यहेजकेल 13

जुठा जाणकारान विरूद जाणाव

1 बोगवानान ज्य वचन मार फाय पोचनो, 2 एय माणहान सोरा, "इस्राएल देसान जा जाणकार तान मोनाम जाणाव केरतेह तान विरूद जाणाव केरीन के, बोगवानान वचन हुमलो।" 3 मुखी बोगवान यहोवा इह केरीन किथे, "हाय हे ता फोगा जाणकारा पोर, जा तान मोनाह पुटे तिहे चालतेह, मी ताह मारो देरसेन केदी नाह दिनो। 4 एय इस्राएल, तुमरा जाणकार उजाड़ गेराम रेणार कोल्यान गेत हेते। 5 तुमू इस्राएली माणहान केरता बितड़ान डोसाह हुदारनेन केरता उपेर नाह जायेल सोता काय बोगवानान दिह लेड़ाय माय मोजबुत बोणीन रेय। 6 एय जाणकारे, तुमू जुठी जाणाव केऱ्या, एने तुमू जुठा हुगोणान विचार किरते रेना, केदी मी तुमूह मुकलेल नाह इतो, काय तुमू मार पोर आसा केरतेह काय मी तुमरी जुठी जाणावाह पुरो केरू? 7 काय तुमू जुठो देरसेन नाह देख्या, एने मी तुमूह काल्ली खुबेर नाह आप्यो तीबी तुमू जुठी बविष्यवाणी केरीन बोगवान इह केरीन किथे केतेह!"

8 केरीन बोगवान यहोवा इह केरीन किथे, तुमऱ्यु जुठ्यु वातु एने जुठा देरसेनान केरता, मी तुमरी विरूद हे, मालीक बोगवानान ज्यो बोल हे। 9 मारो आथ ता जुठा जाणकारान विरूद उठी, जा जुठा देरसेन देखतेह एने जुठी जाणाव केरतेह, ता मारी पोरजा इस्राएलान टोली माय नाय रेती एने तान नाव इस्राएलान गेराणा माय नाय लेखाय जाय, एने ता इस्राएल देसाम रिग नाय सेकती, तेवी तुमू जाण लिहो मी मालीक बोगवान हे। 10 ✝13:10 यिर्मया 6:14; 8:11काहाकाय ता मारी पोरजान माणहाह इही केन बोटकाड़तेह, आखो हाजोस हे, पुण सान्ती नाय मिले। एने ता कोमजोर बितड़ो उबो केरीन ता पोर चुनो निप देतेह। 11 एय माणहान सोरा, निपणार थाबणार जुठा जाणकाराह केय दे काय बितड़ो ओदरी जाय; काहाकाय जेल्दीच मुहेलदाऱ्यो पाणी पोड़ी, एने मोठ मोठा गारा बी पोड़ती, एने मोटलो वादोण ताह ओदारी। 12 जेवी बितड़ो ओदरी जाय, तेवी काय तुमूह माणहे ज्य नाय फुसती, "तुमू जो निपेल थाबेल एता तो बितड़ो काहरी गीयो?"

13 केरीन मालीक बोगवान तुमूह इह केरीन किथे, "मी राग केरीन मुटलो वादोण मोकलुह, एने मारा रागान कारेण से मुहोलदाऱ्यो पाणी पोड़ी, एने मारा रागा माय मोठ मोठा गारा पाडुह, एने ताह खेतेम केर देह। 14 मी ता बितड़ाह तोड़ देह, जा पोर तुमू चुनो निपेल हेते, ताह मी ओदार देह, एने तान पायो रिकामो पोड़ रेय, जेवी तो ओदरी जाय, ते तुमू बी ता हेऱ्या खेतेम एय जाहो; तेवी तुमू जाण लिहो काय मी बोगवान हे।"

15 इह केरीन मी बितड़ा पोर एने ताह निपणार जाणकारा पोर मारो राग उतारूह, तेवी मी तुमूह फुसूह, "का गीयो तुमरो बितड़ो, एने का गीया ताह निपणारे 16 ज्यो आखो इस्राएलान जुठा जाणकारान केरता रेय। ज्या यरूशलेमान सान्तीन देरसेन देखताला, पुण ताहरी सान्ती एतीच नाह मालीक बोगवानान ज्यो बोल हे।"

जुठी बायकु जाणाव केरनारीन विरूद जाणाव

17 एय माणहान सोरा, एवी तु तारो मुय तारा माणहान बायकुन विरूद उगाड़, ज्यु सोताच ने मोना केरीन जाणाव केरत्युह, तु त्युन विरूद जाणाव केरीन के, 18 मालीक बोगवान किथे, ज्यु बायकु त्युन आथाम जादून तावीज बांदिन माणहाह फासाड़नेन केरता एने त्युन मुंडाह डापणेन केरता लांबाला गुंगटा केरत्युह, हाय हे त्यु पोर काय तुमू मारी पोरजान माणहान जीव दोका माय टाकहो एने सोताह वोचाड़ीन मिलहो? 19 तुमू ते मुठ बोर जुवार एने रोटान टुकड़ान बोदले मारी पोरजान नेजरीम एठो ठेरावीन, तुमरी त्यु वातु केरीन, जा मारी पोरजान माणहे तुमू फाय रेन होमेलतेह, जा खेतेम एणेन लायकीन नाह एता, ताह मार टाक्या; एने जा वोचणेन लायकीन नाह एता तान जीवाह वोचाड़ लेदा।

20 केरीन बोगवान यहोवा तुमूह इही किथे; दिखो, "मी तुमरा ता उहत्यान विरूद हे, जा केरीन तुमू जीवान सिकार केरत्युह, जाह तुमू सिकार केरीन उड़ावत्युह ताह मी तुमरा खोलाम सांडाड़ीन ताह सोड़वी लेह। 21 मी तुमरा मुंडान गुंगटाह फाड़ीन मारी पोरजान माणहाह तुमरा आथाम रेन सोड़वुह, एने ओंगाण ता तुमरा ताबाम नाय रेती काय तुमू तान सिकार केर सिको; तेवी तुमू जाण लिहो काय मी बोगवान हे।"

22 तुमू ज्यु जुठ मेलीन देरमीन मोनाह नाराज केरने नाह होद्यु, एने खाराब माणहाह ईमोत देरायेल हेत्यु, काय तो तान खाराब वाटीन उगे रेन नाय वोले एने जीवतालो रेय। 23 केरीन तु पोशी नाय ते जुठा देरसेन दिखहे, एने नाय बोड़वाय किरहे, काहाकाय मी मारी पोरजाह तारा आथाम रेन सोड़वुह, तेवी तुमू जाण जाहो काय मी यहोवा हे।