1 आमरो कोंडाणेन पोचीहवा वोरीह मतलब यरूशलेम हेयराह लेवाय जाणेन पासाण, चौदावा वोरह्यान पेल्ला मोयनान दोहवे दिह्याह, बोगवानान सेक्ती मार पोर आवी, एने तो माहु ताहरी पोचाड्यो। 2 तान देरसेन माय बोगवान माहु इस्राएल देसाम पोचाड्यो, एने ताहरी एक जुलूम उचा बोयड़ा पोर उब राख्यो, जा पोर देक्षिण उगेन एगदा हेयरान गेत आकार इतो। 3 जेवी जीव माहु ताहरी लेन गीयो ते मी काय देख्यो काय पितलान वेह दिरेल एने आथाम होणीन हुत एने मापणेन वाहण्यो लेय रियेल एक एदमी रिगण्या बायणा पोर उबरिनोह।

4 तो एदमी माहु केयो, "एय माणहान सोरा, तारा डोला केरीन देख, एने तारा काना केरीन हुमेल; एने जो काय मी तुवाह देखाडुह ता पोर द्यान दे, काहाकाय तु ज्यान केरता पोचाड़ाय जायेल हे काय मी तुवाह ज्यु वात देखाडु; एने जो काय तु दिखेह तो इस्राएल ने गेराणाह केय।"

5 ✝एने दिखो, गेरान कावदेन एक बितड़ो एतो, मापणेन केरता वाहण्यो एतो, जान चोवड़ाय एने लांबाय तीन तीन मिटर एती, एने बितड़ान उचाय बी तीन मिटर एती। 6 तेवी ती फाटेक ने जागे जान मुय पुर्व उगे एतो, तान निहणा पोर चेड़ीन फाटेक ने दुय ओटलान चोवड़ाय मापीन एक एक वाहण्यो बोर सापेड़नो। 7 एक राखवाल्या खोल्यु वाहण्यो बोर लांबाय एने वाहण्यो बोर चोवड़ाय एती; एने दुय दुय खोल्युन गालो पाच आथान एतो; एने फाटेक ने ओटलो जो फाटेक ने ओसारान जागे गेरान उगे एती, तो बी वाहण्यो बोर एतो। 8 तेवी तो फाटेक ने तो ओटलो जो गेरान सामने इतो, मापीन वाहण्यो बोर सापेड़नो। 9 तो फाटेक ने ओटलो मापीन आठ आथ जुड़नो, एने तान खांबे दुय दुय आथ एता, एने फाटेक ने ओटला गेरान सामने एता। 10 पुर्व फाटेक ने दुयू उगे तीन-तीन राखवाल्यु खोल्यु एत्यु ज्यु सोब एकुच मापान एत्यु, एने दुय उगेन खांब बी एकुच मापान एता।

11 ओवतो तो फाटेक ने बायणान चौड़ाय माप्या ते दोह आथ निकेलनी; एने फाटेक ने लांबाय माप्या ते तेरा आथ एती। 12 दुयू उगेन राखवाल्यु खोल्युन ओंगाण आथ बोर जागो इतो एने दुयू उगे खोल्यु सोव सोव आथान एत्यु। 13 ओवतो तो फाटेकीह एक उगेन राखवाली खोलीन साजा पोर रेन दिहरी उगेन राखवाली खोलीन साजा पोर वोर मापीन पोचीह आथान सेटी निकेलनी, एने बायणा आमने सामने एता। 14 ओवतो तो साठ आथ खांबे माप्यो, एने खोलीन, फाटेकीन आस पास, खांबे वोर एतो। 15 फाटेकीन बाहेरल्या बायणान ओंगाण लागतो तान माय वाला ओटलान ओंगाण वोर पाचाह आथ गालो एतो। 16 राखवाली खोल्यु माय, एने फाटेकीन माय कावदेन खोल्युन विचीवाला खांबान विच विचीम जारावाल्यु खिड़क्यु एत्यु, एने खांबान ओटला माय बी तोहलाच एता, एने फाटेक माय कावदेन खिड़क्यु एत्यु; एने आखा खांबा पोर खजुरान जाड़े सितरायेल एता।

17 तेवी तो माहु बाहेरली खोलीम लेन गीयो; एने ती खोलीन कावदेन खोल्यु एत्यु; एने ताहरी एक फोरची बुणेल एती; जा पोर तीस खोल्यु बुणेल एत्यु। 18 ज्यी फोरची मतलब बुंदेवाली फोरची फाटेक हेऱ्यो लिटकेल एतो एने तान लांबायीन गेत एतो।

19 ओवतो तो बुंदल्या फाटेक ने ओंगाण लागतो मायवाली खोलीन बाहेरली खोलीन ओंगाण वोर मापीन होव आथ निकेलनो; एने तो पुर्व एने उत्तर दुयू उगे ओहलोच एतो।

20 तेवी बाहेरली खोलीन उत्तरमुखी फाटेक ने लांबाय एने चोवड़ाय तो माप्यो। 21 तान दुयू उगे तीन तीन राखवाल्यु खोल्यु एत्यु एने तान बी खांबान ओटलान माप पेल्ला फाटेक ने गेत एतो; तान लांबाय पाचाह एने चोवड़ाय पोचीह आथ एतो। 22 तान बी खिड़क्यु एने खांबान ओटला एने खजुरान माप पुर्वमुखी फाटेक ने गेत एतो; एने ज्या पोर चेड़नेन सात पावत्र्यु एत्यु; एने तान ओंगाण तान ओटला एता। 23 मायवाली खोलीन उत्तर एने पुर्वान उगे दिहरा फाटेक ने सामने फाटेक एता, एने तो फाटेक ने लांबाय मापीन देख्यो ते होव आथ निकेलनी।

