यहेजकेल 42

मोंदिरान आहने दुय खोल्यु

1 पुशो तो एदमी माहु बाहेरली खोली माय उत्तर उगे लेन गीयो, एने माहु त्यु खोल्युन जागे लावो जो गेरान खोलीन सामने एने उत्तर उगे एती। 2 होव आथान लांबाय पोर बायणो एतो, एने चोवड़ाय पाचाह आथान एती। 3 मायवाली खोलीन विह आथ सामने एने बाहेर खोलीन फोरचीन सामने तीन मेहलाम साजा एता। 4 खोल्युन सामने माय उगे जाणार दोह आथ चोवड़ी एक वाट एती; एने आथ बोरीन एक उंजु वाट एती; एने खोल्युन बायणा उत्तर उगे एता। 5 उपेरली खोल्यु आत्यु एत्यु, मतलब, साजान कारेण नेचली एने विचीमवाली खोल्युह रेन आत्यु एत्यु। 6 काहाकाय त्यु तीन ताल्यु एत्यु, एने खोल्युन गेत तान खांबे नाह एता; केरीन उपेरली खोल्यु नेचल्यु एने विचीमवाल्यु खोल्युह रेन आत्यु एत्यु। 7 जा बितड़ा खोल्युन बाहेर तान आहने पाहने एत्यु मतलब खोल्युन सामने बाहेरल्यु खोलीन उगे एती, तान लांबाय पाचाह आथान एती। 8 काहाकाय बाहेरली खोलीन खोल्यु पाचाह आथ लांबी एने मोंदिरान सामनेवालो अलंग होव आथान एती। 9 ज्य खोल्युन बुंदे पुर्व उगे वाट एती, जाहरी माणहे बाहेरली खोलीम रेन ता माय जाताला। 10 खोलीन बितड़ान चोवड़ाय माय पुर्व उगेन आंगे जागो एने गेर दुयून सामने खोल्यु एत्यु। 11 तान सामनेन वाट उत्तरी खोल्युन वाटीन गेत एतो; तान लांबाय चोवड़ाय बाराबोर एती एने बाणावोट एने बाणावोट तान बायणान गेत एती। 12 देक्षिण खोल्युन बायणान गेत वाटी कोपरा पोर बायणो एतो, मतलब पुर्व उगेन बितड़ान सामने, जा रेन माणहे ता माय रिगताला।

13 ओवतो तो माहु केयो, "ज्या उत्तरी एने देक्षिण खोल्यु जो खोल्युन सामने हेत्यु, त्युच चोखाल्यु खोल्युह जा माय बोगवान आहने जाणार चाकऱ्या जेलेम चोखाला वोस्तु खाया केरती, ता आखाम रेन हाज्यु वोस्तु, एने एनबोली, एने पापबोली, एने दोसबोली, ताच मेलती; काहाकाय तो चोखालो जागो हे 14 जेवी जेवी चाकऱ्या माणहे माय जाती, तेवी निकेलने बुखेत ता चोखाला जागाम रेन बाहेर खोली माय ओहलाच निकेलती, मतलब ता पेल तान सेवा केरनेन फाड़का चोखाला जागाम मेल देती; काहाकाय ज्यु खोल्यु चोखाल्यु हेत्यु, तेवी ता दिहरा फाड़का पेरीन सादा माणहान जागे जाती।"

मोंदिर वाला जागान माप

15 जेवी तो मायवाला गेराह माप लिदो, तेवी माहु पुर्व दिशान फाटेक ने वाटे रेन बाहेर ली जाएन बाहेर ले जागे कावदेन मापणे बाज गीयो। 16 तो पूर्वी उगेन मापणेन वाहण्या केरीन मापीन पाच होव वाहण्यो एतो। 17 तेवी तो उत्तर उगेन मापणेन वाहण्या केरीन मापीन पाच होव वाहण्यो काड्यो। 18 तेवी तो देक्षिण उगेन मापणेन वाहण्या केरीन मापीन पाच होव वाहण्यो काड्यो। 19 एने पश्चिम उगे फिरीन तो मापणेन वाहण्या केरीन मापीन ताह पाच होव वाहण्यो काड्यो। 20 तो ता जागान चारू एद्दी माप्यो, एने तान कावदेन एक बितड़ो एतो, तो पाच होव वाहण्यो लांबो एने पाच होव वाहण्यो चोवड़ो एतो; एने ज्यान केरता बुणेल एती काय चोखालो एने आखो सादाह आंगे आंगे केरी।