यहेजकेल 17

गुवड़ान एने अंगुरान वेलान किस्सो

1 बोगवानान ज्य वचन मार फाय पोचनो, 2 "एय माणहान सोरा, इस्राएलान गेराणाह ज्यी वार्ता एने किस्सो के; 3 मालीक बोगवान इही किथे, एक मुटलो गुवड़ो मोटला फाकावालो लबानोन माय आवो, तो देवदार जाड़ान सिगी पोर बोह गीयो, ता गुवड़ान काबऱ्या लांबाला फाके एता। 4 तो आखान उपेरली कोवली डालीह तोड़ लेदो एने तीह वेपारान एक देसाम लेन गीयो, एने एक वेपारीन हेयराम ठाण दिनो 5 तेवी तो गुवड़ो इस्राएल देसान थोड़ाक बिजा लियावीन एक पाकणार खेताम पेर दिनो, तो ता बिजाह पाणी बोरायेल जागाम मजनून गेत पिऱ्यो। 6 एने तो उगीन आतली पोसेरनार अंगुरान वेलाम बोदलाय गियी वेलान डाल्यु गुवड़ा उगे डोंगानी, पुण तान मुले ताहरीच रेना, जाहरी बिजो ठाणाय जायेल एतो, एने तो अंगुर वेल बोण गीयो, एने तान डालख्यु फुटन्यु एने पाला वोलना।"

7 "पोशो ताहरी एक लांबाला फाकावालो एक गुवड़ो एतो; एने तो अंगुरान वेल ता जागाम रेन जाहरी तो ठाणायेल एतो, ता दिहरा गुवड़ा उगे तान मुले पोसरावणे एने डालख्यु डोंगाणे बाज गीयु काय तो ताह पाणी वाल्या केरी। 8 ता वेलाह हाजाला बुई माय होवटाला पाण्यावाला जागाम लागाड़ाय जायेल एतो, काय ता माय डालख्यु निकले; ता माय फोल लागे, एने ती जुलूम हाजी अंगुरान विलो बुणे।"

9 पुण मालीक बोगवान किथे, "काय ज्य वेल ताहरी वोदी जाहरी ठाणाय जायेल हे, नाह, ताताली जाव चाली एने वेल हुक जाय एने मोर जाय; ज्यी तीच बुयीम हुक जाय, जाहरी ती उगेल एती। 10 केदी ताह उखालीन दिहरा जागाम ठाणे, ते काय ता माय पोशा फुले लाग सेकती? नाह! जेवी पूर्वान वादोण आवी, तेवी तान जापोट से तो आखो हुक जाय।"

किस्सान मतलब

11 पोशो बोगवानान ज्य वचन मार फाय पोचनो, 12 "ता दिंगो केरनार माणहाह के, काय तुमू ज्यु वातुन मतलब नाह सोमेजते? पुशो ताह के, बाबिलोन ने राजा यरूशलेम गीयो एने तान राजा एने मुखी माणहाह तान आरही लेन पुशो बाबेल लेन आवो। 13 तेवी राजान वोसीम रेन एक एदम्याह लेन ता हेऱ्यो वाचा बांद्यो, एने ताह ताबाम रेणेन सुगोण खावाड्यो, एने देसान मुखी माणहाह देरीन लेन गीयो। 14 काय तो राज कोमजोर एय जाए एने पोशो वोद नाय सिके, पुण वाचा पालनेन स्थिर रेय। 15 पुण ता राज ने राजा तान खोबर्‍याह गोड़ा एने मोटली सेना लावणेन केरता मिस्र देसाम मुकल्यो एने इह केरीन बाबेलान राजा हिऱ्यो राड़ किऱ्यो, काय तो जिक सेकी? काय तो वाचाह तोड़नेन ओहलो काम केरीन देन्डाह रेन वोच सेकी!"

16 मालीक बोगवान किथे, "मारा जीवणान सुगोण, जा देसान राजा ताह राजा बाणायेल इतो, एने ताच देसान राजान वचनाह कोम सुमजेह, एने तान वाचाह तो तुड़ेल हे, ताच राजान देस बाबिलोन माय तो मोरी। 17 जुलबुखे आड़खा बाणाया एने माणहाह मारनेन केरता कोंडणेन काम केराय जाय, ते फिरोन एने तान मोटली सेना एने तान लेड़ाय केरनार टुलो बी लेड़ाय माय तान काय काम नाय पोड़ी। 18 काहाकाय तो सुगोणाह कोम जाण्यो, एने वाचाह तोड्यो; तो वचन आपीन बी ओहला कामे किरेल हेते, केरीन तो वोच नाय सेकी।"

19 मालीक बोगवान इही किथे, "मारा जीवणान सुगोण, तो मारा सुगोणाह कोम सुमज्यो, एने मारी वाचाह तुड़ेल हे; ज्यो पाप ताच ने मुंडी पोर टाकुह। 20 एने मी तान केरता मारी जाल ता पोर पोसरावुह, एने तो मारा फासाम फोसी; एने मी ताह बाबुल माय पोचाड़ीन ताहरी ताह देन्ड आपुह, काहाकाय तो मारो बुरहो तुड़ेल हे। 21 तान आखी सेनाह तालवारी केरीन माराय जाती, एने वुचेल माणहे चार चोमखेर जोथ तोथा खोवलाय जाती, तेवी तुमू जाण जाहो काय मी यहोवा ओहलो कियेल हे।"

बोगवानान वायदो

22 पुशो मालीक बोगवान किथे,

"मी देवदार जाड़ान उचाले डालीम रेन एक डाल लेन

एने मी तीह बुयीम ठाणुह, एने तान आखाम रेन उचाली डाल तोडुह,

तीह एक जुलूम उचा बोयड़ा पोर लागाडुह।

23 मतलब मी ताह इस्राएलान बोयड़ान चुटा पोर ठाणुह,

ता माय डालख्यु फुटीन निकेलती एने फोले लागती

एने तो एक जुलूम हाजो देवदार जाड़ रेय,

आखा बातीन चिड़ा ता माय पांजरा बाणावती;

एने तान डालख्युम वोहती केरती।

24 उजाड़ बुईवाला आखा जाड़े जाण लेती

काय मी यहोवा उचाला जाड़ाह नेचा केर देथु,

एने आतल्या जाड़ाह वोदाड़ीन उचा केरथु,

मी निलागार जाड़ाह हुखवी देथु,

एने हुकेल जाड़ाह निलागार केरीन वोदाड़थो,

मी यहोवा कियेल हे, मी ज्याह पुरो केरूह।"