यहेजकेल 27

सोर ने केरता दुखान गीत

1 बोगवानान ज्य वचन मार फाय पोचनो, 2 "एय माणहान सोरा, सोर ने बाराम एक दुखान गीत बाणावीन ता इही के, 3 एय देरिया पोर बोहणार, एय जुलूम होवटा टापुन केरता देस देसान माणहा हिऱ्यो वेपार केरनार।" बोगवान यहोवा इही किथे,

"एय सोर तु कियेल हे, काय मी पुरो होबातो हे।

4 तारी एद्दी देरीयान विचीम हे;

तुवाह बाणावणार तुवाह पुरो होबातो बाणायो।

5 तारा सोब पाटड्या सनीर बोयड़ान सनोवर जाड़ान लाकड़ान बुणेल हेते;

तारा खुटान केरता लबानोन ने देवदार लेवाय जायेल हे।

6 तारा डांड बाशान ने वाहण्यान जाड़ान बोणना;

तारा डोंडह्यान पतवार बाणावणेन केरता

ता सनोवरान आथीन दातान जुड़ेल लाकड़ान बोणना।

7 तारा पालान केरता

ता मिस्र माय बुणेल

रेंगीत सुती फाड़कान बाणावाय गीयो,

काय तारा जेंडान काम देय;

तारी खोलीन केरता पोड़दा निल्ला जामण्या एता, ता एलीशा टापु माय रेन आवताला।

8 तुवाह जेफाड़नार सीदोन एने अर्बद माय रेणारे एता;

एय सोर, तार विचीम एकलीदार माणहे तुवाह चालाड़णार एता।

9 तारा कारागीर

जोड़ाय केरनार गबल हेयरान,

डायडाया एने एकलीदार माणहे एता;

तार माय वेपार केरनेन केरता डोंडह्या चालाड़णारा हेऱ्या देरीया पोर वाला सोब डोंडह्या तार फाय आवतेह।"

10 तारी सेना माय फारसी, लुदी, एने पुती देसान सेना लेड़ाय ने केरता बोरती इयेल एता; ता तार माय ढाल, एने टोपी टांग्या; एने ताच ने कारेण तारो जोर चिड़ेल इतो। 11 तारा बितड़ा पोर तारी सेना हेऱ्या अर्बदान माणहे कावदेन एता, एने तारा चुटा पोर गम्मद हेयरान बाहदुर उबरियेल एता; ता तान ढाले तार कावदेन बितड़ा पोर टांगेल एता; तारी होबा तान द्वारा पुरी इयेल एती।

12 तारी सोब बातीन मालदेनान वोड़तीन कारेण तर्शिश माणहे तारा वेपारी एता; ता चांदी, लोड़ा रांगा एने सिसा आपीन तारो माल वेचाता लेदा। 13 यावान, तुबल, एने मेशेकान माणहे तारा मालान बोदले पावोर पावेरनी एने पितलीन ठामला तार हेऱ्या वेपार केरताला। 14 तोगर्मान गेराणान माणहे तारो मालदेन लेन सोवारीन गोड़ा, लेड़ाय ने गोड़ा, एने गेदड़ा आप्या। 15 ददानी तारा वेपारी एता; जुलूम होवटा टापु तारा आट बुणेल एता; ता तार फाय आथी दातान हिंग एने आबुनास ने लाकड़े वेपार माय लावताला। 16 तारी जुलूम कारागिरीन कारेण अराम तारो वेपारी इतो; मरकत, जामण्या रेंगान सितरायेल फाड़का, होण, मोणी एने लालड़ी आपीन ता तारो माल लेताला। 17 यहुदा एने इस्राएल बी तारा वेपारी एता; ता मिन्नीत ने गोव, मिठाय, एने मोवाल, तेल, एने मासालो आपीन तारो माल लेदा। 18 तार माय जुलूम कारागिरी एनी एने सोब बातीन मालदेन टुलो एनो, केरीन दमिश्क तारो वेपारी बोणनो; तार फाय हेलबोन ने अंगुरान रूह एने दोवल्या रोचका पोचाड़ाय गीया। 19 यावान एने वदान तारा मालान बोदले हुत आप्या; एने तान कारेण लोखंडो, दालचिनी एने हेलड़ा माय बी तारो वेपारी बोणनो। 20 ददान हेयरान वेपारी तार हेऱ्या गोड़ान लाकड़ान केरता वेपार केरताला। 21 अरब एने केदारान सोब मुखी तारा वेपारी बोणना; ता बोकड्या, मेंडा, एने गिदल्या लावीन तार हेऱ्या लेणो देणो केऱ्या। 22 शेबा एने रामान वेपारी तारा वेपारी बोणना; ता हाज हाजी जातीन सोब बातीन मासाला, एने आखी बातीन मोणी, एने होनो आपीन तारो माल लेदा। 23 हारान, कन्ने, एदेन, शेबान वेपारी एने अश्शुर एने कलमद, ज्या सोब तारा वेपारी बोणना। 24 ता हाज हाज्यु वोस्तु मतलब पांगरनेन निल्ला सितरायेल फाड़का एने दोयड़ी केरीन बांदिल एने देवदारान बुणेल जुदाच फाड़कान पेट्यु लावीन तार हेऱ्या लेणो देणो केऱ्या।

