मीका 6

इस्राएलान विरूद बोगवानान बोलाचाल

1 जी वात बोगवान किथे, ती हुमलो; "उठीन बोयड़ान सोमोर बोलाचाल केर, एने बोयड्यु बी तारी होमेलने जुवे।"

2 एय बोयड़ा, एने देरतीन पाकाला पाया, बोगवानान बोलाचाल हुमलो, काहाकाय बोगवानाह तान पोरजा पोर आरोप हे, एने तो इस्राएल हिऱ्यो बोलाचाल किरेह।

3 एय मारी पोरजान माणहे, "मी तुमरी हिऱ्यो काय अन्याय किरेल हे, माहु किवो काय मी काल्ली वाती माय तुमूह दुख दियेल हे? 4 ✝6:4 निर्गमन 4:10-16; 12:50-51; 15:20मी ते तुमूह मिस्र देसाम रेन काड़ीन लेन आवो, एने गुलामीन गेराम रेन तुमूह सोड़वी लावो; एने तुमरी आगवाय केरनेन मुसा, हारून एने मरियमीह मोकली दिनो। 5 ✝6:5 गिनती 22:2-25; यहोशु 3:1; 4:19एय मारी पोरजान माणहे, एर किरो, काय मोआब ने राजा बालाक तुमरी विरूद काल्लो हुमच्यो किरेल इतो? एने बोरान सोरो बिलाम काय सेला आपेल इतो, एर किरो शित्तीम रेन गीलगाल वोर काय काय गेटना इयेल एत्यु, काय बोगवानान देरमी कामाह जाण सिको।"

बोगवान काय हुदेह

6 मी बोगवानान ओंगाण काय लेन जाव, एने हेरगावाला बोगवानान सामने बोक्ती केरू? ते काय मी होमबोलीन केरता एक वोरह्यान वासड़ा लेन तान सोमोर जाव? 7 काय बोगवानान खुसीन केरता एजारो मेंडा, नाहते जेतुन तेलान एजार नेद्यु पुऱ्यू एय जाती? काय मी मारा पापान पासतावान केरता मारा पेल्ला सोरान बोली केरू? नाहते मार पायदा इयेल एगदान बोली केरू? 8 एय माणहे तो तुमूह केय दियेल हे, काय हाजो हे एने बोगवान तुमू पोर आसा किरेह, न्यायनिवाड़ान कामे किरो, एने गीणीह मोंग किरो एने गेरबोड़ाय माय चालो।

9 बोगवानान बोल यरूशलेम हेयराह आयेड़ने बाजरिनोह, "एकलीदार माणुह बोगवानान नावाह बिथे, केरीन सेजान वातु पोर द्यान दे जा फाय देन्ड आपणेन आदिकार हे। 10 काय मी पापीन गेर एवी वोर लुटीन कामायेल मालदेन, एने आतल्या मापाह विहरी जाव, जो खाराब हे? 11 काय जुठो ताकड़ो एने कोपेट माय बोरायेल थेयली लेय रेणाराह मी माफ केर देव ? 12 तारा मालदार माणहे अत्याचार केरतेह, एने तार माय रेणारे जुठ बोलतेह, एने तान जिब दुको देणेन वात किरेह। 13 केरीन मी तुवाह दिते दितेन गायलो केरूह, एने तारा पापान कारेण तुवाह उजाड़ देह। 14 तु खाहे, पुण आफेरहे नाय, एने तु बुखल्योच रिहे। एने तु तारो मालदेन लेन चालहे, पुण नाय वोचाड़ सिकहे, एने जो काय तु वोचाड़ बी लिहे, ताह मी तालवार चालाड़ीन लुटाड़ देह। 15 तु पिरहे पुण काट नाय सिकहे, तु जेतुनान तेल काड़हे, पुण सोता लागाड़ नाय सिकहे, एने अंगुराह कुटहे, पुण अंगुरान रोह पिय नाय सिकहे। 16 काहाकाय ता ओम्री माणहान नेमा पोर एने अहाबान गेराणान आखा कामा पोर चालतेह; एने तुमू तान होमच्या पोर चालतेह। केरीन मी तुवाह उजाड़ देह, एने ज्या हेयराम रेणारे माणहे तुमरी मोजाक उड़ावती, एने तुमू दिहरा माणहान चिहटा विठहो।"