यहेजकेल 35

एदोमाह बोगवानान देन्ड

1 बोगवानान ज्य वचन मार फाय पोचनो; 2 "एय माणहान सोरा," तारो मुय सेईर बोयड़ान उगे केरीन तान विरूद जाणाव केर, 3 एने ताह के, बोगवान यहोवा इही किथे,

"एय सेईर बोयड़ा,

मी तार विरूद हे; एने मारो आथ तार विरूद ओंगाण केरीन तुवाह उजाडुच उजाड़ केर देह।

4 मी तारा हेयराह हुनाला केर देह,

एने तु उजाड़ एय जाहे;

तेवी तु जाण लिहे काय मी यहोवा हे।"

5 काहाकाय तु इस्राएली माणहा हिऱ्यो जेलेम जेलेम ने दुसमोन मेलतालो, एने तान दुखान बुखेत जेवी तान पापान देन्‍डान टेम पोचनो, तेवी ताह तालवारी केरीन माराय जाणेन केरता आप दिनो। 6 केरीन बोगवान यहोवान ज्यो बोल हे, मारा जीवणान सुगोण, मी तुवाह खुन केराय जाणेन केरता तियार केरूह एने खुनान पाप तार पासाण पोड़ी; तु खुन किरेल हे, एने दोसी ठेरायेल हे; केरीन खुनान पाप तार पासाण पोड़ी। 7 इही केरीन मी सेईर बोयड़ाह उजाडुच उजाड़ केर देह, एने जो ता माय आवतेय जातेय, मी ताह खेतेम केरूह। 8 एने मी तान बोयड़ाह मुरेल देड़ा केरीन बोरूह; तारा चुटा, खोयरा एने सोब खोदराम तालवारी केरीन मारायेल ता पोड़ती। 9 मी तुवाह जेलेम जेलेम ने केरता उजाड़ केर देह, एने तारा हियोर पोशा नाय वोहती, तेवी तुमू जाणहो काय मी यहोवा हे।

10 काहाकाय तु कियेल हे, "ज्या दुय राज्य एने दुय देस मारा एय जाती; एने आमुच तान मालीक बोण जाहु, तेवी ता बोगवान ताहरी इतो। 11 केरीन बोगवान यहोवान ज्यो बोल हे, मारा जीवणान सुगोण, तारा रागान गेत, एने तान बोदेल रागान बुखेत, तु जो राग देखाड्यो, तान गेत मी तुमरी हिऱ्यो वेवारो केरूह एने तुमरो न्यायनिवाड़ो केरूह, तेवी मी सोताह तान विचीम देखाडुह। 12 तु जाणहे, काय मी यहोवा तारी सोब नाकारान वातु हुमलेल हे, जो तु इस्राएलान बोयड़ान बाराम केयो, ता ते उजड़ी गीया, ता आमुहच आपाय जायेल हेते, काय आमु ताह खाय टाके। 13 तु तारा मुया केरीन मार विरूद बोड़ाय माऱ्यो, एने मार विरूद जुलूम वातु किरेल हे; तीह मी हुमलेल हे।"

14 बोगवान यहोवा इही किथे, "जेवी देरती बोर खुसी रेय, तेवी मी तुवाह उजाड़ देह। 15 तु इस्राएलान गेराणन सोतान बागान उजेड़ जाणेन कारेण खुस इनो, केरीन मी बी तार हिऱ्यो तोहलोच केरूह; एय सेईर बोयड़ा, एय एदोमान आखा देस, तु उजाड़ एय जाहे, तेवी ता जाण लेती काय मी यहोवा हे।"