24 पुशो तो माहु देक्षिण उगे लेन गीयो, एने देक्षिण उगे एक फाटेक इतो; एने तो तान खांबे एने खांबान ओटला बाणावीन मापीन दिख्यो ते तान माप तोहलाच एता। 25 त्यु खिड़क्युन गेत तान एने तान खांबान ओटलान कावदेन बी खिड़क्यु एत्यु; तान लांबाय पाचाह एने चोवड़ाय पोचीह आथ एती। 26 ता माय बी चेड़नेन केरता सात पावत्र्यु एत्यु एने तान सामने खांबान ओटला एता; एने तान दुयू उगेन खांबा पोर खजुरान जाड़े सितरायेल एता। 27 देक्षिणान उगे बी मायवाली खोलीन एक फाटेक एतो, एने देक्षिण उगे दुयू फाटेक ने लांबाय माप्या ते होव आथ निकेलनी।

28 तेवी तो देक्षिण फाटेक लागतो माहु मायवाली खोलीम लेन गीयो, एने तो देक्षिण फाटेकाह माप्यो ते तोलोच निकेलनो। 29 मतलब तान बी राखवाली खोल्यु, एने खांबान ओटला, सोब तोहलाच एता; एने तान खांबान ओटलान कावदेन बी खिड़क्यु एत्यु, एने त्युन लांबाय पाचाह आथ एने चोवड़ाय पोचीह आथान एती। 30 तान कावदेन खांबान ओटला बी पोचीह आथ लांबा, एने पाचाह आथ चोवड़ा एता। 31 तान खांबान ओटलो बाहेरल्या खोलीन उगे इतो, एने तान खांबा पोर बी खजुरान जाड़ान सितरायेल एता, ता पोर चेड़नेन आठ पावत्र्यु एत्यु।

32 ओवतो तो एदमी माहु पुर्व उगे माय वाली खोलीम लेन गीयो, एने ती उगेन फाटेकाह माप्यो ते तोलोच निकेलनो। 33 तान राखवाली खोल्यु एने खांबे एने खांबान ओटला, सोब तोहलाच एता; एने तान एने तान खांबान ओसारान कावदेन बी खिड़क्यु एत्यु; त्युन लांबाय पाचाह एने चोवड़ाय पोचीह आथ एती। 34 ज्यान ओटलो बी बाहेरली खोलीन उगे इतो, तान दुयू उगेन खांबा पोर खजुरान जाड़े सितरायेल एता; एने ज्या पोर बी चेड़नेन आठ पावत्र्यु एत्यु।

35 ओवतो तो एदमी माहु उत्तर वाली फाटेक ने जागे ली जाएन ताह माप्यो, एने तान बी माप तोलोच एतो। 36 तान बी राखवाली खोल्यु एने खांबे एने तान ओटलो इतो; एने तान बी कावदेन खिड़क्यु एत्यु; त्युन लांबाय पाचाह आथ एने चौड़ाय पोचीह आथ एती। 37 तान खांब बाहेरली खोलीन उगे एता, एने ता पोर बी दुयू उगे खजुरान जाड़े सितरायेल एता; एने ता माय चेड़नेन आठ पावत्र्यु एत्यु।

38 पोशो फाटेक ने जागे खांबान आहने बायणा हेऱ्योच खोपड़ी एती, जाहरी होमबोली दोवाय जातालो। 39 होमबोली पापबोली, एने दोसबोलीन जेनवेराह मारनेन केरता फाटेक ने ओसारान जागे तान दुयू उगे दुय दुय पाटला एता। 40 उत्तेर फाटेक ने रिगण्या बायणा पोर, ओटलान बाहेर तान दुयू उगे, दुय दुय पाटला मिलेल एता। 41 फाटेक ने दुयू उगे चार चार पाटला एता, आखा मिलीन आठ पाटला एता, जा जेनवार बोली मारनेन केरता एता। 42 पोशो होमबोलीन केरता गिड़ेल देगड़ान चार पाटला एता, जा डेढ़ आथ लांबा एने डेढ़ आथ चोवड़ा, एने आथ बोर उचा एता, ता पोर होमबोली एने मेल मिलाप बोलीन जेनवेराह मारनेन आथ्‍यार मेलाय जाताला। 43 माय कावदेन आकड़ा लागेल एता, एने पाटला पोर चेड़ावान माह मिलेल एतो,

44 मायवाली खोलीन उत्तरी फाटेक ने बाहेर गावणारान खोल्यु एत्यु जान बायणा देक्षिण उगे एता; एने पुर्वी फाटेक ने उगे एक खोली एती, जीन बायणो उत्तर उगे एतो। 45 तो माहु केयो, ज्यी खोली, जान बायणो देक्षिण उगे हे, ता चाकऱ्यान केरता जा गेरान चोकसी केरतेह। 46 एने जी खोलीन बायणो उत्तर उगे हे, तो ता चाकऱ्यान केरता हे जा वेदीन चोकसी केरतेह; ज्या सादोकान सोरा हेते, एने लेवीम रेन यहोवान सेवा केरनेन केरता फोक्ता ज्याच तान आहने जातेह।

47 पोशो तो खोलीह मापीन चार खुण्यो मतलब होव आथ लांबो एने होव आथ चोवड़ो एतो; एने गेरान सामने वेदी एती। 48 ओवतो तो माहु गेरान ओटला पोर लेन गीयो, एने ओटलान दुयू उगे खांबाह मापीन पाच पाच आथ आवो; एने दुयू फाटेक ने चोवड़ाय तीन तीन आथ एती। 49 ओटलान लांबाय विह आथ एने चोवड़ाय इग्यार आथ एती; एने ता पोर चेड़नेन पावत्र्यु एत्यु; एने दुयू उगेन खांबान जागे पिलोर एता।