1 पोशो बोगवानान ज्य वचन मार फाय पोचनो। 2 "एय माणहान सोरा, यरूशलेमाह तान सोब खाराब कामे जा तो किरेल हे किय दे।" 3 तु ताह के, एय यरूशलेम, मालीक बोगवान तुवाह इही किथे,

"तारो जेल्मो कनान देसाम एनो; एने तारो आबोख एक एमोरी जातीन एने तारी आहख एक हित्ती जातीन एती। 4 यरूशलेम, जेदिह तु पायदा एनी, तारो नाल काटणार कुण नाह एतो, एने कुण तार पोर मिठ नाह टाक्‍यो एने तुवाह चोखो केरनेन केरता उंगलायो नाह, कुणूस तुवाह फाड़काम नाह चोंडाल्यो। 5 तुवा पोर कुण किव नाह केऱ्यो, एने नाह तार बाराम गिण केरीन तारो नाल काट्यो। तुवाह चोखो केरनेन केरता पाण्या केरीन नाह उंगलायो, एने तुवाह मिठा केरीन नाह चोल्यो, एने नाह तुवाह फाड़काम चोंडाल्यो, तु तेदिह, जेदिह तु पायदा एनी, तुवाह खाराब वोस्तु सोमजीन खेताम जुगाराय गीयो।"

6 जेवी मी तार हिऱ्यो रेन सिरीकनो, तेवी मी तुवाह लुयीम लोथपोत दिख्यो, तेवी मी केयो, "एय लुयीम लोलनार! जीवताली रे, 7 ओवतो मी तुवाह खेतावाला टोटालान गेत वोदाड्यो, एने तु पोहाएन जुवान एय गियी, एने तारी सात्यु मोठ्यु एन्यु एने तारा लेट्या लांबा एय गीया, तीबी तु उगाड़लीच एती।"

8 "मी तार पोर निजेर टाकीन दिख्यो, काय तु मोंगीन केरता तियार एती, केरीन मी मारा फाड़का टाक्‍यो एने तारा सेरीराह डाप्यो, एने तार हिऱ्यो वाराड़ केरनेन वचन आप्यो, मी तार हिऱ्यो वाचा बांद्यो, एने तु मारी बोण गियी, मालीक बोगवानान ज्यो बोल हे।"

9 तेवी मी तुवाह पाण्या केरीन उंगलावीन तार पोर रेन लुय दोव दिनो, एने तारा डिला पोर तेल चुपड्यो। 10 मी तुवाह एक हाजालो पेरावोट एने हुवाला चामड़ान चाट्या पेरायो, एने मी तुवाह हुवाला एने जामण्या फाड़का पेरायो। 11 तेवी मी तुवाह गेयणो आप्यो, एने तारा आथाम बांगड्यु एने गेलाम हार पेरायो। 12 ओवतो मी तारा नाकाम नाथनी एने तारा कानाम कानावाला पेरायो, एने तारा मुंडा पोर होबातो मुकूट पेरनेन केरता आप्यो। 13 मी तुवाह होना चांदीन गेयणा केरीन हिंगार दिनो, एने तारा फाड़का सुती हुवाला रेशमान एता, जा सितरायेल एता, तु मोयदान रूटो, एने मोवाल एने तेलाम चुड़ेल खाणो खाताली, तु जुलूम हाजी एती एने तु राणी बोणनी। 14 एने तारी होबायीन कारेण तारी बोम जाती जातीन माणहाम पोसरी गियी, काहाकाय मी तुवाह जी होबा मारी उगे रेन आपेल इतो, तु जुलूम गाटाली एती, मालीक बोगवानान ज्य वचन हे।

