यहेजकेल 32

मिस्र राजान तुलना मोगरा हेऱ्यी

1 बारावा वोरह्यान बारावा मोयनान पेल्ले दिह बोगवानान ज्य वचन मार फाय पोचनो, 2 "एय माणहान सोरा, मिस्र देसान राजा फिरोनान बाराम दुखान गीत बाणावीन ताह होमलाड़, देसा देसाम तारी गेणती जुवान सिंहा हेरी आपाय जायेल एती, पुण तु देरीयान मोगरान गेत हे; तु तारी नेद्यु माय टुटीन पोड़नो, एने तान पाण्याह पाया केरीन डोलसीन डुवलो केर दिनो। 3 बोगवान यहोवा इही किथे, मी जुलूम देसान पोंचान द्वारा तार पोर जाल पोसरावुह, एने ता तुवाह मारी मोटली जालीम खेच लेती। 4 तेवी मी तुवाह बुई पोर सोडुह, एने मोयदाम टाकीन जुगावाला चिड़ाह तार पोर बोहाडुह एने तारो माह खावाड़ीन आखी देरतीन जेनवेराह आफरावुह। 5 मी तारा माहाह बोयड़ा पोर मेलुह, एने खोयराह तारी उचायीम बोर देह। 6 जा देसाम तु जिफेह, ताह बोयड़े वोर मी तारी लुय पाडुह; एने तान खोदरे तारी लुयीम बोराय जाती। 7 जी टेम माय मी तुवाह आरतावणे बाज जाव, ती टेम माय मी जुगाह डापुह एने ताराह आंदाराला केर देह; मी दिह्याह वादलाम लिकाडुह, एने चांद तान उजेड़ नाय आपी। 8 जुगा माय जोला उजालो आपणार दिवा हेते, ता सोबाह तारी कारेण आंदरला केर देह, एने तारा देसाम आंदारो केर देह, बोगवान यहोवान ज्यो बोल हे।"

9 "जेवी मी तारा खेतेमान खुबेर जाती जातीम एने एंजाण्या देसाम पोसरावुह, तेवी मोठ मोठा देसान माणहान मोनाम राग पायदा केरूह। 10 मी जुलूम देसाह तार कारेण बोंगलाड़ देह, एने जेवी मी तान राजान सोमोर मारी तालवार मोकलुह, तेवी तार कारेण ता बिन कापणे बाज जाती, एने तारो पोड़नेन दिह ता जान तान जिवान केरता कापती रेती।"

11 काहाकाय बोगवान यहोवा इही किथे, "बाबिलोन ने राजान तालवार तार पोर चाली। 12 मी तारी बिड़ीन माणहाह ओहला बाहदेरान तालवारी केरीन पाड़ावुह जा सोब देसाम रेन बिवाड़े ओहला हेते, ता मिस्र देसान मोठायीह तोड़ती, एने तान आखी बिड़ीन माणहाह खेतेम केर देती। 13 मी तान आखा जेनवेराह, नेदी खोदरान मीरे रेणार जीवजेन्तुह खेतेम केर देह, तेवी आवता दिह्याम ता नाय ते माणहान पाया केरीन एने नाय ते जेनवेरान खुऱ्या केरीन डुवलो केराय जाती। 14 तेवी मी तान पाण्याह आसो केर देह, एने तान नेद्यु तेलान गेत वोयती, बोगवान यहोवान ज्यो बोल हे। 15 जेवी मी मिस्र देसाह उजाड़ केर देह एने जा मालदेनाम तो बोरपुर हे, ताह ठाल्लो केर देह, एने जेवी मी ता माय रेणार सोबाह मारूह, तेवी ता जाण लेती काय मी बोगवान हे। 16 माणहान रेड़नेन केरता दुखान गीत ज्योच हे; देसा देसान बायकु ज्याह गावती; मिस्री एने तान आखी बिड़ीन माणहान बाराम त्यु ज्योच दुखान गीत गावती, एने बोगवान यहोवान ज्योच बोल हे।"

मुरेलान दुनिया

17 पोशो बारावा वोरह्यान पेल्ला मोयनान पोंदरावे दिह्याह बोगवानान ज्य वचन मार फाय पोचनो, 18 "एय माणहान सोरा, मिस्र देसान होवटाली पोरजान केरता रेड़, मिस्र देस एने ताकेतवाला देसान सोऱ्यु हेऱ्युच माहणाम बुजायेल फाय आंदारकेली माय उतार देय।" 19 ताह के;

"एय मिस्र देस तु कुणाह रेन मुठो हे?

