1 Eli likelio lizi lije liakele hambangelo, lije litunevu nakumona na mesho etu, lije litunatala nakukuata na mavoko etu, eci cikeco cakundama ku lizi lia muono. 2 Muono uasholokele, kaha tuaumuene nakuhana vukaleho hali ukeuo na kuambulula kuli yeni muono uayaye uje uakele na Tate kaha uasholokele kuli yetu. 3 Vije vitunamono nakuivua tuli na kuviambulula naua na kuli yeni linga mukapangele hamo netu, na vipangi vietu vili na Tate na Munendi Yesu Kilistu. 4 Tulina kusoneka eci linga nzolela yetu ipuemo.

5 Ou ukeuo muzimbu utunovu kuli ikeye kaha tunauambulula kuli yeni nguetu Njambi ikeye ceke kaha muli ikeye kumuakele milima ntsimbu yoshe. 6 Nga tuhandeka nguetu tukapangela hamo nendi oku tuenda mu milima, kaha tulina kukuisa naua kaha kutuesi nakuyoya muaya vusunga. 7 Vuno honi nga tuenda mu ceke, ngue muje ikeye uakala mu ceke, kaha tuli nakupangela hamo umo na mukuavo, kaha na maninga a Yesu Munendi akatukusha ku vipi vioshe.

8 Nga tuhandeka nguetu kutuesi na vupi, kaha tuli nakulikuisa yetu vavenia, kaha na vusunga kuvuesi muli yetu. 9 Nga tulitavela vipi vietu, uapua uakulongua na vusunga, kaha akatukonekela vipi vietu nakutukusha kuvia kuhona vusunga vioshe. 10 Nga tuhandeka nguetu kanda tulingeho vupi, kaha tumupuisa muka makuli, kaha na lizi liendi kuliesi muli yetu.