यहेजकेल 8

इस्राएलान मुरती पुजा

1 पुशो सोव्वा वोरह्यान सोव्वा मोयनान पाचवे हिह्याह जेवी मी मारा गेरा माय बोह रियेल इतो, एने यहुदिन डायडाया मार सामने बोह रियेल एता, तेवी मालीक बोगवानान सेक्ती मार पोर आवी। 2 ✝8:2 यहेजकेल 1:27 एने मी दिख्यो काय आक्‍ठान गेत वेह देखातालो; तान कोमरान नेड़ली उगे आक्‍ठो हे, एने कोमरान उपेरल्यो बाग चोमेकतालो एने पितलाह चोमेकतालो हारको काह देखातालो 3 तो तान आथा सारकी काह वोस्तु ओंगाण केरीन मारा मुंडान लेट्याह देर लेदो, तेवी बोगवानान जिव माहु देरती एने जुगान विचीम विस लेदो एने बोगवानान देरसेन माय माहु यरूशलेम मायवाली खोलीन उत्तर वाला बायणाम रिगणेन जागे लेन गीयो, जाहरी एतखाय केरावणार मुरती एती। 4 ✝8:4 यहेजकेल 1:28 पुण इस्राएलान बोगवानान उजोड़ ताहरी इतो, तो उजालो तोहलोच देखातालो जोहलो देरसेन मी मोयदानान मीरे कबार नेदीन जागे दिखेल इतो।

5 तेवी बोगवान माहु केयो, "एय माणहान सोरा, उत्तर दिशा उगे देख।" तेवी मी निजेर टाक्‍यो, एने वेदीन बायणान उत्तेर उगे रिगणेन जागा माय मी एतखाय पायदा केरनार ती मुरतीह दिख्यो।

6 तेवी बोगवान माहु केयो, "एय माणहान सोरा तु काय देखणे बाज रिनोह काय ज्या माणहे काय केरने बाज रेनाह? इस्राएलान गेराणो काय मोटला खाराब काम न्याहरू किरेह, काय मी मारा चोखाला जागाम रेन सिटो एय जाव; पुण तु ज्याह रेन बी वोदार खाराब काम दिखहे।"

7 तेवी तो माहु बायणान रिगणेन जागा पोर लेन आवो, ताहरी मी दिख्यो काय बितड़ा माय एक डुसो इतो। 8 तेवी बोगवान माहु केयो, "एय माणहान सोरा! ता बितड़ान डोसा माय रिग।" केरीन मी बितड़ान डोसाम लागतो गीयो एने ताहरी मी एक बायणो दिख्यो। 9 तेवी बोगवान माहु केयो, "माय रिग एने ता जा, खाराब कामे न्याहरी केरने बाज रेनाह, ताह देख।" 10 केरीन मी माय गीयो, एने दिख्यो काय बितड़ा पोर आखी उखीर आखी बातीन लोलनारे जेन्तु एने एठाला जेनवारे एने इस्राएलान आख्‍यु मुरत्युन चित्रा बाणायेल हेते। 11 एने इस्राएलान गेराणान डायडाया माय रेन सेत्तेर एदमी जान विचीम शापानान सुरो याजन्या बी हे, ता चित्रान सामने उबरिनोह, एने आखा एदमी आप आपणा आथा माय दुणी लेय रेनाह; एने दुणीन दुवाड़ो उपेर उड़ने बाज रिनोह। 12 तेवी बोगवान माहु केयो, "एय माणहान सोरा, तु काय दिखेल हे काय इस्राएलान डायडाया आंदारा माय आथा केरीन बाणायेल चित्रान जागे काय केरने बाज रेनाह? ता केतेह, ‘बोगवान आमुह नाह दिखेत, बोगवान आपणा देसाह सोड़ दियेल हे।’ "

13 पुशो तो माहु केयो, "तु ज्याह रेन बी वोदार खाराब काम दिखहे जा ता केरतेह।" 14 तेवी तो माहु बोगवानान मोंदिरान ता फाटेक ने जागे लेन गीयो, जी उत्तेर उगे एती, एने ताहरी बायकु बोहीन तम्मुज*8:14 तम्मुज देवता देवतान केरता रेड़ने बाज रियेल एत्यु।

15 तेवी तो माहु केयो, "एय माणहान सोरा, काय तु ज्य दिखेल हे? पुशो तु न्याह रेन बी वोदार खाराब काम दिखहे।" 16 तेवी तो माहु बोगवानान मोंदिरान मायवाली खोली माय लेन गीयो; एने ताहरी बोगवानान मोंदिरान बायणान जागे ताहरी मी पोचीह एदमी दिख्यो, जा बायणान सोमोर मांडवा एने वेदीन विचीम उब रियेल एता। तान डिल बोगवानान मोंदिरान उगे एतो, एने ता पुर्व दिशा माय दिह्यान पुजा केरने बाज रियेल एता।

17 तेवी तो माहु केयो, एय माणहान सोरा, तु ज्य काय दिख्यो? काय यहुदान गेराणान केरता खाराब कामे केरनो, जो ता न्याहरी केरतेह आतीच वात हे? ता तान देसाह देंगा माय बोर देना, एने पोशा न्याहरी आवीन मानो ता मुय फुगाड़ीन राग लागाड़तेह, पुण ता डालीह तान नाकान ओंगाण लेय रेतेह। 18 केरीन मी ता पोर राग केरूह; मी ता पोर गिण नाय केरू ता मारी नेजरी माय रेन लिक नाय सेकती, ता माहु मोठेस आयेड़ते तीबी मी तान विन्ता नाय होमलु।