तु उतरीन बिगेर खेतनावाला हिऱ्यो पोड़ रिनो।"

20 "ता तालवारी केरीन मारायेल मुरदान विचीम पोड़ती, एने ता हेरीच तान होवटाली पोरजा बी मोरीन पोड़ रेय। 21 सेनापती बाहदुर ता हेऱ्या एने तान मोदेक केरनारा हेऱ्यो आंदारकेलीम वातु केरती; ता बिगेर खेतनान माणहे ताहरी तालवारी केरीन मारायीन पोड़ रेनाह।"

22 तान आखा पोंचा हेऱ्योच अश्शुर बी ताहरी हेते, तान माहणे तान कावदेन हेते; आखान आखा तालवारी केरीन माराय गीया। 23 तान माहणे खाडान कोपराम बुणेल हेते, एने तान माहणान कावदेन तान सेना हे, ज्या सोब तालवारी केरीन माराय जायेल हेते, तान खुन तालवारी केरीन इयेल हे, ज्या जीवताला माणहाम दिंगो पोसरावताला।

24 "दिखो न्याहरी एलाम बी पोड़ रिनोह, तान माहणान कावदेन तान पोरजा हे, ज्या सोब तालवारी केरीन माराय जायेल हेते, तान खुन तालवारी केरीन इयेल हे, एने ज्या जीवताला माणहाम दिंगो पोसरावताला, एने एवी बिगेर खेतनान देशाम आंदारकेली माय पोड़ रेनाह, ज्या माहणाम जाणारा हेऱ्या ओबरून बार उखेल रेनाह। 25 एलाम एने तान आखी सेनाह मारायेल तान विचीम हुवाड़ दियेल हे, कावदेन तान माहणे हेते, ज्या सोब बिगेर खेतनान हेते एने तालवारी केरीन माराय जायेल हेते, ता जीवताला माणहाम दिंगो पोसराव मिलेल एता, एने एवी माहणाम जाणारा हेऱ्या आपमानान बार उखेलने बाज रेनाह। ताह मारायेल तान विचीम जागो जुड़ेल हे।"

26 ताहरी मेशेक एने तुबल बी हेते, एने ता हेरी तान होवटाली सेना बी हे, कावदेन तान माहणे हेते, ता बिगेर खेतनान हेते, एने तालवारी केरीन माराय जायेल हेते, ता जीवताला माणहाम दिंगो पोसराव मिलेल एता। 27 ता पुड़ेल बिगेर खेतनान बाहदुरा हेऱ्या पोड़ नाय रेती, जा जीव जीवान लेड़ायीन आथ्‍यार लेन आंदारकेलीम उतरी जायेल हेते, ताहरी तान तालवार तान मुंडी बुंदे मिलेल हेत्यु; एने तान पापान काम तान आड़ाम मिलेल हे; काहाकाय जीवताला माणहाम तान दिंगो पोसरी रियेल इतो।

28 केरीन तु बी बिगेर खेतनावाला हिऱ्यो नांगोन बुंगो बोणीन तालवारी केरीन मारायेल ता हिऱ्यो पोड़ रिहे।

29 ताहरी एदोम एने तान राजा एने तान आखा मुखी हेते, जा बाहदुर एता तीबी तालवारी केरीन मारायेल ता हेऱ्या मेलाय जायेल हेते; खाडाम गाड़ाय जायेल बिगेर खेतनावाला माणहा हेऱ्या ता बी पोड़ रेती।

30 ताहरी उत्तर दिशान आखा मुखी एने आखा सीदोनी माणहे बी हेते जा मुरेल ता हेऱ्या उतरी गीया; ता तान बाहदुरी केरीन बिय पायदा किरेल हेते, पुण एवी ता लाजवाना एने तालवारी केरीन एने मुरेल ता हेऱ्या, ता बी बिगेर खेतनान पोड़ रेनाह; माहणाम दिहरा गाड़ायेल ता हेऱ्या आपमानान बार विसणे बाज रेनाह।

31 "ताह देखीन फिरोन बी तान होवटाली सेनान केरता हुक जुड़ी, तान एने तान होवटाली सेनान बी तालवारी केरीन खुन एय, ज्यो बोगवान यहोवान बोल हे।"

32 "काहाकाय मी तान वोजेसे जीवताला माणहाम बिय पायदा किरेल इतो; केरीन तो, ता माणहाम बुजाय जाय, जा तालवारी केरीन माराय जायेल हेते, फिरोन एने ता हेऱ्यो तान होवटाली पोरजा बिगेर खेतनान माणहान विचीम बुजाय जाती।" ज्यो बोगवान यहोवान बोल हे।