15 "पुण तु तारी होबाय एने बोम ने कारेण फायदो विसीन तार हेऱ्या आवणारे आखा माणहा हेरी सिनालो केरी। 16 तु तारा फाड़का केरीन रेंगी बिरेंगी उचाला जागा बाणाव लेदा, एने ता पोर सिनालो केरी, ओहला खाराब कामे केरी जा केदी नाह एना एने नाय एती। 17 जो होनो चांदीन हाजालो गेयणो मी तुवाह आपेल एता, तु ताकेरीन माणहान चित्रा बाणायी, एने ता चित्रा हेरी खाराब कामे केरी। 18 एने तारा सितरायेल फाड़का लावीन ताह पेराया, एने मारो तेल एने दुणी तान सोमोर चेड़ायी 19 एने जो खाणो बी मी तुवाह खाणेन केरता आपेल इतो, फिट, जेतुन तेल एने मोवाल तु ज्याह तान सामने एक गेंदाणी दुणीन गेत चेड़ायी।" बोगवानान ज्यो बोल हे, ओहलोच ईयेल हे।

20 "पोशी तु तारा सोरा सोऱ्युह जाह तु मार केरता जेल्मो दियेल एती, लावीन मुरताह बोली केरीन चेड़ायी, काय तारो सिनालो ओहली आतीच वात एती? 21 काय तु मारा सोरा पोऱ्याह ता मुरतान ओंगाण आक्ठाम चेड़ावीन मारेल हे? 22 एने तारा सोब खाराब कामाम एने सिनालो किरते लेन, तारा सोरा पोणान दिह्याह केदी एर नाह केऱ्यी, जेवी काय तु उगाड़लीच तारी लुयीम लोलताली।"

23 मालीक बोगवानान ज्यो बोल हे, "हाय, तार पोर हाय! तारी ती सोब खाराबीन पासाण काय एनो? 24 तु तार केरता एक चुटो बाणाव लेदी, एने आखा चौकाम एक उचालो जागो बाणाव मांगी; 25 एने आखी गेल्ल्युन कोपराम तु पुजान जागो बाणावीन ताहरी लागता जाणार माणहान तारी होबा देखाड़ीन रांडीन गेत बोण गियी। 26 तु तारा आहनेवाला मिस्र देसान माणहा हेरी बी सिनालो केरी, एने इही तारा जुलूम होवटा सिनालान कामा केरीन मारा रागाह बोड़कायी।" 27 "केरीन देख, मी तार पोर आथ उठावीन तुवाह देन्ड आप्यो, तारो खास हेक से सिटो किर दिनो एने तारी दुसमोन पलिश्‍ती बायकु ज्यु तारा मोटला पापान चाल देखीन लाजवात्युह, त्युन मोरजी पोर मी तुवाह सोड़ दियेल हे।"

28 "तु अश्शुरी माणहा हेरी बी सिनालो केरी, पुण तु ता हेरी सिनालो केरीन बी तारी बुख नाह ओलानी। 29 ओवती तु लेणो देणो केरनार देसाम बी सिनालो किरती किरतीन कसदिन देसाम वोर पोचनी, एने ताहरी बी तारी बुख नाह ओलानी।"

30 मालीक बोगवानान ज्यो बोल हे, "जेवी तु इह केरीन एक विणलाजी रांडीन गेत काम किरेह, ते मी रागाम बोराय जाथु। 31 तु आख्‍यु सेड़क्युन कोपरा माय जो तारा चुटा, एने आखा चौका माय उचाला जागा बाणवायेल हे, काय तु वेश्यान गेत नाह बोणनी? काहाकाय तु ओहली कामाय पोर आहेह। 32 तु सिनाली बायकु हे! तु तारा सोतान एदम्यान बोदले पाराया एदम्याह वोदार पसंद किरेह। 33 आख्‍यु वेश्या ते पोयशा लेत्युह, पुण तु ते सोता तारा हातीह पोयशा आपीन, लालुच देखाड़ीन पाराया एदम्याह हादाड़ेल हे, काय कावदेन आवीन तार हेऱ्या सिनालो केरी। 34 इह केरीन तारो सिनालो दिहरा सिनाल्याह रेन उलटो हे, तारो पासाण काल्लो सिनाल्यो नाह चालेत, एने तु कुणी फाय किमोत नाह लेत, पुण सोताच पोयशा आपेह; केरीन तु उलटी हे।"

