1 Ou honi unapu mukanda ua mucivali uje njinasonekela kuli yeni, vanjazanga, kaha mu mikanda yoshe ivali njinahindula viyongola via mana eni mukumivulukisa, 2 linga muase kuvuluka mezi aje vahandekele tunanguizi vakulela na lishiko lia Muene na Muyoyesi kuhitila mu tunganda veni. 3 Cakulivanga kuvioshe munapande kuvuisisa eci, vaka kushendumuna vakeja mu matangua a mamanusuilo na kushendumuna, vaka kavangeya mashungu avo 4 kaha vakahandeka nguavo, "Nkuma cikulaheso ca kuija cendi cili kuli? Hume haje ha vatsililile vakukuluila vetu, viuma vioshe viatualelelaho kupua ngue mu viakelelemo ku maputukilo akutanga." 5 Vanayengula vusunga ovu, ngeci kuhitila ha lizi lia Njambi melu akeleko kuntsenkulu, kaha mavu a humine ha mema kuhitila mu mema, 6 kuhitila mu mavu aje akeleko aje ahuile na mema kaha a nongele. 7 Vuno honi kuhitila mu lizi limo vene melu na mavu aua aliko honi vana atumbikila tuhia, mavu aua vanatulika noho litangua lia kusompa na kunongesa ca vantu vakuhona kutsiliela.

8 Vuno honi vamuanetu keti muecele vusunga vumo, ngeci kuli Muene litangua limo liapua miaka likulukazi, kaha miaka likulukazi yapua ngue litangua limo kuli Muene. 9 Muene kekusimbula ha cikulaheso cendi ngue vamo mu vaka singaniekelamo, vuno honi uapua ua kusimpa hali yeni kekutonda cipue umo linga akanonge, vuno honi akatondo voshe vatenguluke.

10 Vuno honi litangua lia Muene likeja ngue muizi, ambahoni melu a kahita na cililimo cakama, kaha na viuma via muilu vioshe vika sangunuka na tuhia, kaha mavu na vipangi viliho vaka viuemeka. 11 Muomu viuma vioshe evi vika sangunuka, nkuma mukapua vantu va cifua muka? Munapande kuyoya vuyoye vua kulela na vunjambi, 12 kuvandamena na kuzambuisa kuija ca litangua lia Njambi, muomu melu a kanonga na kusangunuka, na viuma vioshe vika sangunuka na tuhia! 13 Vuno honi kuya ha cikulaheso cendi tuli nakuvandamena melu a maha na mavu a maha muje vusunga mukemo muvuakala.

14 Nankuma, vamuanetu, muomu muli nakuvandamena evi, esekeni cikuma linga akamiuane cakuhona katoma cipue mulonga, vuno honi mu ciyulo. 15 Kaha singaniekeni ngueni kusimpa ca Muene uetu cikeco kuovoka. Mu cifua cimo vene na muanetu utuazanga Paulu uamisonekelele kuya ku mana a vamuhanene kuli Njambi, 16 omu mukemuo muakahandekela mu mikanda yendi yoshe. Muli vimo mukati ka mikanda yendi vije via vikalu kuvivuisisa, vije vaka nzimba na vaka kuhona mana vaka vitengulula na kulituala kukunonga vakevo vavenia, ngue mu vakalingi ku visoneka vikuavo. 17 Nankuma vamuanetu, omo munazivuka evi kanda vicije zangameni keti ngoconi vakamiambata na kapenga ka vantu vakuhona mashiko linga muue mukukolesa ceni. 18 Vuno honi koleni mu kavumbi na mana a Muene uetu na Muyoyesi Yesu Kilistu. Kuli ikeye kukale vumpau ha ntsimbu ino na ku litangua lije liayaye! Ameni.