1 Njihandeka vusunga muli Kilistu Yesu, kaha kunjesi nakuhandeka makuli. Visinganieka viange lelo vilinakuambulula hamo nange hali Cimbembesi Uakulela, 2 kaha omo njikahandeka nguange njili na vusiua vuakama cikuma, nakuvavala cije kucasa kuhua mu mutima uange, 3 njayonguele nguange njakele mu cisingo ca Njambi na kulitepa kuli Kilistu muomu ya vantu vange. 4 Kaha ava vanapu vaka Isaleli, vaje Njambi uapuisile vana vendi mukuvasholuela vumpau vuendi, ualingile litavasano navo nakuvahana Lishiko lia Mosesa, vakalemesa mu njivo ya Njambi, kaha vanatambula vikulaheso via Njambi. 5 Kaha vanapu vatekuluila va vakukuluila vakutsimana, na Kilistu mu vuntu vuendi, nakundama ku cisemua cavo. Njambi uje muka kuyula viuma vioshe, vamushangazale miaka yoshe! Ameni.

6 Kunjesi nakuhandeka nguange cikulaheso ca Njambi cinahonoua, muomu keti vantu voshe Vaisaleli vapua vantu va Njambi. 7 Keti voshe vatekuluila va Avilahama vapua vana va Njambi houe. Vuno honi Njambi uahandekele kuli Avilahama nguendi, "Kuhitila muli Isake mukemuo lika mukakala na vatekuluila vaje njamikulahesele." 8 Eci calumbunuka ngue vana vaje vasemuka ku cisemua ca vuntu keti vana va Njambi, vuno honi vantu vaje vanasemuka muomu cikulaheso ca Njambi vakevo vavatumbula vatekuluila va vusunga. 9 Muomu Njambi uashikile Avilahama na mezi aua nguendi, "Mungolosika ha ntsimbu inovene njikahiluka naua, kaha Sala akasema muana ua yala."

10 Kaha keti eci lika houe. Vuno honi muomu vana va Lambeka va vamala vakele na ishavo umolika, ikeye kukuluila yetu Isake. 11 Omo kanda vaje vampasa vasemuke naua tele kanda valinge viacili cipue viavipi, linga cizango ca Njambi cakuhangula citualeleleho, 12 kaha Njambi ualekele Lambeka nguendi, "Mukuluntu akapangela shongo yendi." 13 Ngue muvanasoneka mu visoneka nguavo, "Njazangele Yakomba, na kuzinda Isau."

14 Nkuma vikahoni tukahandeka, nkuma Njambi uakahangu ndi? Houe keti ngoco. 15 Muomu Njambi uahandekele kuli Mosesa nguendi, "Njikovuila cikeketima hali uoshe uje njikazanga, kaha njikevuila ngozi hali uoshe uje injitonda kuvuila ngozi." 16 Nankuma viuma vioshe kuvikundama kuli vije viatonda muntu cipue vije vialinga houe, vuno honi ha cikeketima ca Njambi lika. 17 Ngue muvanasoneka mu visoneka nguavo Njambi uahandekele kuli muene ua Ingito nguendi, "Njakupuisile muene linga njikupangese mukusholola nzili yange na kunjitsimanesa ha mavu oshe." 18 Nankuma Njambi ali na cikeketima hali uoshe yatonda, kaha akaluuisa mitima ya uje uoshe yatonda.

19 Kaha nga umo ueni akanjihula nguendi, "Nkuma nga omu mukemo mucinafu, kaha Njambi asa kutupaya vati? Nkuma iya asa kuviana cizango ca Njambi?" 20 Nkuma yove, yove iya kavusamba kange, linga ulikumbulule na Njambi? Ndeho ya vuma kuyasa kuihula muntu uje uaishongele nguayo, "Nkuma vika uanjimungila muje?" 21 Nkuma uje muka kushonga vindeho kesi na nzili yakupangesa vuje vuma muoshe muatondela ndi? Nkuma kasa kushonga vindeho vivali ha citapu cimolika ca vuma, ndeho imo yakupangesa viuma via seho, kaha ndeho ikuavo yakupangesa viuma viangoco ndi?

22 Kaha eci cinapu cavusunga ha vije vianalingi Njambi. Njambi uatondele kumuesa vukalu vuendi nakumuesa nzili yendi. Vuno honi uasimpile nakuyanda hali vaje uatalele na vukalu, vaje uafuililile kunongesa. 23 Kaha naua Njambi uatondele kumuesa vumpau vuendi vuakama, vuje vuamuaniene hali yetu vaje amuesa cikeketima, yetu vaje vanavuahesa linga tutambule vumpau vuendi. 24 Muomu tunapu vana vaje vanasana, keti lika hakati ka Vayunda houe, vuno honi naua na hakati ka vaje keti Vayunda. 25 Evi vikevio Njambi uahandekele mu livulu lia Hosiya nguendi,

"Vantu vaje kuvapuile vange

Njikavasana ‘Vantu vange.’

vantu vaje kunjazangele

Njikavasana nguange, ‘vanjazanga.’

26 Kaha ku cihela kuje kuvavalekele nguavo, ‘Keti mu vantu vange,’

Kukekuo kuje vakavasana nguavo vantu va Njambi ua kuyoya."

27 Kaha Isaya uahandekele hali vaka Isaleli nguendi, "Cipue vene nga vantu Vaisaleli vanalana ngue museke ua ku cikuma ca cisali, vuno honi vaje vavandende vakasalaho vakevo vakovoka. 28 Muomu Muene akasompa vuasi vuasi vantu voshe va hano ha mavu ntsimbu imolika nakumanusula." 29 Ngue muje muahandekele Isaya ha kulivanga nguendi, "Nga Muene muka nzili yoshe ngue katusezeleleko vatekuluila, ngue tunapu ngue Sondoma na Ngomola."

30 Nkuma vikahoni tukahandeka? Tukahandeka nguetu vaje keti Vayunda vaje kuvalipuisile vakevo vavenia vaka vusunga ku mesho a Njambi, vavapuisile vaka vusunga ku mesho endi ha lutsilielo, 31 tele kanda vantu va Njambi vaje vatondele Lishiko lia Mosesa linga livapuise vaka vusunga ku mesho a Njambi, kuvaliuanene. 32 Nkuma vikahoni? Muomu kuvajendamenene ha lutsilielo vuno honi hali vije vivalingile. Kaha vatsuntsukile ha "livue lia kutsuntsukisa." 33 Ngue muvanasoneka mu visoneka nguavo,

"Tala njikahaka livue mu Siyone

Lije likatsuntsuisa vantu,

Livue lije likavauisa.

Vuno honi uoshe uje atsiliela kuli ikeye kakovu shuamua."