यहेजकेल 26

सोर हेयरान विरूद जाणाव

1 इग्यारवा वोरह्या पेल्ला मोयनान पेल्ला दिह्याह बोगवानान ज्य वचन मार फाय पोचनो, 2 "एय माणहान सोरा, सोर हियोर जो यरूशलेमान बाराम कियेल हे, अहा, अहा, जो देस देसान माणहान फाटेक ने गेत एतो, तो खेतेम एय गीयो।"

3 "ती उजड़ी जाणे से मी बोरपुर एय जाह! केरीन यहोवा बोगवान किथे, एय सोर, देख, मी तार विरूद हे; एने मी ओहलो केरूह काय जुलूम देस तार विरूद इह केरीन उठती जीह केरीन देरीयान लाटा उठतेह। 4 एने ता सोर ने बितड़ाह ओदारती, एने तान चुटाह तोड़ टाकती; एने मी ता पोर रेन तान माटड्यो खुरपीन ताह उगाड़लो केर देह। 5 तो देरीयान विचीम जाल पोसरावणेन जागो बोण जाय; काहाकाय बोगवान यहोवान ज्यो बोल हे; एने तो देसा देसान उगे रेन लुटाय जाय। 6 एने तान ज्यु सोऱ्यु मोयदानाम हेत्यु, त्यु तालवारी केरीन माराय जाती, तेवी ता जाण लेती काय मी यहोवा हे।"

7 काहाकाय बोगवान यहोवा इही किथे, देख, मी सोर ने विरूद मोटला राजा बाबुलान राजा नबुकदनेस्सराह गोड़ा, टांगा, बोहणारे, होवटाली गेरदी, एने टोल्यु हिऱ्योस उत्तर दिशाम रेन लेन आवुह। 8 एने ताऱ्यु ज्यु सोऱ्यु मोयदानाम रेती, त्युह तो तालवारी केरीन मारी, एने तारी विरूद कोट बाणवाड़ी एने उतेरती बांदी; एने डाल विसी। 9 एने तो तारा बितड़ान विरूद लेड़ायीन आथ्‍यार चालाड़ी एने तारा चुटाह आथ्यारा केरीन ओदार देय। 10 एने तान सेना माय ओला गोड़ा रेती, काय तान रेजड़ा माय आखो हियोर डापाय जाय। एने जेवी बाबिलोन ने राजा तारी फाटक्यु माय ओहलो रिगी जीह केरीन माणहे नाकावाला हेयराम रिगतेह, तेवी बितड़ो, बोहणारे, चाकारा एने टांगान आवाज माय काप उठती। 11 तो तान गोड़ान मांगा केरीन तारी सोब सेड़क्युह बुराव देय, एने तार माय रेणार माणहाह तालवारी केरीन मार टाकी, एने तारी ताकेतीन खांमे बुई पोर पाड़ाय जाती। 12 एने माणहे तारो मालदेन लुटती एने तारा वेपारान वोस्तु सांडाड़ लेती; ता तारा बितड़ाह ओदार देती एने तारा पुटे ओहला गेरे तोड़ देती; तारा दिगोड़ एने लाकड़े, एने तारो माटड्यो ता पाण्याम टाक देती। 13 एने मी तारा गीतान सुरताल बोंद केरूह, एने तारा रेणथान दुंद पोशी केदी नाय होमलाय। 14 मी तुवाह उगाड़ला सापरान गेत केर देह; तु जाल पोसरावणेन जागो बोण जाहे; एने पुशो वोहाड़ाय नाय जाहे; काहाकाय मी यहोवा ज्य कियेल हे, बोगवान यहोवान ज्यो बोल हे।

15 बोगवान यहोवा सोराह इही किथे, "तारो पोड़नेन बोल होमलीन जेवी जेखमी माणहे काहती एने तार माय खुनेच खुने एती, तेवी काय देरीयान दिड़ेवाला देस नाय काप उठती? 16 तेवी देरीयान मीरे वाला सोब मुखी माणहे जीव जीवान गादी पोर रेन उतेरती, एने तान चोगा एने सितरायेल फाड़का काड़ीन बिते कापते लेन दुखान फाड़का पेरती, एने बुई पोर बोहीन थेर थेर कापती; एने तारा पोड़ना पोर बोंगलाय जाती। 17 एने ता तार बाराम दुखान गीत बाणावीन तुवाह केती,

"हाय! मल्लाहोन वोहाड़ेल हाय!

नाव लायेल हियोर जो ताकेतवोर रिनो,

एने सोब रेणाराह बिवाड़नार हियोर इतो,

तु किहीक खेतेम इयेल हे?

18 तारे पोड़नेन दिह,

देरीयान दिड़ेवाला टापु काप उठती।

एने तारो खेतेम एणेन कारेण देरीयान सोब टापु गाबराय जाती।"

19 काहाकाय बोगवान यहोवा इही किथे, जेवी मी तुवाह हुनाला हेयरान गेत उजाड़ केरूह एने तार पोर मुटलो देरीयो चेड़ावुह, एने तु उंडाला पाण्याम बुड़ जाहे, 20 जेवी तुवाह आंदारकेली माय पोड़नारा हिऱ्यो तुवाह बी वेगाला माणहा माय उतार देह; आंदारकेली एने ती माय पोड़नारा माणहा हिऱ्यो तुवाह बी मेलीन वेगाला कालान उजाड़ेल जागान गेत केर देह; उलोक काय तु पुशो नाय वुहहे एने जीवताला माणहा माय काल्लो जागो नाय सापड़ाव सिकहे। 21 मी तुवाह गाबराणेन कारेण केर देह, एने तु ओंगाण पुशो नाय रिहे, पुण होदीन बी तारो पुतो नाय लागी, बोगवान यहोवान ज्यो बोल हे।