1 बोगवान केयो, "एय माणहान सोरा, एक दाराल्ली तालवार ले, एने तीह नावटान वोस्तरान गेत काम लागाड़ीन तारा मुंडान लेट्या एने दाड़ीन लेट्या बोड़ ले, तेवी तोलनेन ताकड़ा माय तोलीन तान तीन ईसा केर। 2 जेवी हेयरान ओदेरनेन दिह पुरा एती, तेवी हेयरा माय लेट्यान एक ईसो हेयरा माय आक्ठाम हेलगाड़ दिज्ये, एने दुसरा ईसाह हेयरान चार चोमखेर तालवारी केरीन टुकड़ा टुकड़ा केर दिज्ये। वुचेल तिसरो ईसो वारा माय उड़ाव दिज्ये एने मी तालवार खेचीन तान पासाण चालाडुह। 3 पुण थोड़ाक लेट्या काटीन ताह तारा डेगलान सेवड़े बांद लिज्ये। 4 पुशो ता माय रेन थोड़ाक लेट्या लेन आक्‍ठान विचीम टाकज्ये काय ता आक्‍ठा माय हेलगी जाय; तेवी ताच माय रेन एक आस बोड़कीन इस्राएलान आखा गेराणा माय पोसरी जाय।"

5 तेवी मारो मालीक बोगवान माहु केयो, "तो इटड़ो यरूशलेम हे, मी ज्या यरूशलेम हेयराह दिहरा देसान विचीम मिलेल हे, ज्यी टेम माय इस्राएलान चार चोमखेर दिहरा देस हेते। 6 तो मारा नेमान विरूद काम केरीन दिहरा देसाह रेन वोदार खाराब कामे किऱ्यो, एने मारी नेमान विरूद चार चोमखेर ने देसान माणहाह रेन वोदार बुराय किरेल हे; काहाकाय ता मारा नेम कोम जाण्या, एने मारी नेमा पोर नाह चालना। 7 केरीन मारो मालीक बोगवानान ज्य केणो हे; तुमरा चार चोमखेर ने देसाह रेन वोदार दिंगो किरेल हेते, एने मारी विद्यु पोर चालते नाह, एने मारा नेमाह नाह मानते एने तुमरा चार चोमखेर ने देसान नेमान गेत बी नाह केऱ्या।" 8 केरीन मारो मालीक बोगवान किथे, "केरीन मी बी तुमरी विरूद हे, मी तुमूह इह केरीन देन्ड आपु ता माय दिहरा माणहे बी देख सेकती। 9 तुमरा खाराब कामान केरता, मी तुमरी विचीम तो केरूह, जो मी पेल केदी नाह किरेल सुतो एने नाय केदी आवता दिह्याम पुशो केदी ओहलो केरूह। 10 केरीन तुमरीच विचीम आहख आबोख तान जिवाच ने सोराह खाती, एने सोरा जिवाच ने आईख आबाख खाय जाती, मी तुमूह देन्ड आपुह एने जा माणहे वोच जाती, ताह मी चार चोमखेर खोवली देह।"

11 केरीन मालीक बोगवान गोसणा किरेह, मी मारा जीवणान सुगोण खाईन केथु, काहाकाय तुमू तुमऱ्यु सोब खाराब मुरत्युन एने खाराब कामा केरीन मारा चोखाला जागाह एठो किरेल हेते, मी सोता तुमूह होल टाकुह; मी तुमू पोर गीण नाय केरू एने नायते वोचाडु। 12 तुमरा वोहणारा माय रेन तीनुम रेन एक ईसान माणहे हेयरा माय दुखाऱ्या एने बुखल्या मोरती एने तुमरा माणहान तीन ईसा माणहाह मी तालवार काड़ीन तान पासाण पोडुह।

13 "तेवी मारो राग ओलाय, एने तान विरूद मारो हेलगणो ता पोर पुरो बोड़कावीन ठावको रेह; एने जेवी मारो राग ओलाय जाय, तेवी ता जाण जाती काय बोगवान रागाईन ज्य कियेल हे। 14 मी तुवाह तारा चार चोमखेर ने देसान विचीम, सोब आवणे जाणारान देखताच उजाडुह, एने तारी चिहटा केरावुह।"

15 "जेवी मी तुमरी पोर राग केरूह एने तुमूह देन्ड आपुह, तेवी तुमरा चार चोमखेर ने माणहे तुमरो मोजाक उड़ावती, काहाकाय मी बोगवान तुमूह कियेल इतो, काय मी काय केरूह। 16 ज्य ती टेम माय एय, जेवी मी ता माणहाह खेतेम केरनेन केरता तुमू पोर कालान मारनारे बेलखा विंदीन, तुमरी विचीम मोंगाय वोदाडुह, एने तारा रोटान आदार सिटो केर देह। 17 मी तुमरी विचीम जेंगली जेनवारे एने काल मोकलुह। ता तारा सोराह खाय जाती। महामारी एने खुनान सावला तारा बायणा पोर लागता सेरेकती, एय यरूशलेम माय रेणारे, मी तुमरो मालीक, तुमू पोर दुसमोनान तालवार चालाडुह।" मी बोगवान ज्य कियेल हे।