35 केरीन ओ वेश्या, बोगवानान वचन हुमेल,

36 मालीक बोगवान इह केरीन किथे, "काय तु जी सिनाला माय जुलूम विणलाजी बोणीन, तारो सेरीर तारा हातीह देखाड़ी, एने तारा मुरता हेरी खाराब कामे केरी, एने तारा सोरा पोऱ्यान लुय वोयाड़ीन ताह बोली चेड़ायेल हे। 37 केरीन मी तारा ता सोब हातीह टुलो किरन्यो हे, जा हेरी तुवाह खुसी जुड़नी, जाह तु मोंग किरेल हे, एने जाह तु खाराब जाणेल हे, मी ताह चारो उगे रेन तार विरूद टुलो केरूह एने तान सोमोर तारा फाड़का काडुह एने ता तारो उगाड़लो डिल देखती। 38 जो देन्ड सिनाली बायकु एने खुनी बायकुह आपाय जाथे, तोच देन्ड मी तुवाह आपुह, मी राग एने एतखाय माय तारी लुय वोयाडुह। 39 इह केरीन मी तुवाह तान ताबाम केर देह, एने तारा चुटाह ओदार देह, एने तारा उचाला जागाह तोड़ देती; ता तारा फाड़काह काड़ती, एने तारा होबाता गेयणाह लुट लेती एने तुवाह उगाड़ली केरीन सोड़ देती।"

40 "ता तान होवटाली सेना लेन तार पोर चेड़ाय केरती, ता तुवाह देगड़ा केरीन देती एने तालवारी केरीन तुकड़ा तुकड़ा केरती। 41 ता तारा गेराह हेलगाड़ देती, एने तुवाह जुलूम बायकुन देखताच देन्ड आपती; एने मी तारो सिनालो बोंद केरावुह, एने तु पोशी सिनालान केरता किमोत नाय आपहे। 42 तेवी तार विरूद मारो राग ओलाय जाय एने तार पोर मारी एतखायीन राग जात रेय; मी ठावको एय जाह एने पुशो राग नाय केरू। 43 तु जा तारा सोरा पोणान दिह एर नाह मेल्या, पुण ज्यु सोब वातु केरीन माहु खिज लागाड़ी; केरीन मी तारो चालचलन तारी मुंडी पोर टाकुह एने तु तारा पासाणल्या सोब खाराब कामाह रेन पोशी वोदार मोटला पाप नाय किरहे।" मालीक बोगवानान ज्यो बोल हे।

44 तेवी बोगवान केयो, "तार बाराम वातु केरनारे सोब माणहा फाय एक पोशी केणेन केरता रेय, ता केती, जोहली आहख तोहली बेटीख। 45 तु तारी आईख ने सोरी हे, तु तारा एदमी नाहते ते सोराह इरेत नाह, तु हुतरी तार बोणीख ने गेत हे, तुमू दुयू तुमरा एदम्याह एने सोराह नफरत केऱ्यु, तु हुतरी तारा आईख आबाख ने गेत हे, तारी आहख हित्ती एने तारो आबोख एमोरी इतो।"

46 "तारी बोणीख शोमरोन हे, जी तीन सोऱ्यु हेरी तारी जिवड़े उगे रिथे, एने तारी आतली बोणीख, जी तारी डाखरी उगे रिथे, ती सोऱ्यु हेरी सदोम हियोर हे। 47 तु निस्ती तान पायान निसाणी पोर चालीन तान खाराब कामान नेकेल केरी, पुण उतवालीच तु तारा सोब कामा माय ताह रेन बी वोदार एठी एय गियी।"

