1 एवी एय यरूशलेम हेयरान माणहे टोल्यु इन एकठा ईवो, काहाकाय तो आमुह कोंड लियेल हे, ता इस्राएलान न्यायनिवाड़ो केरनाराह गाड़स्या पोर होटा केरीन देती।

2 ✝एय एप्रातान बेथलेहेम, केदी तु उहलो आत्यो हे काय यहुदान एजारो माय गेणाय नाय जातो, तीबी तार माय रेन मार केरता एक एदमी निकली, तो इस्राएल माय राज केरनार रेय; एने तान निकेलनो वेगाला कालाम रेन एने खेतेम नाह एण्या कालाम रेन इते आयेल हे।

3 जाह वोर पेटावाली बायकु सोराह पायदा नाय केरी, ताह वोर मालीक इस्राएलीह सोड़ीन रेय। तान बाद वुचेल इस्राएली माणहे आपणा बायबांडला फाय आव लागती। 4 एने तो उबरीन बोगवान आपेल ताकेत माय एने बोगवान यहोवा तान मोटला नावा माय, तान गोवाली केरी, ता होमालेल रेती। काहाकाय एवी तो देरतीन खुणे वोर मुठो ठेराय।

5 तो हुकान थुड़ रेय। जेवी अश्शुर देसान माणहे आपणा देसा पोर चेड़ाय केरती, एने आमरा राज मेहेल माय पाय मेलती, तेवी आमु तान विरूद सात गोवाले एने आठ मुखी माणहे उबा केरहु। 6 ✝एने ता अश्शुर देसान एने रिगणेन जागे वोर निमरोदान देसाह तालवार चालाड़ीन मार देती, एने जुलबुखे अश्शुरी देसान माणहे आपणा देसाम आवी, एने तान एद्दी माय पाय मिले, तेवी तो एदमी आपुह तान आथाम रेन वोचाड़ी।

7 तेवी याकुबान माणहे, बोगवानान द्वारा मोकलेल ओहटो, खेड़ा पोर पोड़णार पाण्यान गेत रेती, जो कुणीन वाट नाह जुवेत एने नाह एगदा माणहान बोरहे रिथे। 8 याकुबान वुचेल माणहे राज ने एने देस देसान माणहाम ओहला रेती, जीह केरीन जेंगली जेनवाराम सिंह रिथे, नाहते मेंड्रा बोकड्यान टोला माय जुवान सिंह रिथे, जुलबुखे तो तान विचीम रेन जाय, ते देरीन मारते एने वेसेड़ते जाय, एने कुण वोचाड़ नाय सिके। 9 तारो आथ तारा विरोदी पोर पोड़ी, एने तारा आखा दुसमोन खेतेम एय जाती।

10 बोगवानान ज्यो बोल हे, "ती टेम माय मी तारा गोड़ाह तार माय रेन खेतेम केरूह; एने तारा टांगाह खेतेम केरूह। 11 मी तारा देसान हेयराह बी खेतेम केरूह, एने तारा किल्लाह ओदार देह। 12 मी तारा जादु टोनाह खेतेम केरूह, एने तार माय जादु टोना केरनारे जीवताला नाय रेती। 13 मी तुमऱ्यु मुरत्युह एने तुमरी विचीम तुमरा पुजण्या देगड़ाह नास केरूह, एने तुमू पोशा केदी तुमरा आथा केरीन बाणायेल वोस्तुन बोक्ती नाय केर सिकहो। 14 मी तारी अशेरा नावान मुरतीन खांबाह तारी बुयीम रेन उखाल देह, एने तारा हेयराह नास केरूह। 15 जा जा देसान माणहे मारो उकुम नाह मानते, मी ता पोर जुलूम राग केरूह एने बुदलो लेह।"