

8 वेगोच बोगवानान ज्य वचन माहु जुड़नो, मालीक माहु केयो, 9 "एय माणहान सोरा, तु नाह दिख्यो काय इस्राएलान गेराणो, ता राड़कुट्यो गेराणो तुवाह ज्य बी नाह फुशा काय तु काय केरने बाज रिनोह? 10 जा ताह ज्य के, मालीक बोगवान इह केरीन किथे, यरूशलेम हेयरावाला राज केरनारे एने रेणारे सोब इस्राएली माणहान बाराम बोगवानान ज्य चेतावणी वालो वचन हे। 11 एय माणहान सोरा, तु ताह इह किज्ये, मी यहेजकेल तुमरी केरता एक निसाणी हे, जोहलो मी किरेल हे तोहलो तुमरी हेऱ्यो केराय जाय, तुमू तुमरा हियोर एने देसाम रेन काड़ाय जाहो, एने देराईन दिहरा देसाम जाहो। 12 तुमू पोर राज केरनार आंदारला माय तान खांदा पोर तान सोमान उखली एने जात रेय, तुमू बितड़ाह तुड़हो एने तो ता माय रेन निकली जाय, तान डोला पोर पाटा बांदाय जाय काय तो तान देसाह देख नाय सिके। 13 ✝ मी ता पोर मारी जाला टाकुह, एने तो मारा फासा माय फोस जाय, मी ताह कसदी देसान राजदानी बाबिलोन हेयरा माय लावुह, पुण तो ताह देख नाय सेकी काहाकाय तो आंदलो केराय जाय, एने तो मोर जाय। 14 मी ताह एने तान आदिकारीह एने तान सेनाह आखी उखीर खोवली देह, एने तालवार खेचीन तान वाह लागुह 15 जेवी मी ताह देसा देसाम जोथ तोथा केरूह, एने देसाम खोवली देह; तेवी ता जाण जाती काय मीच बोगवान हे। 16 पुशो मी ता माय रेन थोड़ाक माणहाह तालवार, काल बेमारी माय रेन वोचाड़ीन मेलुह; एने ता तान खाराब कामान बाराम देसाह केय होमलाड़ती जान विचीम ता पोचती; तेवी ता जाण लेती काय मी यहोवा हे।"

17 पोशो बोगवानान वचन माहु जुड़नो, मालीक माहु केयो, 18 एय माणहान सोरा तु बिन कापती लेन रूटो खाज्ये, एने बिन थुर-थुर कापती लेन पाणी पिज्ये

19 तेवी तु तारा देसाम रेणाराह इह किज्ये, इस्राएल देसान राजदानी यरूशलेम माय रेणारान बाराम मालीक बोगवान इह किथे, तुमू आखा हेयराम देंगान कामे केरतेह, केरीन तुमरो देस उजाड़ एय जाय, एने बिन कापती लेन रूटो खाहो, एने पाणी पिहो 20 वोहेल हियोर उजड़ी जाती, एने देस बी उजाड़ एय जाय, तेवी तुमू जाण लिहो काय मी यहोवा बोगवान हे।

21 पोशो बोगवानान ज्य वचन मार फाय पोचनो, 22 एय माणहान सोरा, इस्राएल देसा माय ज्यी पोड़ काहा केय होमलाड़तेह; "पिढ़ा सेटकीह नाय आवी, एने देरसेनान काल्ली वात केदी पुरी नाय एय? 23 केरीन ताह के, मालीक बोगवान इही किथे, मी ज्यी पोड़ बोंद केर देह; एने ज्यी पोड़ इस्राएल पोर पोशी नाय चाली। एने तु ताह के काय तो दिह आहने आव लागेल हे, एने देरसेनान आख्‍यु वातु पुऱ्यू एय जाती।"

24 काहाकाय एवी रेन काल्लो बी माणुह जुठो देरसेन एने तान मोनाम हाजो बाकता हुगोणान विचार नाय केरी। 25 काहाकाय मी बोगवान हे, जुलबुखे मी बोलुह एने जो वचन मी केव, तो पुरो एय, ता माय वार नाय लागे, पुण राड़ केरनार गेराणे, तुमरीच टेम माय मी मारो वचन केह एने तो पुरो एय जाय, मालीक बोगवानान ज्यो बोल हे।

26 बोगवानान वचन माहु पोशो जुड़नो, बोगवान माहु केयो, 27 "एय माणहान सोरा, देख, इस्राएली गेराणान माणहे इह केतेह, जो देरसेन जाणकार दिखेह, तान वातु जुलूम दिह्याम पुरी एती। तान जाणाव सेटाला बोविष्यान केरता हे। 28 केरीन तु ताह इह के, मालीक बोगवान इह केरीन किथे, मारा वचनाह पुरो एणेन वार नाय लागे, जो मी केथु, तो जोरूर पुरो एय, मालीक बोगवान ज्य किथे।"