48 मालीक बोगवानान ज्यो बोल हे, "मारा जीवणान सुगोण, तारी बोणीख सदोम तीन सोऱ्यु हेरी तारी एने ताऱ्यु सोऱ्युन गेत काम नाह केऱ्यु। 49 देख, तारी बोणीख सदोम ने पाप ज्यो इतो, काय ती तीन सोऱ्यु हेरी मोठाय केरताली, एने पेट बोरीन खाताली एने हुकेह रेताली; एने गेरीब माणहाह नाह होमालताली। 50 एने ती मोठाय केरीन मार सामने खाराब कामे केरने बाज गियी, एने ज्य देखीन मी त्युह सिटो केर दिनो। 51 पोशी शोमरोन तारा पापान आदा बी पाप नाह केऱ्यी, तु ते तीह रेन वोदार खाराब काम केऱ्या, एने तारा खाराब कामा द्वारा तारी तुलना माय तारी बोणीख निर्दोस ठेरायेल हे। 52 केरीन तु तारी बोणह्युख ने न्यायनिवाड़ो केऱ्यी, केरीन लाजवाय, काहाकाय तु त्युह रेन वोदार खाराब पाप किरेल हे; केरीन त्यु तुवाह रेन कोम गुनेगार बोणन्यु। केरीन तु ज्यी वातुन केरता लाज केर एने लाजवाते रे, काहाकाय तु तारी बोणह्युख कोम गुनेगार ठेरायेल हे।"

53 तेवी बोगवान यरूशलेमाह केयो, "मी सदोम एने त्युन बेट्युख जीवन, एने शोमरोन एने त्युन बेट्युख ने जीवणो एने ता हेऱ्योच तारो जीवणो बी बोदलुह। 54 जा से तारी मोठाय टुट जाय, एने तारा आखा कामाह देखीन लाजवाय; काहाकाय तु तान सांतीन कारेण बुणेल हे। 55 इह केरीन तु एने तारी बोणह्युख पोशु बाणवाय जाती, सदोम एने त्युन चार उगेन हियोर, शोमरोन एने तान चार उगेन हियोर एने तु एने तारी चार उगेन हियोर पोशा बाणवाय जाती। 56 तारा मोठायीन दिह्याम, जेवी तारा पापे नाह देखायेल एता, तेवी तु तारी बोणीख सदोमान नाव वोर नाह लेणे होदताली। 57 तिहेच केरी, एवी तु एदोमान बेट्युख एने त्युन आहनेवाल्यु एने पलिश्तीन बेट्युख ने एने तारी चार उगेन माणहान उगे रेन खाराब सोमजाय जाथे। 58 पुण एवी तुवाह तारा मोटला पापान केरता पिढ़ा उखेलने पोड़ी, जा तु केरी।" बोगवानान ज्यो बोल हे।

59 मालीक बोगवान ज्य किथे, "मी तार हिऱ्यो ओहलोच वेवार केरूह, जोहलो तु किरेल हे, काहाकाय तु ते वाचा तोड़ीन मारो सुगोणान मान नाह मेली। 60 तीबी मी तारा सोरा पोणान दिह्यान मारी वाचा एर केरूह, एने तार हिऱ्यो जेलेमक्यी वाचा बांदुह। 61 मी तारी बोणह्युख तार फाय लावुह एने मी त्युह तारी बेटह्युख बाणावुह, ज्य आपणी वाचाम नाह एतो, पुण मी तार केरता केरूह, तेवी तु ता मोटला पापाह जाह तु किरेल एर केरीन लाजवाहे बी। 62 इही केरीन मी तार हिऱ्यो मारी वाचा बांदुह, एने तुमू जाणहो काय मी बोगवान हे, 63 तेवी मी तारा खाराब कामाह माफ केरूह, तेवी तु एर किरहे एने लाजवाहे एने लाजीन माऱ्यी मुय बी नाय उगाड़हे, ज्य ती टेम माय एय, जेवी मी तारा सोब पापाह डापुह।" मालीक बोगवानान ज्यो बोल हे।