1 Yange Paulu, ngamba ya Yesu Kilistu na kanganda uje yahanguile nakunjisana kuli Njambi mukuambulula Muzimbu uendi Uacili.

2 Njambi uakulahesele laja Muzimbu Uacili kuhitila muli tunanguizi vendi, ngue muvanavisoneka mu Visoneka via Kulela. 3 Vinapu via Munendi, ngue ku vuyoye vuendi vua ha mavu, uasemukile ku ntanga ya Ndaviti, 4 kuhitila muli Cimbembesi Uakulela Yesu vamusholuele na nzili yakama kupua Muna Njambi omo vamusanguile ku vatsi. 5 Kuhitila muli Yesu tuatambuile kavumbi na vunganda linga tusane vaje keti Vayunda linga vononoke kulutsilielo muomu ya lizina liendi. 6 Kaha neni naua munapu vamo hakati kavaje keti Vayunda vaje vavanasana linga vakundame kuli Yesu Kilistu.

7 Nankuma, njilina kusonekela kuli yeni voshe muli mu Loma vaje Njambi vazanga nakumisana linga mupue vantu vendi vakulela.

Kavumbi na ciyulo vikale kuli yeni vije vihuminina kuli Njambi Tatetu na Muene Yesu Kilistu.

8 Cakulivanga, njitsantsela kuli Njambi yange kuhitila muli Yesu Kilistu hali yeni voshe, muomu lutsilielo lueni lunatsimana ha mavu oshe. 9 Njambi ikeye mukaleho uange ngeci vioshe vije vinjilina kuhandeka vinapu via vusunga, Njambi uje injili nakupangela na mutima uange uoshe mukuambulula Muzimbu Uacili ua Munendi. Njambi nazivuka ngeci njikamivuluka, 10 ntsimbu yoshe mu malombelo ange. Njikalombo nguange Njambi mu cizango cendi nga atava njije kuli yeni nakumimeneka. 11 Njishunguiya cikuma kumimona, linga njakumihaneko vuana vua mu Cimbembesi mukumikolesa. 12 Hano njilumbununa ngeci yeni nange tuakulikolesa ha ntsimbu imolika, yeni ha lutsilielo luange kaha nange ha lutsilielo lueni.

13 Vamuanetu, munapande kuvuluka ngueni vintsimbu viavingi njakele na vutumbe vuakuija oko nakumimeneka, vuno honi kuli cuma cimo cinanjivindika. Njitonda kukoka vantu hakati keni ngue munjinalingi hakati ka vaje keti Vayunda. 14 Njilina likongo lia vipangi hakati ka vantu voshe, kuli Vangelengu na vaje keti Vangelengu, na kuli vaka kunangula na vilema. 15 Nankuma, njitonda cikuma kuambulula Muzimbu Uacili nakuli yeni naua muakala mu Loma.

16 Kunjesi na shuamua ya kuambulula Muzimbu Uacili, muomu unapu nzili ya Njambi ije ineha kuovoka kuli vaje voshe vatsiliela, ha kulivanga kuli Vayunda, kaha naua na kuli Vangelengu. 17 Muomu mu Muzimbu Uacili mukemo vusunga vua Njambi vanavusholola kuhitila mulutsilielo ngue muvihandeka visoneka nguavio, "Muntu uje ivanapuisa muka vusunga ku mesho a Njambi akayoya ha lutsilielo."

18 Vutenu vua Njambi vunasholoka kuhuma muilu nakuluisa vupi vuoshe na vilinga via kupihia via vantu vaje vilinga viavo viavipi vivindika vusunga linga keti vavuzivuke. 19 Muomu vije vineha nguavo linga vazivuke Njambi vinasholoka, muafua Njambi navisholola kuli vakevo. 20 Hume haje Njambi hatangelele mavu, vifua viendi vije kutuasa kumona, nzili yendi ya yaye na cifua cendi ca Vunjambi vinasholoka muacili, vantu vasa kuvizivuka mu viuma vije vianalingi Njambi. Nankuma, vantu ava kuvasa kulikonela houe. 21 Cipue vene vazivukile Njambi, vuno honi kuva musingimikile cipue kumuhana citsantsela. Vuno honi visinganieka viavo vinapu viangoco kaha na mitima yavo yamupulungua inashulu na milima. 22 Vakahandeka nguavo vanapu vaka mana, vuno honi vanapu vilema, 23 kaha vanalikela kulemesa uje kekutsa, nakulemesa viuma via vifua via vuntu vije kuviekuyoya miaka yoshe na vifua via tuzila cipue tusitu cipue viakulikoka.

24 Nankuma, Njambi navecelela linga valinge viuma via mazilo ngue ku mashungu a mitima yavo, kaha valinga viuma via shuamua kuli umo na mukuavo. 25 Vanaviana kutsiliela vusunga vua Njambi, kaha vanatsiliela makuli nakulemesa nakupangela vije vianatanga Njambi kuhona kulemesa vavenia uje uavitangele, uje ivanapande kushangazala miaka yoshe ya yaye! Ameni.

26 Muomu ha cuma eci, Njambi navecela linga valinge viuma via shuamua ngue ku mashungu avo. Cipue vampuevo vanatenguluka kulinga vilika na vamala mu ngila ya cisemua, vuno honi valina kuvilinga mu vingila vije kuviapandelemo. 27 Kaha mu ngila imo naua vamala vanatenguluka kulinga vilika na vampuevo mu ngila ya cisemua, vuno honi valinakulinga vukoyi na vakuavo vamala. Vamala vali nakulinga viuma via shuamua kuli umo na mukuavo, kaha ha cuma eci vanatambula fueto inavapande muomu ya vilinga viavo viavipi vije vivanalingi.

28 Muomu vantu ava vanaviana kuniunga vusunga vua kuvuisisa Njambi mu viyongola viavo, Njambi navecelela linga vakale na mana a mapi, linga valinge viuma vije kuvapandele kulinga. 29 Vanashulu na viuma vioshe via mazilo na vipi na lizangamena na cizindo, vanashulu na cipululu nakutsiha na luozi na makuli na lizangamena. Vakafueye, 30 nakuhandeka viavipi hali umo na mukuavo, vanapu vaka kuzinda Njambi, vaka likamba, vaka kulihalesa, kaha vaka kulipamba, vayongola vingila viavingi via kupangelamo vupi, kuve kuononoka visemi vavo, 31 kuve kuvuisisa, kuve kuniunga vikulaheso viavo, kaha kuve kumuesa ngozi cipue kuvuila vakuavo cikeketima. 32 Cipuevene vazivuka nguavo kusompa ca Njambi cihandeka nguaco vantu vaje vayoya mu ngila eyi vanapande kutsa, keti lika viuma evi vali na kutualelelaho kulinga houe, vuno honi naua vacilitavasana na vaje vaka kuvilinga.