यहेजकेल 41

1 ओवतो तो एदमी माहु मोंदिरान जागे ली गीयो, एने तान दुयू उगेन खांबाह मापीन सोव सोव आथ काड्या, ज्यी ते तोम्बुन चोवड़ाय एती। 2 बायणान चोवड़ाय दोह आथान एती, एने बायणान दुयू उगे बितड़ान चोवड़ाय पाच पाच आथान एती; तो माहु मोंदिरीन लांबाय मापीन चालीह आथान एने तान चौड़ाय विह आथान एती। 3 तेवी तो माय जाएन, बायणान खांबाह माप्यो, एने दुय दुय आथान एतो; एने बायणो सोव आथान एतो; एने बायणान चोवड़ाय सात आथान एतो। 4 तेवी तो मायवाला गेरान लांबाय एने चोवड़ाय विह विह आथ निकेलनी; एने तो माहु केयो, "ज्यो ते जुलूम चोखालो जागो हे।"

मोंदिरान खोल्यु

5 पुशो तो गेरान बितड़ाह मापीन सोव आथ निकेलनो, एने गेरान आहने पाहने चार चार आथ चोवड़ी बाहेरली खोल्यु एत्यु। 6 ज्यु बाहेरल्यु खोल्यु तीन ताल्यु एत्यु; एने एक एक मेहलाम तीस तीस खोल्यु एत्यु। गेरान आहने पाहने बितड़ो ज्यान केरता एतो काय बाहेरली खोल्यु तान आसरे रेय; ताच माय खोल्युन केड्यु बोहाड़ेल एत्यु एने गेरान बितड़ान आसरे नाह एती। 7 गेरान आहने पाहने ज्यु खोल्यु बाहेर एत्यु, त्यु माय रेन ज्यु उपेर एत्यु, त्यु जुलूम चोवड्यु एत्यु; मतलब गेरान आहने पाहने जो काय बुणेल एतो, जीहे जीहे उपेरली उगे चिड़ते गीयो तिहे तिहे चोवड़ो इते गीयो; इही केरीन, ज्या गेरान चोवड़ाय उपेरली उगे वोदेल एती, एने माणहे नेचली तालीन विचीम रेन उपेरली ताली माय चेड़ सेकताला। 8 पुशो मी गेरान आहने पाहने उचाली बुय दिख्यो, एने बाहेरल्यु खोल्युन उचाय जोड़ वोर सोव आथान वाहण्यान एती। 9 बाहेरल्यु खोल्युन केरता जो बितड़ो एतो, तो पाच आथ जाड़ो एतो, एने जो जागो ठाल्लो रेय जायेल इतो, तो गेरान बाहेरल्यु खोल्युन जागो इतो। 10 बाहेरल्यु खोल्युन विच विचीम गेरान आस पास विह आथान गालो एतो। 11 बाहेरल्यु खोल्युन जागो ता जागा उगे इतो, जो ठाल्लो इतो, मतलब एक बायणो उत्तर उगे एने दिहरो देक्षिण उगे एतो; एने जो जागो रेय गीयो, तान चोवड़ाय कावदेन पाच पाच आथान एतो।

बुड़ता उगेवालो गेर

12 पोशो जो गेर मोंदिरान पश्‍चिम उगे खोलीन सामने इतो, तो सेत्तेर आथ चोवड़ो इतो; एने गेरान आस पास ने बितड़ो पाच आथ जाड़ा एतो, एने तान लांबाय नोव्वद आथान एती।

मोंदिरान पुरो माप

13 तेवी तो गेरान लांबाय मापीन होव आथ वोर किऱ्‍यो, एने बितड़ा हेऱ्योच खोलीन बी लांबाय माप्यो ते होव आथ एती। 14 मोंदिरान सामनेवालो पुर्वी ईसो एने तान खोली होव आथ चोवड़ी एती। 15 पोशो तो पासाणल्यी खोलीन सामनेवालो बितड़ान लांबाय जान उगे दुयू उगे साजा एता, माप्यो होव आथान काड्यो; एने मायवालो गेर एने खोलीन ओटलाह बी माप्यो।

मोंदिरीन हिंगार

16 तेवी तो ओटला एने जालीवाली खिड़क्युन, एने आहने पाहनेन तीन तालीन साजाह माप्यो जो ओटलान सामने एतो, एने कावदेन तान चोवकट बांदायेल एता; एने बुई रेन खिड़क्यु वोर एने खिड़क्युन आहने पाहने सोब चोवकट बांद मिलेल एतो। 17 ओवतो तो बायणान उपेरल्यो जागो मायवाला गेराम वोर तान बाहेर बी एने आहने पाहनेन आखा बितड़ा माय एने बाहेर बी माप्यो। 18 ता माय करूब एने खजुरान जाड़ ओहला सितरायेल एता, काय दुय दुय करूबान विचीम एक एक खजुरान जाड़ एतो; एने करूबान दुय दुय मुख एता। 19 इह केरीन एक एक खजुरान एक उगे माणहान मुख बाणायेल एतो, एने दिहरी उगे जुवान सिंहान मुख बाणायेल एतो, इह केरीन आखा गेरान कावदेन बुणेल एतो। 20 बुई रेन ते बायणा पोर वोर करूब एने खजुरान जाड़ सितरायेल एता, मोंदिरान बितड़ो इह केरीन बुणेल एतो।

लाकड़ान वेदी

21 गेरान बायणान खांब चोवकेण्या एता, एने चोखाला जागान सामने वेदीन गेत काह एतो। 22 तो लाकड़ान वेदीन गेत एतो, एने तान उचाय तीन आथ, एने लांबाय दुय आथ एती; एने तान कोपरा एने तान आखो पाट एने अलंग बी लाकड़ान एता, एने तो माहु केयो, "ज्य ते यहोवान सामनेवालो पाटलो हे।"

चोखाला जागान बायणो

23 मोंदिर एने चोखाला जागान बायणान दुय दुय किवाड़ा एता। 24 एने आखा किवाड़ाम दुय दुय वोलनारे पेल्ले एता, आखा किवाड़ान केरता दुय दुय पेल्ले। 25 जीहे मोंदिरान बितड़ा माय करूब एने खजुरान जाड़े सितरायेल एता, तिहेच केरीन किवाड़ा माय बी एता, एने ओटलान बाहेरली उगे लाकड़ान जाड़ जाड्यु देरने एता। 26 ओटलान दुयू उगे जालीवाली खिड़क्यु एत्यु एने खजुरान जाड़े सितरायेल एता; एने गेरान बाहेरल्यु खोल्यु एने जाड़ जाड्यु देरने बी एता।