यहेजकेल 30

मिस्र देसान राजान विरूद जाणाव

1 पोशो बोगवानान वचन मार फाय पोचनो; 2 "एय माणहान सोरा, जाणाव केरीन के, बोगवान यहोवा इही किथे,

"हाय, हाय, किरो ता दिह्या पोर!

3 काहाकाय तो दिह मतलब बोगवानान दिह आहने हे;

तो वादलान दिह, एने देसान केरता तो देन्‍डान टेम रेय।

4 मिस्र देसाम तालवार चाली,

एने मिस्र देसान माणहे मारायीन जाय पोड़ती,

तेवी कुश देसाम बी पिढ़ा आव पोड़ी,

माणहे मिस्राह लुटीन लेन जाती,

एने तान पाया ओदाराय जाय।"

5 "कुश, पुत, लुद एने सोब दुय बात्या, एने कुब देसान माणहे, एने वाचा बांदायेल देसाम रेणारे, मिस्र देसान माणहा हेऱ्या तालवारी केरीन माराय जाती।"

6 बोगवान इह केरीन किथे, "मिस्र देसाह होमालनारे जाय पोड़ती, जा मिस्री माणहे तान ताकेत पोर मोठाय केरतेह, ती टुट जाय; मिग्दोल रेन ते सेवेनेवाला सोब माणहे तालवारी केरीन माराय जाती; ज्य बोगवानान वचन हे। 7 ता उजड़ेल देसान विचीम उजड़ ठेराती, तान हियोर उजाड़ पुड़ेल हेयराम गेणाय जाती। 8 जेवी मी मिस्र देसाम आक्‍ठो लागाडुह एने तान सोब मोदेक केरनारे खेतेम एय जाती, तेवी ता जाण लेती काय मी बोगवान हे।

9 "ते दिह मार खोबऱ्या बिगेर बिन डोंडह्याम बोहीन जाती, एने कुश देसान माणहाह बिवाड़ती; जोहलो काय मिस्र देसान देन्‍डान टेम इयेल एतो; काहाकाय तो दिह आवणे बाज रिनोह।"

10 बोगवान यहोवा इही किथे, "मी बाबिलोन ने राजा नबुकदनेस्‍सरान आथा केरीन मिस्र देसान माणहान बिड़ीह माराव देह। 11 नबूकदनेस्सर एने तान पोरजा बेल जो सोब देसाह बिवाड़ेह तो मिस्र देसाह खेतेम केरनेन पोचाड़ाय जाय एने ता मिस्र देसान विरूद तालवार काड़ीन देसाह मुरेल माणहाम बोर देती। 12 मी नेद्युह हुकाड़ देह, एने देसाह खाराब माणहान ताबाम केर देह; एने मी पाराया माणहान उगे रेन देसाह, जो काय ता माय हे, उजाड़ केराव देह; मी यहोवा ज्य कियेल हे।"

13 बोगवान यहोवा इही किथे, मी नोप माय रेन मुरताह खेतेम केरूह एने ता माय वाला मुरताह रेणे नाय देव; पोशो काल्लो मुखी मिस्र देसाम नाय उठी; एने मी मिस्र देसाम बिय पायदा केरूह। 14 मी पत्रोसाह उजाड़ देह, एने सोआन माय आक्‍ठो लागाडुह, एने नो गावाह देन्ड आपुह। 15 सीन जो मिस्र देसान वातड़ो जागो हे, ता पोर मी मारो राग बोड़कावुह, एने नोन गावान बिड़ीह खेतेम केर देह। 16 मी मिस्र देसाम आक्‍ठो लागाडुह; एने सीन जुलूम थेर थेर कापी; एने नो गाव फाड़ाय जाय, एने नोप दिह डोवले उठी। 17 आवेन एने पिवेसेत ने जुवान तालवारी केरीन पोड़ती, एने ज्या हियोर जेलीम जात रेती। 18 जुलबुखे मी मिस्र देसान माणहान जुवालाह तहपन्हेस माय तोडुह, तेवी ता माय दिह आंदारो एय जाय, एने तान ताकेत जा पोर तो मोठाय किरेह, ती खेतेम एय जाय; ता पोर वादेल सावाय जाय एने तान बेट्युख जेलीम जात रेती। 19 इह केरीन मी मिस्र देसान माणहाह देन्ड आपुह, तेवी ता जाण लेती काय मी यहोवा हे।

मिस्र राजान टुटेल सेक्ती

20 ओवतो इग्यारवा मोयनान सातवे दिह्याह बोगवानान ज्य वचन मार फाय पोचनो। 21 "एय माणहान सोरा, मी मिस्र देसान राजा फिरोनान खांद तोड़ दियेल हे; एने देख नाह ते जोड़ाय गीयो, नाह ता पोर दावो लागाड़ीन पोट्टी बांदाय गियी, काय तो बांदिन तालवार देरनेन लायेक बोण सेकी। 22 केरीन मालीक बोगवान इही किथे, देख मी मिस्र देसान राजा फिरोनान विरूद हे, एने तान हाजाला एने टुटेल दुयू खांदा तोड़ देह; एने तालवारीह तान आथाम रेन पाडुह। 23 मिस्री माणहाह जाती जातीम वेरासेर केरूह, एने देसा देसाम खोवलुह। 24 मी बाबिलोन ने राजान खांदाह ताकेत आपीन मारी तालवार तान आथाम आपुह; पुण फिरोनान खांदा तोडुह, एने तो तान सामने ओहलो काही जीहे काय मोरनार गायलो काहेह। 25 मी बाबिलोन ने राजान खांदा होमालुह, एने फिरोनान खांदाह डिल्ला पोड़ती, तेवी ता जाणती काय मी बोगवान हे, जेवी मी बाबिलोन ने राजान आथाम मारी तालवार आपुह, तेवी तो तीह मिस्र देसा पोर चालाड़ी; 26 एने मी मिस्री माणहाह जाती जातीम खोवलुह, एने देसा देसाम वेरूह, तेवी ता जाण लेती काय मी बोगवान हे।"