1 Vamuanetu, muavusunga muasa kuvuisisa evi vinjihandeka kuli yeni, muomu yeni voshe muazivuka Lishiko lia Mosesa. Lishiko lia Mosesa lili na nzili hali vantu omo valinakuyoya lika. 2 Mpuevo uakushomboka vanamukutu na Lishiko kuli yaliendi, omo yaliendi ali nakuyoya, vuno honi nga yaliendi atsa, kaha honi uje mpuevo napatuka ku Lishiko lije lia mukutile kuli yaliendi. 3 Kaha nga uje mpuevo akala na yala ueka naua omo yaliendi acili na kuyoya, kaha vamutumbula nguavo muka vupangala, vuno honi nga yaliendi atsa, kaha akashomboka kuli yala ueka naua, ou mpuevo napatuka kapu naua muka vupangala. 4 Vamuanetu, neni naua cifua cimo, neni naua mu natsi ku lishiko muomu munapu vilio via muvila ua Kilistu, kaha honi munakundama kuli ikeye, uje ivasanguile ku vatsi linga tupangele Njambi vipangi viacili. 5 Muomu tuayoyele mu vusitu, mashungu a vupi aje Lishiko lia Mosesa liashangumuine akele nakupanga mu mivila yetu, kaha vioshe vitualingile viatutuelele ku kutsa. 6 Vuno honi, tunapatuka ku Lishiko lia Mosesa, muomu tuatsile ku cije catupuisile vinzinda. Kutuesi naua nakupanga mu ngila ya laja ya Lishiko lia Mosesa lia kusoneka, vuno honi mu ngila yaiha ya Cimbembesi.

7 Nkuma tunapande kuhandeka nguetu Lishiko likelio liapua vupi ndi? Houe keti ngoco! Vuno honi liapuile Lishiko lije lianjilingisile linga njizivuke vupi. Nga Lishiko lia Mosesa kuliahandekele ngualio, "Keti uliveyele cuma ca mukueni," Nga ku njazivukile lishungu eli. 8 Vuno honi vupi vua uanene muhela mukushangumuna mashungu a vupi amengi muli yange. Nga Lishiko kuliakeleko, nga vupi kuvuesi na nzili. 9 Nange vene ha ntsimbu imo njayoyele kuakuhona Lishiko, vuno honi omo lishiko liezile, vupi vuakele na nzili, 10 kaha njatsile. Kaha Lishiko lije liapandele kuneha muono, lianehele kutsa kuli yange. 11 Vupi vuauanene muhela, kaha mu nzili ya lishiko vupi vuanjikuisile na kunjitsiha.

12 Lishiko lia Mosesa likelio liapua lia kulela, naua na Lishiko liapua lia kulela na vusunga vuacili. 13 Vuno honi nkuma eci calumbunuka ngeci cije cacili cikeco canehele kutsa kuli yange ndi? Houe keti ngoco! Eci calingiuile muomu vupi, hakupangesa cije cacili, vupi vuanehele kutsa kuli yange, linga cifua cavuo cisholoke ngeci muavusunga vunapu vupi. Kaha mu nzili ya lishiko vupi vunasholoka kupua vua vupi cikuma.

14 Tuazivuka nguetu Lishiko lia Mosesa liapua liaku cimbembesi, vuno honi yange njinapu muntu ua muvila ua ntsitu, uakulandesa ngue ndungo ku vupi. 15 Kunjizivuka vinjilinga, muomu kunjekulinga vije vinjitonda kulinga, vuno honi njikalingi vije vinjazinda. 16 Kaha omo nga njilinga vije kunjatondele kulinga, eci cimuesa ngeci Lishiko lia Mosesa linapu lia vusunga. 17 Kaha keti yange vene muavusunga njili nakulinga viuma evi, vuno honi vupi vuje vuli nakuyoya muli yange. 18 Muomu njazivuka nguange kumuesi vucili muli yange, eci cikeco mu vuntu vuange. Cipue vene yange njila na lishungu liakulinga via cili, vuno honi ku njasa kuvilingamo. 19 Muomu kunjekulinga vucili vuje vunjikatondo kulinga, vuno honi njikatualelelaho kulinga vupi. 20 Nga njilinga cije kunjatondele kulinga, eci cinalumbunuka ngeci keti yange njilinakucilinga, vuno honi vupi vuje vuli muli yange vukevuo vulinakucilinga.

21 Nankuma, njinauana nguange Lishiko lia Mosesa likelio lilinakupanga, omo njitonda kulinga via cili, kaha haje vene vupi vusholoka. 22 Muomu njivuahelela mu Lishiko lia Njambi mukati ka mutima uange. 23 Vuno honi njimona Lishiko lieka lilinakupanga mu muvila uange, Lishiko lije lilinakuluisa Lishiko lije linjinatsiliela mu mutima uange. Linanjipuisa cinzinda ca Lishiko lia vupi lije lilinakupanga mu muvila uange. 24 Yange muntu uakuvindama! Nkuma iya honi akanjamena ku muvila ou unjituala ku kutsa? 25 Njitsantsela kuli Njambi hali Muene uetu Yesu Kilistu!

Kaha, mukemuo munjinapu, yange likani ngue njasa kupangela Lishiko lia Njambi na mutima uange uoshe, vuno honi vuntu vuange vupangela Lishiko lia vupi.