1 Uoshe uje atsiliela nguendi Yesu ikeye Kilistu kaha napu muna Njambi, kaha uoshe uje azanga cisemi kaha uazanga naua na muana. 2 muomu yeci tuazivuka nguetu tuazanga vana va Njambi, kaha omo tuzanga Njambi na kuononoka mashiko endi. 3 Muomu eci cikeco cizango ca Njambi, linga tuniunge mashiko endi. Kaha mashiko endi ku apuile citeli. 4 Muomu coshe cije cakusemuka kuli Njambi cikahiana mavu, kaha eci cikeco kuhiana cije cikahiana mavu, eci cikeco lutsilielo luetu. 5 Nkuma iya uje nahiana mavu? Ikeye muntu uje natsiliela nguendi Yesu ikeye Muna Njambi.

6 Yesu Kilistu ikeye uje uezile na mema na maninga, keti na mema lika vuno honi na mema na maninga. 7 Kaha Cimbembesi napu mukaleho, muomu Cimbembesi ikeye vusunga. 8 Kuli vakaleho vatatu, vakevo Cimbembesi, mema, na maninga, kaha voshe ava vatatu vaka litavasana. 9 Nga tutambula vukaleho vua vantu, vuno honi vukaleho vua Njambi vuapua vuakama, muomu ovu vukevuo vukaleho vua Njambi vuje vuahanene hali Munendi. 10 Uoshe uje atsiliela muli Muna Njambi ali na vukaleho muli ikeye vavenia. Kaha uoshe uje katsiliela Njambi, namupuisa muka makuli, muomu katsilielele muvukaleho vuje Njambi uahanene hali Munendi. 11 Kaha ovu vukevuo vukaleho, ngeci Njambi uatuhanene muono uayaye, kaha ou muono uli muli Munendi. 12 Kaha uoshe uje ali na Muna Njambi ali na muono, kaha naua uoshe uje kesi na Muna Njambi kesi na muono.

13 Njilina kusoneka eci kuli yeni vaje vanatsiliela mu lizina lia Muna Njambi, linga muzivuke ngueni muli na muono uayaye. 14 Kaha eci cikeco kusimpa cije tulinaco muli ikeye, ngeci nga tulomba cuma coshe kuya muailamo cizango cendi akatuvua. 15 Kaha nga tuazivuka nguetu akatuvu muli vije vioshe tukalombo, kaha tuazivuka nguetu tuatambula laja vije vituamulombele.

16 Nga umo amona munaina alinga vupi vuje kuvutuala kukutsa, kaha napande kumulombelela, kaha Njambi akamuhana muono, muomu vupi vuendi kuvutuala kukutsa. Kuli vupi vuje vutuala kukutsa. Kunjesi nakuhandeka nguange muntu napande kulombelela hali eci. 17 Vilinga vioshe via vipi vinapu vupi, vuno honi kuli vupi vuje kuvutuala kukutsa.

18 Tuazivuka nguetu muntu uoshe uje uakusemuka kuli Njambi kekulinga vupi, vuno honi Muna Njambi vaka muniungu, kaha muka vupi kasa kumukuata.

19 Tuazivuka nguetu tu vantu va Njambi, kaha mavu oshe ali munzili ya muka vupi.

20 Kaha tuazivuka nguetu Muna Njambi neja kaha natuhana kuvuisisa, linga tumuzivuke uje ua vusunga, kaha tuli muli ikeye uje ua vusunga, muli Munendi Yesu Kilistu. Ou ikeye Njambi ua vusunga na muono uayaye.

21 Vana vavandende, liniungeni yeni vavenia ku tumponia.