1 Njili nakusonekela yeni vana vange vavandende linga keti mulinge vupi, vuno honi nga uoshe alinga vupi, tuli na muka kutuimanena kuli Tate, ikeye Yesu Kilistu muka vusunga. 2 Kaha ikeye nkombelo ya vipi vietu, kaha keti ha vipi vietu lika vuno honi na vipi via vaka mavu oshe.

3 Kaha hacuma eci tukaleni na vusunga nguetu tumuzivuka, nga tuniunga mashiko endi. 4 Uoshe ahandeka nguendi njimuzivuka vuno honi kononoka mashiko endi napu muka makuli, kaha vusunga kuvuesi muli ikeye. 5 Vuno honi uoshe uje aniunga lizi liendi, muli ikeye muavusunga vene cizango cendi hali Njambi capua ca vusunga. Ha cuma eci tuasa kuzivuka nguetu muavusunga vene tuli muli ikeye. 6 Uoshe ahandeka nguendi uakala muli ikeye cilivene napande kuenda mungila imo vene ije yendelemo Yesu.

7 Vamuanetu, kunjesi nakumisonekela lishiko lialiha, vuno honi lishiko lialaja lije muakele nalio hume hambangelo, lishiko lia laja linapu lizi lije limunevu. 8 Vuno honi njilina kumisonekela lishiko lia liha, lije linapu lia vusunga muli ikeye na muli yeni, muomu milima ili nakuhita kaha na ceke ca vusunga cili laja na kuviakuma.

9 Uoshe ahandeka nguendi ali mu ceke vuno honi azinda muanaye kaha hanga vene acili mu milima. 10 Uoshe uje uazanga muanaye kaha ikeye uakala mu ceke, kaha muli ikeye kukuesi na cimo cije casa kumutsuntsuisa. 11 Vuno honi uoshe uje azinda muanaye ali mu milima kaha ali nakuenda mu milima, kaha kazivuka kuje kuali na kuya, muomu milima yalingisa mesho endi vupuputua.

12 Njilina kusonekela yeni, vanike vavandende, muomu vipi vieni vana vikonekela muomu yendi. 13 Njilina kusonekela yeni vatatetu, muomu muamuzivuka ikeye uje uakeleko hambangelo. Njilina kusonekela yeni vakuenje, muomu munahiana citozi. Njilina kusonekela yeni vanike muomu muazivuka Tate.

14 Njisonekela yeni vatatetu, muomu muamuzivuka ikeye uje uakeleko hambangelo. Njisonekela yeni vakuenje, muomu muapua muva kukolesa, na lizi lia Njambi liakala muli yeni, kaha muamuhiana citozi.

15 Keti muzange mavu cipue viuma vije vili ha mavu. Nga uoshe uje azanga mavu, kaha cizango muli ikeye cakuzanga Tate cahimo. 16 Muomu vioshe vije vili ha mavu, mashungu amuvila na mashungu a mesho na kulihalesa ca muono, ku viapuile via Tate vuno honi viapua via mavu. 17 Kaha mavu akahita na mashungu auo, vuno honi uoshe uje alinga cizango ca Njambi akayoya yoshe ya yaye.

18 Vanike, inapu ntsimbu ya mamanusuilo, kaha ngue muje mumunevu nguavo citozi ua Kilistu ali na kuija, kaha honi vitozi va Kilistu vaneja, nankuma honi tuazivuka nguetu inapu ntsimbu ya mamanusuilo. 19 Vahumine kuli yetu, vuno honi kuvapuile vetu, muomu nga vapuile vetu, nga vatualeleho netu, vuno honi vayile linga cilumbunuke ngeci voshe kuvapuile vetu.

20 Vuno honi vana mivuavesa kuli uje Umo Uakulela, kaha muvoshe muazivuka. 21 Njilina kumisonekela, keti ngue yeni kumuzivuka vusunga, vuno honi muomu mua vuzivuka, kaha muzivuka ngeci makuli kekuhuma ku vusunga.

22 Nkuma iya honi muka makuli? Napu uoshe uje aviana nguendi, Yesu keti ikeye Kilistu. Muntu uacifua eci napu citozi ua Kilistu, uje aviana Tate na Muana. 23 Naumo uahi uje aviana Muana ali na Tate. Uoshe uje alitavela kuli Muana ali na Tate naua.

24 Eceleni vije vimuovuile hambangelo vikale muli yeni. Nga vije vimuovuile hambangelo vili muli yeni, ambahoni mukakala muli Muana na muli Tate. 25 Kaha eci cikeco cije ca natukulahesa, cikeco muono ua yaye.

26 Njilina kumisokela viuma evi hali vaje vali na kutonda ku mikuisa, 27 vuno honi kuvuavesa cije cimuatambuile kuli ikeye cakala muli yeni, kaha kucesi na seho cipue naumo uahi amilongese, muomu kuvuavesa cendi cimilongesa vioshe, kaha cinapu ca vusunga keti ca makuli, ngue mujevene mucina milongesela, kaha kaleni muli ikeye.

28 Kaha honi yeni vanike vavandende kaleni muli ikeye, linga omo akasholoka tukakale na kusimpa kaha keti tukevue shuamua hakuija cendi. 29 Nga muazivuka ngueni ikeye uapua ua vusunga, kaha cilivene mukala na vusunga ngueni uoshe uje alinga vusunga uasemuka kuli ikeye.