1 Kukuesi cihiso kuli vaje vali na kuyoya muli Kilistu Yesu. 2 Muomu Lishiko lia Cimbembesi, lije litunehela muono muli Kilistu Yesu, linanjipatula ku lishiko lia vupi na kutsa. 3 Njambi ualingile vije lishiko lia Mosesa liahonouele kulinga. Muomu vuntu vuapuile vua kuzeya, Uahisile vupi mu vuntu ha kutuma Munendi, uje uezile mu cifua ngue cetu ca vuntu, mukuhumisa vupi. 4 Njambi uapangele eci ngeci vilinga via vusunga vua Lishiko lia Mosesa vavishulise muli yetu vaje vavali nakutuamenena mucimbembesi, keti mu vuntu houe. 5 Kaha omo vaje vanapu vaka vuntu, vayongola viuma via vuntu, vuno honi vaje vanapu vaka Cimbembesi, vayongola viuma via Cimbembesi. 6 Nga cizango ca vuntu cikutuamenena, kaha fueto yaco kutsa vuno honi nga cizango ca Cimbembesi cikutuamenena, kaha fueto yaco inapu muono na ciyulo. 7 Muntu uje akatonda via vuntu akempuka citozi ca Njambi, muomu akaviana kukavangeya mashiko a Njambi, muavusunga vene kakaononoka. 8 Kaha voshe vaje vali nakuvatuamenena ku vuntu kuvasa kuvuahelesa Njambi.

9 Kumuekuyoya ngue muje vuntu vutonda linga muyoyemo, vuno honi muyoya ngue muje Cimbembesi mu citondelahamo, nga Cimbembesi ua Njambi akala muli yeni. Uoshe uje kesi na Cimbembesi ua Kilistu, kaha kakundama kuli Kilistu. 10 Vuno honi nga Kilistu ali muli yeni, cipue vene mivila yeni ikeyo inapu ya kutsa muomu vupi, vuno honi vimbembesi vieni vilinakuyoya muli yeni muomu vanamipuisa vaka vusunga ku mesho a Njambi. 11 Nga Cimbembesi ua Njambi, uje uasanguile Yesu ku vatsi, akala muli yeni, kaha uje uasanguile Kilistu ku vatsi ikeye naua akahana muono ku mivila yeni ya kutsa ha Cimbembesi cendi uje ali muli yeni.

12 Vamuanetu kutuapandele ngue kuyoyela mu vuntu ngue muvuatonda vuntu vuetu houe. 13 Kaha nga muyoya ku vupi vua vuntu mukatsa, vuno honi nga ku Cimbembesi mutsihia vilinga via muvila ua vupi vua vuntu, kaha mukayoya. 14 Muomu voshe vaje Cimbembesi ua Njambi alina kuvatuamenena vanapu vana va Njambi. 15 Kaha Cimbembesi uje yanamihana Njambi uamipuisile mu vandungo linga mukale na liova, vuno honi Cimbembesi uje namipuisa vana va Njambi, kaha na nzili ya Cimbembesi tulina kutambeka kuli Njambi nguetu, "Tate! Tatetu!" 16 Cimbembesi ua Njambi nalitavasana na Cimbembesi uetu ngeci tunapu tuvana va Njambi. 17 Nga tuvana kaha tunapu tuvasuana, vasuana va Njambi hamo na Kilistu nga cilivene tulipangela hamo mutuyando tuendi cilivene tukalipangele hamo naua namu vumpau vuendi.

