यहेजकेल 28

सोर ने राजान विरूद जाणाव

1 बोगवानान ज्य वचन मार फाय पोचनो, 2 "एय माणहान सोरा, सोर ने मुखीह के," बोगवान यहोवा इही किथे, तु तारा मोनाम मोठाय केरीन ज्य कियेल हे, "मी बोगवान हे, मी देरीयान विचीम बोगवानान गादी पोर बोह रिनोह, पुण तु सोताह बोगवानान गेत देखाड़ेह, तीबी तु बोगवान नाह, माणुह हे। 3 तु दानिएलाह रेन वोदार एकलीदार ते, हे; काल्ली वात तार हेरी रेन लिकानी निह एय। 4 तु तारी इकेल एने उशारी केरीन मालदेन टुलो किरेल हे, एने तारा गोडामा माय होनो चांदी मिलेल हे; 5 तु मोटली इकेल केरीन लेणो देणो केऱ्यो केरीन तारो मालदेन वोदनो, एने मालदेनान कारेण तारा मोनाम मोठाय रिग गियी।"

6 केरीन बोगवान यहोवा इही किथे; "तु जो तारो मोन बोगवानान गेत देखाड़ेह, 7 केरीन देख, मी तार पोर ओहला पाराया उगे रेन चेड़ाय केरावुह, जा आखा देसाह रेन वोदार सिनाल्या हेते; ता तारी एकलीन होबाह एने देसान होबाह बिगाड़नेन केरता तालवार चालाड़ती। 8 ता तुवाह मोतीन खाडाम टाक देती; ता तालवारी केरीन तुवाह मार देती, एने तारो देड़ देरीयान विचीम पोड़ रेय। 9 तेवी, काय तु तुवाह मारनारान सामने किते रिहे, मी बोगवान हे? नाह, जेवी तु खुनीन आथाम पोड़ जाहे, तेवी तान नेजरीम बोगवान नाह, पुण माणुहच ठेराहे। 10 तु पाराया देसावालान आथाम बिगेर खेतना वालान गेत माराय जाहे; काहाकाय देख, मीच तुवाह ज्य कियेल हे, एने मी मारा वचनाह जोरूर पुरो केरूह, ज्यो बोगवान यहोवान बोल हे।"

सोर राजान पोड़नो

11 पोशो बोगवानान ज्य वचन मार फाय पोचनो, 12 एय माणहान सोरा, सोरान राजान बाराम दुखान गीत बाणावीन ताह के; बोगवान यहोवा इही किथे, "तु ते हाजाम रेन हाजो हे; इकेल माय बोरपुर एने हुतरा राजान निसाणी हे। 13 तु बोगवानान अदन नावान बोगीचा माय रेतालो; तार फाय पेरनेन फाड़का, माणिक्य, पदराग, हिरा, फिरोजा, मोणी, यशब, निलमोणी, मरकद एने आख्‍यु बातीन रातल्यु मोण्यु एने होनान चेड़ायेल फाड़का पेरनेन एता, तारी डोलगी एने पावल्यु तार मायच बाणवाय जायेल एत्यु; जे दिह तु बाणवाय गीयो, ते दिह त्यु बी तियार केराय जायेल एत्यु। 14 तु एक चोमेकणार अबीशिक्त हेरोगदुत इतो, मी तुवाह ओहलो ठेरायो काय तु बोगवानान बोयड़ा पोर रेतालो; तु आक्‍ठान गेत चोमेकणार मोण्युन विचीम चालते फिरतालो। 15 तारो आचरण, तारा जेल्मान दिह्याह रेन ते, ते दिह वोर निर्दोस एतो, जाह वोर तारा जीवणाम पाप रिगेल नाह इतो। 16 जेवी तारो वेपार जुलूम वोद गीयो, तेवी तु देंगाम बोरायीन पापी बोण गीयो; केरीन मी तुवाह एठो जाणीन बोगवानान बोयड़ा पोर रेन उतार दिनो, एने एय, उजेड़वाला हेरोगदुत मी तुवाह आक्‍ठान गेत चोमेकणार मोण्युन विचीम रेन खेतेम किरेल हे। 17 तारी होबायीन कारेण तुवाह मोठाय एती; एने मालदेन ने कारेण तारी इकेल बिगड़ी जायेल एती, मी तुवाह बुई पोर आचटी दिनो; एने राजान ओंगाण मिल्यो काय ता तुवाह देखी। 18 तारा पापान वोदार माय एने वेपार माय दुको किरेल इतो, एने तारो चोखालो जागो एठो एय गीयो; केरीन मी तुवाह तार केरता एक ओहली आक्‍ठो पायदा किऱ्यो, जी केरीन तु खेतेम एय गीयो, एने मी तुवाह देखणारान सामने बुई पोर खेतेम केर दिनो। 19 देस देसान माणहा माय रेन जोला तुवाह जाणतेह, ता सोब तार खाराब कामान वोजेसे नाराज एय गीया; बिवाड़े ओहलो खेतेम एनो, एने तु कायेम ने केरता आरताय जाहे।"

सीदोन ने विरूद जाणाव

20 बोगवानान ज्य वचन मार फाय पोचनो, 21 "एय माणहान सोरा, तारो मुय सीदोन उगे केरीन तान विरूद जाणाव के। 22 एने तु ताह के, बोगवान यहोवा इही किथे, एय सीदोन, मी तार विरूद हे, मी तार विचीम मारी बोड़ाय केरावुह, जेवी मी तान विचीम देन्ड आपुह एने ता माय सोताह चोखालो ठेरावुह, तेवी तुमू जाण लिहो काय मी बोगवान हे। 23 मी ता माय बेमारी पोसरावुह, एने तान सेड़क्यु माय लुय वोयाडुह; एने तान कावदेन तालवार चाली; तान विचीम गायला माणहे पोड़ती, एने ता जाण लेती काय मी बोगवान हे।"

इस्राएलाह बोरकेत जुड़नो

24 बोगवान केयो, "इस्राएल देसान कावदेन वोहणारे देस सोमजो, डोसेलणारे काटा एता, नाहते गुहेपणार बोरशा पोशा नाय ठेराती, तेवी ता जाण लेती काय मी बोगवान यहोवा हे।"

25 बोगवान यहोवा इही किथे, "इस्राएलान गेराणाह ता सोब माणहाम रेन टुलो केरूह, जान विचीम ता खोवलाय रेनाह, एने देस देसान माणहान सामने तान उगे रेन चोखालो ठेराह, तेवी ता, ता देसाम वोहती जो मी मारा सेवक याकुबाह आपेल इतो। 26 ता, ता माय बिगेर बिन वोह रेती; ता गेरे बाणावीन एने अंगुरान वाड्यु लागाड़ती, एने बिगेर बिन रेती; तेवी मी तान कावदेन दुसमोन देसाह देन्ड आपुह, जा इस्राएल पोर मोठाय केरीन दुसमोनीन वेवारो केरतेह, तेवी ता जाण लेती काय तान बोगवान यहोवाच हे।"