यहेजकेल 43

मोंदिर माय बोगवानान उजाला

1 ओवतो तो एदमी माहु ता फाटेक ने जागे ली गीयो जो पुर्वमुखी एतो। 2 तेवी इस्राएलान बोगवानान उजालो पुर्व दिशा उगे रेन आवो; एने तान बोल जुलूम होवटा पाण्यान खेकलान गेत एनो; एने तान उजाला माय देरती पोर उजालो एनो। 3 ज्यो देरसेन तान गेत एतो, जो मी ता हेयराह खेतेम केरनेन टेम माय आवतालो दिखेल इतो; एने ता देरसेनान गेत, जो मी कबार नेदीन मीरे दिखेल इतो; एने मी मुयान बोरहे जाय पुड़नो। 4 तेवी बोगवानान उजालो ता फाटेक माय लागतो जो पुर्वमुखी एतो, गेराम आव लागो। 5 तेवी बोगवानान जीव माहु उठाड़ीन माय खोली माय पोचाड्यो; एने बोगवानान उजालो गेराम बोराय रियेल एतो। 6 तेवी मी एक जाणान बोल हुमल्यो, जो गेराम रेन मार हिऱ्यो वातु केरने बाज रियेल एतो, एने तो माणुह मार आहने उबरियेल एतो। 7 तो माहु केयो, "एय माणहान सोरा, बोगवानान ज्यो बोल हे, ज्यो मार राजगादिन जागो हे एने मारो पाय मेलनेन जागो हे, जाहरी मी इस्राएल हिऱ्यो जेलेम रेह, एने नाय ते इस्राएलान गेराणो एने नाय तान राजा सिनाल से तान उचाला जागाम तान राजान देड़ान द्वारा मारो चोखाला नावाह पोशा एठो ठेरावती। 8 ता तान ओटलो मार ओटलान जागे, एने तान बायणान खांबे मारा बायणान खांबान आहने बाणावताला, एने मारो एने तान विचीम निस्तो बितड़ोच एतो, एने ता तान खाराब कामा केरीन मारा चोखाला नावाह एठो ठेरायेल एता; केरीन मी राग केरीन ताह खेतेम किऱ्यो। 9 एवी ता तान सिनालो एने तान राजान देड़े मार हेऱ्या रेन सेटा केर देय, तेवी मी तान विचीम जेलेम रेया केरूह।"

10 एय माणहान सोरा, तु इस्राएल ने गेराणाह मार गेरान नमुनो एने बाणावोट देखाड़ दे, ज्यान वोजेसे ता तान एदेरमान केरता लाजवाती, 11 केदी ता तान आखा कामाह लाजवाय, ते ताह ज्या गेरान आकार एने वेह, एने ज्यान बाहेर माय आवणे जाणेन वाट, एने ज्यान सोब आकार एने विद्यु, नेम किज्यो, एने तान सामने लेख मिलज्यो ता माय ज्यान आकार एने ज्यान सोब विद्यु एर केरीन तान गेत केरी 12 गेरान नेम ज्यो हे काय बोयड़ान चुटान कावदेन पुरो बाग जेलेम चोखो हे, देख गेरान नेम ज्योच हे।

वेदीन बाणावोट

13 ओहला आथा केरीन जो सादा आथाह रेन चार आंगल्या वोदार रेय, वेदीन माप ज्यो, मतलब तान आदार एक आथान, एने चोवड़ाय एक आथान, एने तान कावदेन सेवड़ा पोर ली पोट्टी चारान। एने वेदीन उचाय ज्यी हे। 14 बुई पोर देराईल आदार रेन नेचली कुड़ची वोर दुय आथ बोर उचाय रेय, एने तान चोवड़ाय आथ बोर जुवे; एने आतली कुड़ची रेन मोटली कुड़ची वोर चार आथान रेय, एने तान चोवड़ाय आथ बोर रेय। 15 एने उपेरल्यो बाग चार आथ उचो रेय; एने वेदी पोर हेलगाड़नेन जागान चार हिंगे उपेरली उगे निकलेल रेय। 16 वेदी पोर हेलगाड़नेन जागो चोवकोण्यो मतलब बारा आथ लांबो एने बारा आथ चोवड़ो रेय। 17 नेचली कुड़ची चोवदा आथ लांबी एने चोवदा आथ चोवड़ी, एने तान कावदेन पोट्टी आदा आथान रेय, एने तान आदार कावदेन आथ बोर रेय। तान निहणो तान पुर्व उगे रेय।

वेदीन अर्पण

18 ओवतो तो माहु केयो, "एय माणहान सोरा, बोगवान यहोवा इही किथे, जे दिह होमबोली चेड़ावणे एने लुय हिपड़नेन केरता वेदी बाणवाय जाय, ते दिह ने दिह्यान विद्यु ज्यु ठेराती। 19 मतलब लेवी चाकऱ्या माणहे, जा सादोकान सोरा हेते, एने मारी सेवा केरनेन मार आहने रेतेह, ताह तु पापबोलीन केरता एक वासड़ो आपज्ये, बोगवान यहोवान ज्यो बोल हे। 20 तेवी तु तान लुयीम रेन थोड़ोक लेन वेदीन चारू हिंगे एने कुड़चीन चारू कोपरा एने कावदेन पोट्टयु पोर लागाड़ज्ये; इह केरीन तान केरता पाचतावो केरीन ताह चोखो किरज्ये। 21 तेवी पापबोलीन वासड़ाह लेन, गेरान चोखाला जागान बाहेर ठेरायेल जागे हेलगाड़ दिज्ये। 22 दिहरी दिह एक निर्दोस बुकोड़ पापबोली केरीन चेड़ावज्ये; एने जीहे वासड़ा केरीन वेदी चोखी केराय जाय, तिहेच केरीन ज्या बोकड़ा केरीन बी चोखी केराय जाय। 23 जेवी तु ताह चोखो केर लिहे, तेवी एक निर्दोस वासड़ो एने निर्दोस मेंडो चेड़ावज्ये। 24 तु ताह बोगवानान सामने ली यावज्ये, एने चाकऱ्या माणहे ता पोर मिठ टाकीन ताह बोगवानान केरता होमबोली केरीन चेड़ावे। 25 सात दिह वोर दाड़ीन पापबोलीन केरता बुकोड़ तियार किरज्ये, एने निर्दोस वासड़ो एने मेंड्रा माय रेन निर्दोस मेंडो बी तियार केराय जाय। 26 सात दिह वोर चाकऱ्या माणहे वेदीन केरता पाचतावो केरीन ताह चोखो किरते रेय; इह केरीन तान संस्कार रेय। 27 जेवी ता दिह निवरी जाती, तेवी आठवा दिह्यान पासाण चाकऱ्या माणहे तुमरा होमबोली एने मेल मिलाप बोली वेदी पोर चेड़ाया केरी; तेवी मी तुमू पोर खुस एह, बोगवान यहोवान ज्यो बोल हे।"