1 ओवतो एय माणहान सोरा, गोग ने विरूद जाणाव केरीन इही के, "एय गोग, एय रोश, मेशेक एने तुबल ने मुखी, बोगवान यहोवा इही किथे, मी तार विरूद हे। 2 मी तुवाह फिराव लावुह, एने उत्तर दिशान सेट सेटा देसाम रेन चेड़ाव लेन आवुह, एने इस्राएलान बोयड़ा पोर पोचाडुह। 3 ताहरी तारी दोंदली तारा जेवड्या आथाम रेन पाडुह, एने तारा बेलखाह तारा डाखऱ्‍या आथाम रेन नेचो पाड़ देह। 4 तु तारा आख्‍यु टोल्यु हिऱ्यो एने तार आरहीवाल्यु आख्‍यु जात्यु हिऱ्योच इस्राएलान बोयड़ा पोर मार टाकाय जाहे; मी तुवाह बात बातीन चिड़ान एने जेंगली जेनवेरान खाणो बाणाव देह। 5 तु खेताम पुड़हे, काहाकाय मी ओहलो कियेल हे, बोगवान यहोवान ज्यो बोल हे। 6 मी मागोग माय एने देरीयान दिड़ेवाला हेयराम बिगेर बिन रेणारान विचीम आक्‍ठो हेलगाडुह; एने ता जाण लेती काय मी यहोवा हे। 7 मी मारी पोरजा इस्राएलान विचीम मारो नाव देखाडुह; एने मारो चोखाला नावाह पुशो एठो एणे नाय देव; तेवी देसा देसान माणहे जाण लेती काय मी यहोवा इस्राएलान चोखालो हे।"

8 ज्यी गेटना एणी हे एने ती एय जाय, बोगवान यहोवान ज्‍यो बोल हे, "ज्यो तोच दिह हे जान चेरचा मी किरेल हे। 9 तेवी इस्राएलान हेयराम रेणारे निकेलती एने आथ्यारे आक्ठाम हेलगाड़ देती, ढाल, एने फरी, दोंदली, एने बेलखा, डेंगा, बोरशा, सोबाह सात वोरह्या वोर हेलगाड़ती रेती। 10 केरीन ता मोयदाना माय लाकड़े नाय होद्ती, एने नाय जेंगला माय काटती, काहाकाय ता आथ्याराहच हेलगाड्या केरती; तान लुटणाराह लुटती सांडाड़नारा फाय रेन सांडाड़ती।" बोगवान यहोवान ज्यो बोल हे।

11 ती टेम माय मी गोगाह इस्राएल देसाम माहेण आपुह, तो देरीयान पुर्व उगे रेय; तो आवणार जाणारान खोयरो केवाय, एने आवणे जाणाराह ताहरी रोकाणे पोड़ी; ताहरी आखी गेरदी हेऱ्योच बुजाय जाय, एने ता जागान नाव गोगान बिड़ीन खोयरो पोड़ी। 12 इस्राएलान गेराणो ताह सात मोयना वोर बुजती रेय काय तान देसाह चोखो केरी। 13 देसान आखा माणहे मिलीन ताह बुजती; एने जी टेम माय मारी बोड़ाय एय, ती टेम माय तान बी नाव मोठो रेय, बोगवान यहोवान ज्यो बोल हे। 14 तेवी ता माणहाह ठेरावती, जा लागातार ताच कामाम लाग रेतेह, मतलब देसाम फिरीन आवणे जाणारा हिऱ्यो आरही मिलीन देसाह चोखो केरनेन केरता ताह जा बुई पोर पोड़ रेना एती, बुजती; सात वोरह्या एता वोर ता होद होदीन ज्य काम किरते रेती। 15 देसाम आवणे जाणाराम रेन जेवी एगदा माणहान आड़े देखी, तेवी ता फाय एक निसाणी उबो केरी, ज्यो ती टेम वोर बोणीन रेय जाह वोर बुजणार ताह गोगान बिड़ीन खोयराम बुज नाय देय। 16 ताहरी वाला हेयरान नाव बी हमोना हे, इह केरीन देस चोखो केराय जाय।

17 पुशो एय माणहान सोरा, "बोगवान यहोवा इही किथे, बाती बातीन आखा चिड़ाह एने सोब जेंगली जेनवेराह उकुम आप, एकठा एन आवो, मारा मोटला खाणा माय जो तुमरी केरता इस्राएलान बोयड़ा पोर केरथु, आखा दिशाम रेन एकठा ईवो, काय तुमू माह खावो एने लुय पिवो। 18 तुमू शुरवीरान माह खाहो, एने देरतीन मुखीन लुय पिहो। ज्या बाशान देसान मोटला माताला मेंड्रा, गिदल्या, बुकोड़ एने बुयोल हेते। 19 मारा ता खाणान चेरबी केरीन जो मी तुमरी केरता केरथु, तुमू खाएन आफरी जाहो, एने लुय पिन साक जाहो। 20 ✝ तुमू मारा पाटला पोर गोड़ा, बोहणारे, बाहदुर, एने आखी बातीन बाहदेरान माह खाएन आफरी जाहो, बोगवान यहोवान ज्यो बोल हे।"

21 मी देस देसान विचीम मारी बोड़ाय देखाडुह, एने देसा देसान सोब माणहा माय मारा न्यायनिवाड़ान काम जो मी केरूह, एने मारो आथ जो ता पोर पोड़ी, देख लेती। 22 ते दिह रेन ओंगाण इस्राएलान गेराणो जाण लेय काय यहोवा आमरो बोगवान हे। 23 देसा देसान माणहे बी जाण लेती काय इस्राएलान गेराणो तान पापान कारेण जेली माय जायेल एतो; काहाकाय ता मार हेऱ्या ओहला बुरहो तोड्या काय मी मारो मुय फिराव लिदो एने तान दुसमोनान ताबाम केर दिनो, एने ता सोब तालवारी केरीन माराय गीया। 24 मी तान एठाय एने पापान गेत ता हिऱ्यो वेवारो केरीन ता हिऱ्यो मारो मुय फिराव लिदो।

25 केरीन बोगवान यहोवा इही किथे, "एवी मी याकुबाह जेली माय रेन फिराव लावुह, एने इस्राएलान आखा गेराणा पोर गीण केरूह; एने मारा चोखाला नावान केरता माहु एतखाय एय। 26 तेवी ता आखा बुरहो तोड़नेन कारेण जा ता मार विरूद केऱ्या ता लाजवाती; एने तान देसाम बिगेर बिन रेती; एने कुण ताह नाय बिगाड़े। 27 जेवी मी ताह देसा देसान विचीम रेन फिराव लावुह, एने ता दुसमोनान देसाम रेन टुलो केरूह, तेवी जुलूम देसान नेजरी माय तान उगे रेन चोखालो ठेराह। 28 तेवी ता जाण लेती काय यहोवा आमरो बोगवान हे, काहाकाय मी ताह देसा देसाम देरीन पुशो तान सोतान देसाम टुलो किरेल हे, मी ता माय रेन कुणीह पुशो पाराया देसाम नाय सोडु, 29 एने तान उगे रेन मारो मुय पुशो केदी नाय फिरावो, काहाकाय मी इस्राएलान गेराणा पोर मारो जीव रोचवेल हे, बोगवान यहोवान ज्यो बोल हे।"