1 Vamuanetu, vinjitonda cikuma mu mutima uange na lilombelo liange kuli Njambi vinapu ngeci vantu vange vovoke! 2 Yange njinapu mukaleho uavo muomu vakevo vapua vaka kulihana cikuma kuli Njambi, vuno honi kulihana kuavo keti kua mana a vusunga. 3 Muomu kuvazivukile ngila ije yakapuisa Njambi vantu linga vapue vaka vusunga ku mesho endi, vuno honi vakevo vaneseka kupangesa ngila yavo vavenia, ngeci, kuvalihanene vakevo vavenia ku ngila ya Njambi ije yikapuisa vantu linga vapue vaka vusunga. 4 Muomu Kilistu ikeye mamanusuilo a Lishiko lia Mosesa, linga uoshe uje atsiliela vamupuise muka vusunga ku mesho a Njambi.

5 Mosesa uasonekele evi hakupuisa muntu linga apue muka vusunga ku mesho a Njambi ha kuononoka Lishiko nguendi, "Uoshe uje ononoka Lishiko akayoya." 6 Vuno honi visoneka vihandeka hakupua muka vusunga ku mesho a Njambi ha lutsilielo vikevio evi nguavio, "Keti ulihule yove vavenia nguove, nkuma iya honi akaya muilu?" (Cinapu ngue uli nakushuluisa Kilistu ha mavu) 7 "Cipue keti ulihule yove vavenia nguove nkuma iya akaya ku vukalo vua vatsi?" (Eci cinapu ngue uli nakuhumisa Kilistu ku vatsi) 8 Evi vinjili nakuhandeka vikevio evi, "lizi lia Njambi lili muyehi nove, lili mukanua kove na mu mutima uove" likelio, lizi lia lutsilielo lije tuli nakuambulula. 9 Nga ulitavela na kanua kove nguove Yesu ikeye Muene nakutsiliela mu mutima uove nguove Njambi uamusanguile ku vatsi, ukovoka. 10 Muomu ha lutsilielo luetu mukemo vanatupuisa vaka vusunga, hakulitavela cetu mukemo tunovoka. 11 Ngue muvanasoneka mu visoneka nguavo, "Uoshe uje akatsiliela muli ikeye kakevu shuamua." 12 Kukuesi kahangu hakati ka Vayunda na Vangelengu, muomu Njambi uje umo lika ikeye vene Muene ua voshe, kaha akakuisula cikuma voshe vaje vasana ha lizina liendi. 13 Ngue muvanasoneka mu visoneka nguavo, "Uoshe uje akasana lizina lia Muene mu kumukuasa akovoka."

14 Nkuma vatihoni vakasana lizina liendi linga avakuase nga vakevo kuvatsilielele? Nkuma vati vakatsiliela nga kuvovuile lizi? Nkuma vatihoni vakevua lizi nga kuvaliambuluile? 15 Nkuma vakambulula vatihoni lizi nga tunganda kuvavatumine? Ngue muvanasoneka mu visoneka nguavo, "Cinapu cakuvuahelela cikuma omo tunganda vakeja nakuneha Muzimbu Uacili!" 16 Vuno honi keti voshe vanatambula Muzimbu Uacili. Isaya vavenia alinakuhandeka nguendi, "Muene, nkuma iya uatsilielele vije vivovuile kuli yetu?" 17 Nankuma lutsilielo lukahumu hakuvua lizi, kaha na kuivua lizi likahumu hakuambulula via Kilistu.

18 Vuno honi njihula nguange, muavusunga nkuma kuvovuile lizi ndi? Cilivene valiuvuile, muomu ngue muvanasoneka mu visoneka nguavo,

"Mutambi ua lizi liavo uashandokelele ha mavu oshe,

Mezi avo ahetele naku ntsongo ya mavu oshe."

19 Kaha njihula naua nguange, nkuma vantu Vaisaleli kuvevuisisile ndi? Mosesa ikeye vavenia uapuile uakulivanga kukumbulula nguendi,

"Njikapangesa vaje keti Vayunda vaje vakuhona seho

linga vantu vange vakovue cipululu,

Njikapangesa vaje keti Vayunda vakuhona mana

linga vakanienguese vantu vange."

20 Kaha Isaya nakusimpa uahandekele nguendi,

"Vanjiuanene vaje kuvanjitondele,

njasholokele kuli vaje kuvanjihuile."

21 Kaha Isaya uahandekele naua hali vaka Isaleli nguendi, "Ntsimbu yoshe njikolola mavoko ange mukutambula vantu vaje vakuhona kuononoka na vaje vaka kunjiluisa."