1 Vuno honi tunanguizi va makuli navakevo naua vasholokele hakati ka vantu, ngue muje mukukakala naua valongisi va makuli hakati keni, vaje mu vushueke vakaneha via kunongesa, na ku muviana Muene uje uavalandele, vakalinehela vakevo vavenia via kunonga ca vuasi vuasi. 2 Kaha vavengi vakakava vingila viavo via vupi, kaha muomu yavo ngila ya vusunga ikapua ya makuli. 3 Kaha muomu yalizangamena liavo vakamikuisa na mezi a makuli, muomu cihiso cavo calaja hanga ca vavandamena, kaha kunonga cavo hanga kucili.

4 Muomu nga Njambi katetelele vaje tungelo omo valingile vupi, vuno honi uavombilile mu ngehena na kuvahaka mu cina ca milima oku vanavakutu na malienge kuvandamena cisompelo, 5 nga katetelele mavu a laja, vuno honi ua yoyesele Noua, muka kuambulula vusunga, na vantu vakuavo vatanu na vavali, omo uanehele livazi ha mavu a vantu vaje vakuhona kutsiliela, 6 nga uatenguluile vinganda via Sondoma na Ngomola kuvipuisa muto uavihisile na kuvipuisa vimueso kuli vaje vaka kuhona kutsiliela, 7 kaha nga uayoyesele muka vusunga Lote, uje uayandele cikuma muomu ya futisi ya vaka vupi 8 (muomu vati yala uje muka vusunga ua muene na kuvua omo uayoyele hakati kavo, uayandele mu vusunga vua muono uendi ha litangua na litangua na vilinga viavo via vipi), 9 ambahoni Muene azivuka mua kuyoyesela vaka vusunga ku vieseko, na kuhaka vaka vupi muintsi ya kashitiko noho kuvanga litangua lia kusompa, 10 kaha cikumani vaje valina kulikovelesa mu mashungu amapi na kushaula nzili yakama.

Mukusimpa na mukulivua, kuvesi na liova lia kushaula vaje vali na vumpau, 11 cipue tungelo vaje vali na nzili yakama kaha naua vali na nzili, kuvekuhandeka via kushaula via kusompa kuli vakevo ku mesho a Muene. 12 Vuno honi ava vanapu ngue tusitu va mu musenge, via kutanga via kuhona mana vasemukilile kuvakuata na kuvatsiha, mukushaula vimpande vije kuvazivuka, vaka vanongesa mu cifua cimo cije civakanonga vakevo, 13 vakayanda muamupi muomu ya vilinga viavo via vipi. Vaka citanda ngue senga mukulisamba mutania muelu oku valinga vupi. Vakevo vakevua shuamua na kupihilila omo valipandakana neni ha kulia oku kuvuahelela cavo cinapu ca makuli. 14 Mesho avo apua akushula na vupangala, kaha vakala na cashu ca kulinga vupi. Vakatuamenena vantu kulinga vupi. Mitima yavo yapua yakulilongesa kulinga lizangamena. Vapua vana vakusinga! 15 Vanaseze ngila ya cili kaha vanayi mungila yeka, vanakava ngila ya Mbalame, muna Mbeole, uje uazangele kutsimana hakulinga viuma via vipi, 16 vuno honi vamutenukilile ha vupi vuendi vavenia, cimulu uakaveveve uahandekele mulizi lia vuntu kaha naua uavindikile kuzaluka ca kananguizi.

17 Vantu ava vanapu ngue mavuelu vuelu akuhona mema, naua ngue mbundu ije ivanapekumuna na linkimba, muomu vakevo vanavavuahesela cihela ca milima cikuma. 18 Muomu, vakahandeka mezi akulihalesa a ngoco, kaha vakapangesa mashungu a mapi ku vantu vaje vanateua kuli vaje vali nakuyoya mu vupi. 19 Va vakulahesa kupatuka, vuno honi vakevo vavenia vanapu va ndungo va futisi ya kunonga, muomu coshe cije cihiana muntu cikeco cimupuisa vundungo. 20 Muomu nga vanaputumuka ku vinzili via vipi via ha mavu kuhitila mu mana a Muene na Muyoyesi uetu Yesu Kilistu, kaha vanavakuata naua na kuvafungula, mamanusuilo avo akapua amapi cikuma kupulakana ha kulivanga. 21 Nga capuile cacili kuli vakevo ngue kuvazivukile ngila ya vusunga kupulakana hanima ya kuzivuka vusunga na kuhiluka munima ku kulela kua lishiko livavahanene. 22 Calingiuile kuli vakevo kuya ku cisimo ca vusunga cije cihandeka nguaco, katali akali vishanjo viendi vavenia, kaha ngulu uje ivanatanesa akahilukila naua na kulilomba mu mandova.