यहेजकेल 29

मिस्र देसान राजान विरूद जाणाव

1 दोहवा वोरह्यान बारावे दिह्याह बोगवानान ज्य वचन मार फाय पोचनो, 2 "एय माणहान सोरा, तारो मुय मिस्र देसान राजा फिरोनान उगे केरीन तान एने आखा मिस्री माणहान विरूद जाणाव केर; 3 इही केरीन के, बोगवान यहोवा किथे, एय मिस्र देसान राजा फिरोन, मी तार विरूद हे, एय मोटला मुगोर, तु तारी नेदीन विचीम पोड़ रिथे, जो किथे, ज्यी नेदी मारी सोतान हे, एने मीच ज्यीह मार केरता बाणायेल हे। 4 मी तारा जोबाड्या माय आकड़ा टाकुह, एने तारी नेद्युवाला मासाह तारी खाल माय चिटकाडुह, एने तारी खालीम चिटकेल तारी नेद्युन मासा हेऱ्योच तुवाह तारी नेद्युम रेन काडुह। 5 तेवी मी तारी नेद्युन आखा मासा हिऱ्योच जेंगलाम काड़ देह, एने तु मोयदानाम पोड़ रेय; किहीक बी केरीन तारी एर नाय केराय जाय, मी तुवाह जेंगली जेनवेरान एने जुगावाला चिड़ान खाणो बाणाव देह। 6 तेवी मिस्र देसाम रेणारे जाण लेती काय मी यहोवा हे।"

ता ते इस्राएलान गेराणान केरता नेरकान टेक बुणेल एता। 7 जेवी ता तुवाह आथा केरीन देऱ्या ते तु टुट गीयो, एने ता जाय पोड़ना, एने तान खांदे जेखमी एय गीया, एने तान कोमरान नेहु हुज गीयु। 8 केरीन बोगवान यहोवा इही किथे, देख, मी तार पोर तालवार चालाड़ीन, तारा माणहे एने जेनवार, सोबाह खेतेम केरूह। 9 तेवी मिस्र देस उजाडुच उजाड़ रेय; एने ता जाण लेती काय मी बोगवान हे,

काहाकाय तु कियेल हे, "मारी नेदी मारी सोताच ने हे, एने मीच त्युह बाणायेल हे। 10 केरीन देख, मी तार एने तारी नेद्युन विरूद हे, एने मिस्र देसाह मिग्दोल रेन सेवेने वोर पुण कुश देसान एद्दी वोर उजाडुच उजाड़ केर देह। 11 काल्लो माणुह नाहते जेनवार ता माय चालीह वोरह्या वोर पाय बी नाय मेलती, एने नाय ता माय वोहती। 12 चालीह वोरह्या वोर मी मिस्र देसाह उजड़ेल देसान विचीम उजाड़ केर मेलुह; एने तान हियोर उजाड़ हेयरान गेत उजाड़ एय जाती, एने मी मिस्री माणहाह देसा देसाम आंग आंगे केर देह, एने देसा देसाम खोवली देह।"

13 बोगवान यहोवा इही किथे, "चालीह वोरह्या एय जाती तेवी मी मिस्री माणहाह ता देसान विचीम टुलो केरूह, जा माय ता खोवलाय जायेल एता। 14 एने मिस्री माणहाह जेलीम रेन सोड़वीन पत्रोस देसाम, जी तान जेल्मो बुय हे, ताहरी पुशो पोचाडुह; एने ताहरी तान आत्योच राज बोण जाय। 15 तो आखा राज्याम आत्यो रेय, एने पुशो तान मुंड दिहरा देसान सोमोर उचो नाय केर सेकी, काहाकाय मी मिस्री माणहाह ओहलो आरतावु काय ता देसा देसा पोर राज केर नाय सेकती। 16 तो पोशो इस्राएलान गेराणान बुरहो नाह केरनेन वोजेसे नाय रेय, काहाकाय जेवी ता तान उगे देखणे बाज जाती, तेवी ता तान पापाह एर केरती, तेवी ता जाण लेती काय मी बोगवान यहोवा हे।"

राजा नबूकदनेस्सर राजा मिस्र देसाह आरावी

17 पोशो सत्ताविसवा वोरह्यान पेल्ला मोयनान पेल्ला दिह्याह बोगवानान ज्य वचन मार फाय पोचनो। 18 "एय माणहान सोरा, बाबिलोन ने राजा नबुकदनेस्‍सर सोर हेयराह कोंडणेन तान सेनाह जुलूम मेहनेत केरायो; आखान मुंडे चापड़ा एय गीया, एने आखान खांदान चामड़ा होलाय गीया; तीबी ताह सोर हेयरा माय रेन नाह ते काय मोंजरी जुड़नी, एने नाह तान सेनाह। 19 केरीन बोगवान यहोवा इही किथे, देख मी बाबिलोन ने राजा नबुकदनेस्सराह मिस्र देस आपुह, एने तो तान बिड़ीह लेन जाय, एने तान मालदेन लुटीन तान केर लेय; तेवी ज्यी मोंजरी तान सेनाह जुड़ी। 20 मी तान केचटान बोदला माय ताह मिस्र देस केरीन आपेल हे काय ता माणहे मार केरता काम किरेल एता, बोगवान यहोवान ज्यो बोल हे।"

21 "ते दिहच मी इस्राएलान गेराणा माय एक ताकेतीन हिंग बाणावुह, एने तान विचीम तारो मुय उगाडुह, तेवी ता जाण लेती काय मी बोगवान हे।"