25 तर्शिश डोंडह्यान वेपारी माल लावणारे बोणना,

तान उगे रेन तु देरीयान विचीम रेन जुलूम मालदार एने जोरवार बोण जायेल इतो।

26 तारा जेफणारे तुवाह उंडाला देरीयाम पोचाड़ दियेल हेते,

एने वारो तुवाह देरीयान विचीम तोड़ दियेल हे।

27 जे दिह तु बुड़हे,

ते दिह तारो मालदेन वेपार

डोंडह्यो चालाड़नारे, जोड़नेन काम केरनारे वेपारी माणहे,

एने तार माय जोला सिपाय हेते,

एने तारी आखी बिड़ बाड़ देरीयान विचीम पोड़ जाय।

28 तारा डोंडह्यो चालाड़णारान आयेड़नो होमलीन

तारा आस पास ने माणहे काप उठती।

29 एने सोब जेफणारे एने डोंडह्याह चालाड़णारे,

एने देरीयाम जोला डोंडह्यो चालाड़नारे रेतेह, ता जीव जीवान डोंडह्या पोर रेन उतेरती,

30 एने बुई पोर उबरीन तार बाराम जोरेस उहकी उहकीन रेड़ती,

ता सोतान मुंडा पोर रेजड़ो उड़ावीन रोखड़ा माय वोलती;

31 एने तारा दुखाम तान मुंड बोड़ लेती,

एने कोमराम गोंटो बांदिन

तान मोनाम जुलूम दुखाम तार बाराम रेड़ती एने साती ठोकती।

32 ता दुख किरते लेन तारा बाराम दुखान ज्य गीत बाणावीन गावती,

सोर जो एवी देरीयान विचीम ठावकोच पोड़ रिनोह, तान बाराबोर काल्लो हियोर हे?

33 जेवी तारो माल देरीया पोर रेन निकेलतालो,

तेवी जुलूम देसान माणहे आफरी जाताला;

तारो मालदेन एने वेपारान माल जुलूम एतो

केरीन देरतीन राजा मालदार एय जाताला।

34 जी टेम माय तु उंडाला देरीयान लाटा केरीन टुटनो,

ती टेम माय तारा वेपारान माल,

एने तार माय रेणारे बी,

तार माय रेन खेतेम एय गीया।

35 टापु माय सोब रेणारे तार केरता दुखी एना; एने तान सोब राजान रोचकान काटा चेड़ गीया, एने तान मुये नाराज देखाणे बाज गीया। 36 देस देसान वेपारी तारो तिरस्कार केरने बाज रेनाह; तु बिन कारेण बोण जायेल हे एने पोशी उबरेय नाय सिकहे।