1 Yetu vaje vanakolo mu lutsilielo tunapande kukuasa vaje kanda vakole mu lutsilielo ha kuvakuasa kuambata viteli viavo. Kutuapandele kulivuahelesa yetu vavenia. 2 Vuno honi tuva voshe tunapande kuvuahelesa vakuetu mukuvalingila viacili, linga vakole mu lutsilielo. 3 Muomu Kilistu kalivuahelesele ikeye vavenia houe. Vuno honi ngue muvanasoneka mu visoneka nguavo, "Kushaula kuje kuvamishauile kuneja hali yange." 4 Viuma vioshe vije vanasoneka mu visoneka vavisonekele linga vitulongese, linga tusimpe na kulikolesa cije civanatuhana mu visoneka linga tukale nakutsiliela. 5 Kaha Njambi uje ikeye ntsina ya kusimpa na kukolesa, amihane kuyoya vuino mukati keni umo na mukuavo kuhitila muli Kilistu Yesu, 6 linga mu voshe mukashangazale Njambi Ishe ya Muene uetu Yesu Kilistu na lizi limo.

7 Nankuma, litambuleni umo namukuavo, ngue muanamitambula Kilistu, linga muhane vumpau kuli Njambi. 8 Muomu njimileka nguange Kilistu vamupuisile muka kupangela Vayunda, mukumuesa ngue Njambi uapua ua vusunga, mukulingisa vikulaheso viendi kuli vakukuluila vavo linga vipue via vusunga, 9 kaha naua mukulingisa vaje keti Vayunda linga vashangazale Njambi ha cikeketima cendi. Ngue muvana visoneka muvisoneka nguavo,

"Nankuma, njikakushangazala hakati ka vaje keti Vayunda,

njikemba nakukushangazala."

10 Kaha naua nguavo,

"Yeni vaje keti Vayunda joleleni hamo na vantu va Njambi!"

11 Kaha naua nguavo,

"Shangazaleni Muene, yeni voshe vaje keti Vayunda,

mushangazaleni yeni vantu voshe!"

12 Kaha naua Isaya ahandeka nguendi,

"Mutekuluila ua Njesi akasholoka,

akeja mukuyula vaje keti Vayunda,

kaha vakahaka kutsiliela cavo muli ikeye."

13 Kaha Njambi, uje ntsina ya kutsiliela, amishulise na kuvuahelela coshe na ciyulo muomu ha lutsilielo lueni muli ikeye, linga kutsiliela ceni citualeleleho kukola na nzili ya Cimbembesi Uakulela.

14 Vamuanetu, yange vavenia njinamono nguange muavusunga yeni munashulu na vucili, kaha muli na mana oshe, kaha naua muasa kulilongesa umo na mukuavo. 15 Vuno honi mu mukanda ou njinasimpi ha kusoneka viuma vimo njamianukisa. Njinasimpi muomu ha kapandi kaje kananjihana Njambi, 16 ha kupua ngamba ua Kilistu Yesu hakupangela vaje keti Vayunda. Njilinakupanga ngue kasasendote mukuambulula Muzimbu Uacili ua Njambi, linga vaje keti Vayunda vapue nkombelo yakuvatambula kuli Njambi, ije ivanalelesa kuli Cimbembesi Uakulela. 17 Muvumo muli Kilistu Yesu, njasa kulihalesa hakupangela Njambi. 18 Muomu njikasimpa nakuhandeka lika vije vianalingi Kilistu kuhitila muli yange mukutuamenena vaje keti Vayunda linga vononoke Njambi. Nalingi evi mu mezi na vilinga, 19 na nzili ya vikomoueso na vizivukiso, na nzili ya Cimbembesi ua Njambi. Nankuma, kuhuma ku Yelusalema na kuheta ku Ilikiume, njinamanesa kuambulula Muzimbu Uacili ua Kilistu. 20 Cizango cange ntsimbu yoshe cinapu kuambulula Muzimbu Uacili mu mitambela ije kanda vovue via Kilistu, kuteua njikatungila ha luvula luanahindi laja muntu ueka. 21 Ngue muvanasoneka mu visoneka nguavo,

"Vaje kuvavalekele via hali ikeye vakamumona,

kaha vaje kuvevuile, vakevuisisa."

22 Kaha evi vikevo vianjihonouesele vintsimbu viavingi kuija kuli yeni. 23 Vuno honi omo njamanesa vipangi viange mu vihela evi, kaha njatondele ha miaka yayingi linga njije njakumimone, 24 njinatsiliela kulinga ngoco vene. Njitonda kumimona ha vungenzi vuange vuakuya ku Sepeine, linga muakunjikuase hakuya kuje, kaha njikahandeke neni mu matangua amandende lika. 25 Kaha hano vene njili nakuya ku Yelusalema nakupangela vantu va Njambi kuje. 26 Muomu vikungulukilo viamu Masendoniya na mu Akaya vanasinganieka kuhanako mulambu mukukuasa vihutu hakati ka vantu va Njambi mu Yelusalema. 27 Viapuile visinganieka viavo vavenia lika, vuno honi cilivene ha cuma eci, vakevo vakele na likongo lia kuvakuasa. Muomu Vayunda valipangelele vikuisulo viavo via cimbembesi na vaje keti Vayunda, kaha vaje keti Vayunda vanapande kupangesa vikuisulo viavo via vufuko mukukuasa Vayunda. 28 Omo njinamanesa vipangi evi nakuneha vimbongo vioshe kuli vakevo vije vivana vakunguluila, kaha njikaya ku Sepeine nakumisikamesa ha vungenzi vuange vua kuya kuje. 29 Kaha omo njikeja kuli yeni, njazivuka nguange njikeja nakushula ca vikuisulo via Kilistu.

30 Njimilambelela vamuanetu, kuhitila muli Muene uetu Yesu Kilistu na kuhitila mu cizango ca Cimbembesi, lipandakaneni hamo nange mukunjilombelela cikuma kuli Njambi. 31 Lombeleni linga njikahone kukala na vushonde kuli vakakuhona kutsiliela mu Yundeya, kaha naua vipangi viange mu Yelusalema vakavitambule ku vantu va Njambi vaje vali muje. 32 Nankuma, njikeja kuli yeni nakuvuahelela coshe, nga cinapu cizango ca Njambi, na kuvuahelela mukumisikamesa. 33 Kaha Njambi, ntsina ya ciyulo, akale neni voshe. Ameni.