João 8

सिनालो केरनार बायकुह माफी

1 पुण यीशु जेतुनान बोयड़ा पोर गीयो। 2 पासाण पुशो विगोच तो मोंदिर माय आवो। तेवी आखा माणहे यीशु फाय आवा, एने तो बोहीन ताह हिकाड़ने बाज गीयो। 3 तेवी देरेमगुरू एने फरिसी एक बायकुह यीशु फाय लावा जी सिनालो केरतालीन देरायेल एती, एने तीह विची माय उबी केर देना। 4 एने यीशुह केया, "एय गुरू, ज्यी बायकु सिनालो केरतालीन देरायेल हे। 5 मुसो नेम माय आमुह ओहलो उकुम आपेल हे, ओहल्यु बायकुह देगड़ाठीन मार। पुण तु ज्यी बायकुन बाराम काय किथे?" 6 ता यीशुह फासाड़नेन केरता इहकेरीन केणे बाज गीया, काहाकाय ता पोर गुनो लागाड़नेन केरता ताह एगदी वात जुड़ जाय। पुण यीशु निड़ो डोंगो वोलीन आंगली केरीन बुय पोर लेखणे बाज गीयो। 7 जेवी ता यीशुह फुसतेस रेना, ते यीशु हुतरोच उबरेन ताह केयो, "तुमू माय रेन जो पापी नाह सोतो, तोस पेल ज्यी बायकुह देगड़ा केरीन देय।" 8 यीशु पुशो निड़ो डोंगो वोलीन बुय पोर आंगली केरीन लेखणे बाज गीयो। 9 पुण ता इहकेरीन होमलीन डावाला रेन ते आतल्या वोर आखा एकान पासाण एक निकलीन जात रेना। यीशु एखालोच रेय गीयो, एने ती बायकु विची माय ताहरीस उबरियेल एती। 10 यीशु हुतरो एन तीह केयो, "एय बाय, ता काहरी जात रेना? तुवाह कुण डेंडान उकुम नाह आप्या काय?"

11 ती केयी, "एय मालीक, कुणीस नाह।"

यीशु केयो, "मी बी तुवाह डेंडान उकुम नाह आपेत।" जा, एने पोशी पाप मा किरहे।*8:11 थोड़ाक लेख माय एने जुनाला अनुवाद माय ज्यो वचन नाह सापड़ेत: 8:1-11; बाकीन थोड़ाक लेख माय ज्योस बाग लुका 21:24 ने पासाण टाकेल हे; एक लेख माय योहान 7:36 ने पासाण लिखेल हे।