1 बोगवानान ज्य वचन मार फाय पोचनो एने मालीक माहु केयो, 2 "एय माणहान सोरा माहु के, एक अंगुरान वेलान लाकोड़ उजाड़ बुईन काल्ला जाड़ान लाकड़ाह रेन हाजो रेणे? 3 काय केदी ज्यान लाकड़ाह लेन एगदी वापेरनेन वोस्तु बाणावाय जायेल हे? काय माणहे वोस्तुह टांगणेन केरता ज्यान खुटो बाणावतेह? 4 नाह माणहान सोरा अंगुरान वेलान लाकुड़ निस्तो आक्‍ठा माय हेलगाड़नेन काम आवेह। एने तान दुयू सेंडा आक्‍ठा माय हेलगी जातेह एने तान विचीम वालो बाग दुंगड़ाय जाथे, तेवी काय तो कायतान कामान रेय जाथे? 5 जेवी ज्यी तान पुरा आकारा माय एती, तेवी ज्यो काय कामान नाह एती, ते ओवतो ज्यान काय वापेर एय सिकेह जेवी ज्यो आक्‍ठा माय हेलगी गीयो एने दुंगड़ाय गीयो?"

6 जिह केरीन "मी अंगुरान वेलान लाकड़ाह उजाड़ बुईन जाड़ान विचीम आक्‍ठान केरता आपेल हे, तिहेच केरीन मी यरूशलेम माय रेणारा हिऱ्यो वेवारो केरूह। 7 मी तान उगे रेन मारो मुय फिराव लेह, तीबी ता आक्‍ठा माय रेन वोचीन निकलीन आयेल हेते, तीबी आक्ठोच ताह हेलगाड़ीन खेतेम केर देय, एने जेवी मी मारो मुय तान उगे रेन फिराव लेह, तेवी तुमू जाण लिहो काय मीच बोगवान हे। 8 मी देसाह उजाड़ देह, काहाकाय ता मार बाराम बुरहो तुड़ेल हेते।" ज्यो मालीक बोगवानान बोल हे।