18 Yange njasinganieka nguange tuyando otu tutuli nakuyanda ntsimbu ino kutuasa kutuseteka na vumpau vuje vukasholoka kuli yetu. 19 Nankuma, viakutanga vioshe vili na cizango cakama ca kuvandamena Njambi ngeci asholole vana vendi. 20 Muomu viakutanga vioshe vavihisile ngeci vipue viuma viangoco, keti ngue ku cizango cavio houe, vuno honi capuile cizango ca Njambi linga cipue ngacije. Vuno honi cipue ngocovene kuakele kutsiliela, 21 nga viakutanga ku litangua limo vikapatuke ku vundungo vua kutsa, kaha vukakale na vumpau vuakupatuka kua vana va Njambi. 22 Muomu tuzivuka nguetu kuheta na ku ntsimbu ino, viakutanga vioshe vili nakulikemanga ngue mpuevo uje atonda kusema. 23 Vuno honi keti viakutanga lika vili nakulikemanga houe, netu naua tuli na Cimbembesi ngue vaje vakulivanga kupua vana va Njambi ngeci atupuise vana vendi nakupatula mivila yetu. 24 Muomu tunovoka muafua ha kutsiliela, vuno honi kutsiliela cije kutumona kukeko keti kutsiliela, nkuma iya honi ali nakutsiliela vije vianamono? 25 Vuno honi nga tuli na kutsiliela vije kutuamuene, kaha hanga tucivandamena nakusimpa.

26 Mu ngila eyivene Cimbembesi atukuasa mukuzeya cetu. Muomu kutuzivuka muje vati tunapande kulombela vuno honi Cimbembesi ikeye akalambelela kuli Njambi na mezi akulikemanga aje kutuasa kutumbula. 27 Kaha Njambi uje amona mu mitima yetu, azivuka muviafua visinganieka via Cimbembesi muomu Cimbembesi akalambelela kuli Njambi hali vantu vendi ngue ku cizango cendi.

28 Tuzivuka nguetu mu viuma vioshe Njambi akalingi muacili na vaje vamuzanga, kaha navaje vanasana ku cizango cendi. 29 Kaha vaje vahanguile laja Njambi vakevo naua vatepele kuvapuisa ngue Munendi, linga Munendi apue uakulivanga kusemuka ha vavengi vaka kutsiliela. 30 Kaha vaje vatepele Njambi, vakevo vasanene, vaje vasanene, uavapuisile vaka vusunga ku mesho endi, kaha vaje vapuisile vaka vusunga ku mesho endi vakevo vahanene vumpau vuendi.

31 Ha viuma vioshe evi, nkuma tukahandeka vikahoni? Nga Njambi napu uetu, nkuma iya honi asa kutuluisa? 32 Njambi kavianene kuhana Munendi umo lika, vuno honi uatueceleleye yetu voshe! Uje uatuhanene Munendi, nkuma kasa kutuhana viuma vioshe ndi? 33 Nkuma iya honi asa kuvangeya vaje vanahangula Njambi? Njambi ikeye muka kuvapuisa vaka vusunga. 34 Nkuma iya asa kuvahisa? Keti Kilistu Yesu, uje uatsile, cipue uje ivasanguile ku vatsi kaha ali ku livoko lia cilio lia Njambi, mukutulambelelako kuli Njambi! 35 Nkuma iya asa kutuhangununa ku cizango ca Kilistu? Nkuma tuyando indi vukalu, nkuma mapakeso indi njala, nkuma kuhutua indi vushonde, indi kutsa? 36 Ngue muvanasoneka mu visoneka nguavo,

"Muomu ya lizina liove tuli mu vushonde vua kutsa ntsimbu yoshe,

valina kutupangesa ngue vampanga vaje vaya mukuvatsihia."

37 Houe, mu viuma vioshe yetu tunahiana muli ikeye uje uatuzangele! 38 Muomu njazivuka nguange muavusunga nacimo cahi casa kutuhumisa ku cizango ca Njambi, cipue kutsa cipue muono, cipue tungelo cipue vaka kusuana, cipue vaka nzili vaje vakala muilu, cipue ku ntsimbu ino vene cipue ku ntsimbu ya kulutue, 39 cipue cuma cili muilu, cipue cuma cili ha mavu, nacimo cahi cakutanga casa kutuhumisa ku cizango ca Njambi cije cinapu cetu kuhitila muli Kilistu Yesu Muene uetu.